79
Jerusalem imackekicne irec busâqoc gae
1 O Anutu, qâpuc jaŋe haemaŋgao raʒimbiŋ,
tiri ufuŋgao wâwânâŋ bâfuambiŋ,
Jerusalem hae ima bambiŋ.
2 Jaŋe kiŋaŋŋicfâcge fâri ombâŋ‐jeŋic
sawa wipe jaŋere micko râembiŋ,
tiri ŋicfâcge biuc‐jeŋic kâte qowi jarembiŋ.
3 Erâ socjeŋic Jerusalem hae rârec
opâ iŋucne hesiepie rawec;
mozi moc ducjopazac!
4 Bembeŋko juraŋgopieŋ jaŋe mecpiroc enâreeŋgopieŋ;
ŋic rârec rârec juraŋgopieŋ jaŋe
mu ruruc enârehuc gâwie‐nâreeŋgopieŋ.
5 O Wofuŋ, go kimbeŋ qanâreku mo dameŋko behecmu?
Aaricgezi ʒoc iŋucne bâruŋkeku mo dameŋko qaʒueocmu?
6 Kimbeŋge qâpuc kâuc bacguŋgopieŋ jaŋere faio hoŋkec,
ŋicguru ʒâŋege mi wâsickeeŋgopieŋ jaŋerao.
7 Jaŋe hâcne Jakobo ki qâsuc ecnembiŋ,
â hae mâreŋ‐ticne imackembiŋ.
8 Mimiŋnefâc‐nâŋec jaŋere kiŋte mi mana gâpâre‐nârec,
buurucgezi biac ware bâfuac‐nâpooc;
nâŋe mâretec docke betaŋ eŋgopeneŋ.
9 Go ʒâŋe biŋegere erâ bafic‐nâpoc,
o bâbâpiaŋ Anutu‐nâŋec!
Ʒâŋegere erâ batarac‐nâpohuc
sâqocne‐nâŋec bâtâmirec.
10 Qâpuc jaŋe wemocte muniŋmu, “Anutu‐jeŋic weni?”
Kiŋaŋŋicfâcge socjeŋic hoŋkekicne irec kiŋ
qâpuc jaŋerao bataratec honenʒepeneŋ.
11 Niŋgiŋ‐jopakicne jaŋere wâwâsiczi bâfuacguzejec,
â hâmoniŋte biŋe qacjopakicne
jaŋe mesanaŋgezi firuec‐jopatec junʒepieŋ.
12 Râpec‐nâpohuc juŋgopieŋzi, Wofuŋ, go mu ruruc egarembiŋ,
irec furine arec 7 jaretec sahac‐jeŋicko fezejec.
13 Â ŋicfâcge nâŋe, lama guru soŋaŋ‐nâpoekic hâcne,
ine daŋge gazahuc junʒepeneŋ raŋɋa raŋɋa;
â ɋâricfâc‐nâŋec gaŋne gaŋne fua raniŋmu,
jaŋe ʒâŋe biŋege mutaniŋke‐jarehuc junʒepeneŋ.