89
Dawidi dâŋ mupaŋkecnekicne fârine weni?
1 O Wofuŋ, no aki anonocgere
mumumbiaŋ gae hati hehuc juzepac;
micbipic‐nanezi jauŋ fârige musokape,
eme ɋâric fua raniŋmuzi manahuc junʒepieŋ.
2 Aki anonocge dodoma sanaŋ âkendâŋnemeŋ,
jauŋ fârige i sambâŋ iŋucne fofo sanaŋ foocmu.
3 Go mumeŋ, “Ŋicnane bâwosâepo ehec ʒâʒâfic sanaŋ epec,
ehuc kiŋaŋŋic‐nane Dawidi ʒiŋuc âzâcnepo:
4 ‘No ɋâricfâcge jusanaŋkeniŋte mupaŋke‐garekopac,
â ŋicwofuŋ ŋeŋege ɋâric gaŋne gaŋne jufeniŋmu,
jaŋerao ŋesanaŋkerâ ŋehuc juzejec.’ ”
5 Sambâŋne sambâŋne jaŋe, Wofuŋ, gore mâsi bapa mumbiaŋkenʒepieŋ,
tiriŋic jaŋere tutumaŋzi jauŋ fârige muafeckezejec.
6 Sambâŋko mo ŋic mo Wofuŋ gohec sâc hehene?
Sambâŋ aŋelo jaŋeraonec mozi Wofuŋ go iŋucne jukac?
7 Anutu go hâcne aŋelo micne jaŋe araŋ bagareeŋgopieŋ,
go rârec bârârec egareeŋgopieŋ,
jaŋe siric‐jopahuc qeŋ bipinehec juekic.
8 O Anutu Tâpiri Ɋuŋɋasaŋ Wofuŋ,
go erâ‐eesanaŋgezi rârecguha,
Wofuŋ, go iŋucnea mozi tâpirihec jukac?
9 Goki hâwec qac momori‐ticnere guriŋ baekic,
siri‐ticne fahareha goki bâniniŋkeekic.
10 Go Aigita mâreŋ qâŋɋâŋ iŋucne banʒaŋnemeŋ,
râsifâcge tâpiri megezi qâtâtiec‐jopameŋ.
11 Sambâŋ i gore wiac, â mâreŋ i gorea wâc;
sambâŋ mâreŋ â maŋnao wiac fokac i gokizia bâfuameŋ.
12 Mâreŋ faic â juwic i goki bâfuac‐jofameŋ;
Taboro â Herimoŋ jahe ʒeri ehuc ʒâŋege
mumbiaŋkeekopirec.
13 Meombâŋge qac momori‐ticnehec,
mege sanaŋne, mefârege bâfeŋnerâ domakic.
14 Tiŋne juju â bâbâtiŋ izi eri ŋeŋegere hobeteŋ,
aki anonoc â jauŋ fâri jahe bânie‐gareekopirec.
15 Hombaŋte ofac hehe manaŋgopieŋ jaŋere manape ʒerine ekac,
Wofuŋ, ʒâŋe maigere tatamacko juŋgopieŋ jaŋere hâcne.
16 Jaŋe ʒâŋegere erâ dameŋ sâc kiwaeeŋgopieŋ,
â tiŋnege muafeckeeŋgopieŋ.
17 Go hâcne eri tatamac‐jeŋic â tâpiri‐jeŋic,
aki anonocgere erâ tâpiri‐nâŋeczi fua tâcnekac.
18 Maro‐nâŋec i Wofuŋzi rauckekac hâcne,
â ŋicwofuŋ‐nâŋecte ru i Israere tiri Wofuŋzi jukac.
19 Mârâc jaha mitiŋicge maŋko fuac ecnehuc ʒiŋuc âzâcnemeŋ:
“No ŋicsanaŋ moc qizecnao eri hendiŋ hecnepo,
ŋicguru jaŋeraonec moc bâwosâerâ fekicne âkendâŋnepo.
20 No kiŋaŋŋic‐nane Dawidi hâcne bâfuapo,
erâ tiri wokemaŋ‐nane ruacnepo.
21 Menanezi hati jowa qataŋ ecnezejec,
meombâŋ‐nanezi tâpiri hecneme huzejec.
22 Râsi moczi e eatuckehuc doc mi bazejec,
ŋic sindaŋne moczi e mi bawahazejec.
23 Kisâfâcne mai‐ticnao qanʒaŋ‐jopapemu,
â e qaisockeniŋmu jaŋe qâfiec‐jopapemu.
24 Jauŋ fâri‐nane â aki anonoc‐nane jahe e qâtehuc juzepirec,
â nore ʒâŋeo tâpiri‐ticnezi faharerâ domazejec.
25 Noni hâwec meticnere rurumaŋko râepemu,
â opâ sâko* Eufrata opâ sâkore mukicne. râcnepe mefâre‐ticnezi soŋaŋkezejec.
26 Eki ʒiŋuc nazaocmu: ‘Go mamac‐nane,
Anutu‐nane, â bâbâpiaŋ‐nanere qânâ sanaŋ.’
27 Â noni e mârâc fufua âkendâŋnepemu,
mâreŋ ŋicwofuŋ jaŋere micne.
28 Aki anonoc‐nanezi e basanaŋkehuc jowa jupemu,
â ʒâʒâfic‐nane i paŋnea focnehuc juocmu.
29 Motec ŋosa birifâc‐ticne tofamâc forahuc juzejec,
â ŋicwofuŋ ŋeŋe‐ticne keteŋkepe sambâŋte sâc ezejec.
30 “Ɋâricfâcne jaŋe sâcmutâc dâŋnane behehuc
mumutâc dâŋnane mi bâjâpeniŋmuo,
31 erâ wâc dâŋsanaŋ‐nane qambaraŋkehuc
mumupaŋ‐nane qâsuaniŋmuo ine
32 noni bahac‐jeŋicte erâ kâcbiŋzi bâtiŋ‐jopapemu,
â hehesic‐jeŋicte erâ bâʒâic‐jopapemu.
33 E ine aki anonoc‐nane mi jâoc ropemu,
me jauŋ fâri‐nane mi omaecnepemu.
34 No ʒâʒâfic‐nane mi bâŋgoroŋkepemu,
â micnaneonec dâŋ wahawec i mi hetikiepemu.
35 No tiri juju‐naneo ɋetickehuc mumupaŋ sanaŋ mupaŋkepo:
‘No Dawidi burec moc mi ecnepemu;
36 ere ɋâric biri tofamâc jurahuc junʒepieŋ,
â ŋicwofuŋ ŋeŋe‐ticne mai‐naneo ʒoaŋ domakac ere sâc ezejec.
37 Mosa râekicne irec sâc ŋehuc juzejec,
sambâŋ foocmu sâc ŋesanaŋkezejec.’ ”
38 Eme ʒi ine sifu behemeŋ â suŋgiŋkemeŋ,
wokemaŋ ruacnemeŋ ere erâ kimbeŋzi maŋge fusekac.
39 Kiŋaŋŋicgehec ʒâʒâfic epic i hetâtiemeŋ,
eri hendiŋ‐ticne mâreŋko behetec waha gâpârewec.
40 Go qânâsac‐ticne qâropie‐fâremeŋ,
hae sanaŋ‐ticne hetâtiemeŋ.
41 sicne fotâc eeŋgopieŋ sasawa
jaŋe wiac‐ticne fiuckeeŋgopieŋ,
digurafâcne jaŋe mu ruruc ecneeŋgopieŋ.
42 Râsifâcne mana‐jaretec sanaŋkecnembiŋ,
kisâfâcne mana‐jaretec ʒeri bari embiŋ.
43 Jei, sâqe‐ticne masune bahasickemeŋ,
ehuc ʒikamaŋko dope hutuŋ mi ecnemeŋ.
44 Meticnaonec ŋicwofuŋ gunu‐ticne batarameŋ,
eri ŋeŋe‐ticne hetuŋketec mâreŋko qawec fokac.
45 Qacfiric jujure dameŋ‐ticne hetâcnehuc
fai‐ticnao mimi busâqoc râemeŋ.
46 O Wofuŋ, go soŋkepaŋkehuc juku mo dameŋko fuacmu?
Kimbeŋgere ʒocbâruŋzi wezimucko qaʒueocmu?
47 O Wofuŋ, juju dameŋ‐nâŋec bembeŋne fokac i manac me,
ŋicte ɋâric sasawa sisirowene bâfuac‐nâpomeŋ irec manasuc.
48 Mozi moc jufehuc juku hâmoc geŋkecneocmu?
Mozi juju‐ticne hâmoc haere tâpirire sâcne ŋezickeocmu?
49 O Wofuŋ, go mârâc jaha aki anonocge
Dawidi siocmâc mupaŋkecnemeŋ i fârine weni?
50 O Wofuŋ, kiŋaŋŋicge nifepupu enareeŋgopieŋ irec manasuc me!
Ŋicne ŋicne jaŋere mumusoriŋ dâŋ maŋnaneo bajukopac.
51 O Wofuŋ, dâŋ izi hâcne mimi qaqa enâreeŋgopieŋ,
ehuc wokemaŋ ruacnemeŋ e hata jume sâc mimi bâfuacneeŋgopieŋ.
52 Wofuŋ muteŋkehuc juzo raŋɋa raŋɋa. Jâmbomac jâmbâŋ.