141
Wofuŋ e sâqocnaonec bâhoc‐nâpozejec
1 O Wofuŋ, no wâsicgukopac, fâro jaha ware baficnuc;
wira‐garepe marac fânâŋ‐nane manac.
2 Nunumu‐nanere manatec hosâc âsu biaŋ ezejec,
me bâbâfeŋke‐nanezi ŋafere taha bâzi egarezejec.
3 O Wofuŋ, go micnane rucbapa râecnezemec,
bipic‐nanere motâc soŋaŋkehuc juzemec.
4 Maŋnanezi wiac sâqocne mi worickezejec;
eebapa sindaŋne ba bâuac mi ezepac;
gie hehesicne baeŋgopieŋ jaŋehec ââgo ehuc
jaŋeraonec wiac aŋacne ro nâc ezore takicnuzejec.
5 Ŋic tiŋne juekaczi urucko qa bâtiŋ me mu bâtiŋ enarezejec,
ŋic sindaŋnezi ine qizec‐nane tokic mi ruacnezejec.
Nunumu‐nanezi eebapa‐ticne sindaŋne
ʒuʒuhuc jaha râsi ecneekac hâcne.
6 Eme dâŋ mumutara jaŋere meo râec‐jopapie
ʒiŋuc mananiŋmu: Wofuŋte dâŋ i fârine.
7 Qânâ hefâuckerâ dâkâne behepie iriŋ tierâ foraekac,
siec‐jeŋic iŋuc behepie hâmoc haere motâcko foocmu.
8 No ine ʒâŋe gorao fihuc jukopac, o Wofuŋ Anutu;
dapeŋgao soŋkekopac, juju‐nane hâmoc mi behecnec.
9 Sâqocne bapa jaŋe nombâŋ bitiŋ enareeŋgopieŋ,
irec sabecnuzemec.
10 No furu juhape,
ŋic sindaŋne jaŋe jaŋacne bitiŋzi kicjopazejec.