144
Mumuteŋ â nunumu gae
1 Wofuŋ qânâ sanaŋ‐nane e muteŋkezo;
e menane juju giere baafeckewec,
â memotec‐nane ʒika qazucnewec.
2 E tâpiri‐nane â huec‐nane,
e hae sanaŋ‐nane â babafic‐nane,
maro‐nane â rorowec‐nane;
e ŋicne ŋicne rurumaŋ‐naneo râec‐jopawec.
3 O Wofuŋ, go ŋic e wemo macticnere manasucnehuc,
hone maiŋ ecneekic?
4 Ŋic e nokafe iŋucne sawa mac,
â juju dameŋ‐ticnezi nâkumuc fotâcneekac irec sâc.
5 Wofuŋ, go sambâŋ bârâriehuc tara wahac;
tiki bâuac‐jopatec hosâc qaniŋ.
6 Râsifâcge bâbâric wicke‐jarehuc bâtâtiec‐jopac,
tepe motecge qâtâcne‐jaretec siŋsaŋ qaniŋ.
7 Faicnec mege sicnerâ ro baefucnuc,
rumi sâkoonec fâre surucnuc,
ŋic jabane jaŋere meonec bataracnuc.
8 Jaŋe micbipic‐jeŋiczi gibioc dâŋ mueŋgopieŋ,
â mefâre‐jeŋiczi eeatuc gie baeŋgopieŋ.
9 O Anutu, no gae ɋâricne moc hefua‐garepe,
gita mucne teŋ izi musi bagarepe.
10 Goki ŋicwofuŋ ʒikao sasanaŋ tahac‐jopaekic,
go kiŋaŋŋicge Dawidi ʒikao ŋezickeekic.
11 Go hâmoc bâbâfua ʒika irec ŋezicnuzemec,
â ŋic jabane jaŋere meonec bataracnuzemec;
jaŋe micbipic‐jeŋiczi gibioc dâŋ mueŋgopieŋ,
â mefâre‐jeŋiczi eeatuc gie baeŋgopieŋ.
12 Ŋokâfâc‐nâŋec jaŋe socɋâri juhuc
ʒareŋsuc iŋucne soka fienʒepieŋ,
â otâfâc‐nâŋec jaŋe erific tuturuŋnao
metâ qâreŋ heeŋgopieŋ, iŋucne fuanʒepieŋ.
13 Rowaŋfic‐nâŋecko nânâ mâriri fusucmame
dameŋne dameŋne nâhuc junʒepeneŋ.
Lamafâc‐nâŋec jaŋe sawe mâririackerâ,
tauseŋ â teŋ tauseŋ fuanʒepieŋ.
14 Bulimakaofâc‐nâŋec jaŋe kiwechec erâ,
motec sahac furu biaŋne rohuc junʒepieŋ;
hae ʒoŋa‐nâŋecko ki uu moc mi fuazejec.
15 Ŋicguru wiac iŋuc fua‐jareme juhâmoniŋmu,
Wofuŋzi Anutu jujareha juhâmoniŋmu hâcne.