ROMA
Paulo e miti kiŋaŋ mimic rahuc Korinti haeo mocwâc fisiwec. Erâ ira juhuc Romaŋic jaŋere papia qâreŋkewec. Roma haeo miti ŋic ŋokac jumbiŋ jaŋere fuŋne mi mana‐hâmoŋgopeneŋ. Paulo e jahacne me aposolo moczi hae ira mi fisihame jumbiŋ. Irec ʒiŋuc muzo: Jerusalem haeonec miti ŋic ŋokac omanezi Roma haeo ra juhuc miti miczi muhapie hae irecnec ŋic gâcnezi manarâ Jesure biŋefâc embiŋ. Mâro wahawec dameŋ ira Judaŋiczi Romaŋic ekicne jaŋeraonec gâcnezi mâmâc Jerusalem haeo tumaŋnembiŋ (Aposolo 2:10). Ehuc wiac ʒâŋe furu honembiŋ â Petorore miti manambiŋ. Erâ wâc ʒâhecko Jerusalem haeo mitire ʒika kâpâcwâru fuame miti ŋic ŋokac jaŋe râwiŋ qâwiŋnerâ hae sâc rafârembiŋ (Aposolo 8:1 â 11:19). Eme jaŋeraonec gâcnezi raku Roma haeo fisimbiŋ wâc mecne. Ŋic ŋokac iŋucnezi hâcne Roma haeo Jesure binaŋ bahuc ŋic ŋokac jazapie irecnec gâcnezi mana ʒakiembiŋ. Eme jaŋerao hâcne Paulozi papia qâreŋkerâ râeme rawec.
Paulo e hae mâreŋ gâcne rârecke‐fâreku Korinti haeo ŋehuc ʒiŋuc muwec: Ŋicfâc‐nane hae sâc jaŋe Jerusalem haeonec miti ŋic ŋokac jaŋere moneŋ bâturembiŋ i Jerusalem haeo bararâ mocwâc risie warerâ Roma haeo rapemu. Eme hae irecnec miti ŋic ŋokac jaŋe neŋgoc ŋesiŋ ŋenarehapie Sipen mâreŋko miti kiŋaŋ rapemu (Roma 15:28). Roma haeo Paulo gie‐ticnaonec opâ ruac 26 jumbiŋ jaŋere ʒâŋe râe‐fârewec (Roma 16:1–16). Gâcne sâko ine mi manac‐jopawec. Papia‐ticne ŋokac moc ʒâŋene Foibe e râcneme Roma haeo barawec.
Erâ Paulo e Roma haeonec miti ŋic ŋokac ʒâfo bajareocte irec sawa papia mi râe‐jarewec. E mitire fuŋne mutâcne‐jareocte irec mâmâc manasurâ papia râe‐jarewec. Ine fuŋne ʒiŋucte: Roma haeo Judaŋiczi opâ ruac â qâpuczi opâ ruac mâmâc jumbiŋ. Eme Judaŋic opâ ruac jaŋe miti raŋɋanao sâcmutâc dâŋ fokac i reŋkehuc irec manapie fârine wâc ewec. Ehuc mumbiŋ: I Wofuŋdâŋ jaha, irec i mâmâc reŋkehuc biaŋkerâ sambâŋko fezo. Iŋuc mupie qâpuczi opâ ruac, Paulore miti gieonec rakicne â gâcne, jaŋe dâŋ irec manapie mi sâckeme qatarambiŋ. Irec dâŋjeŋic fâfâuc ejujec â gâcnezi maŋjahec embiŋ. Erâ wâc hombaŋ â wiac gâcne sâcti qâtiri râe rambiŋ. Moc ine qâpuckonec opâ ruac jaŋe Judaŋic jaŋere manapie wawahane ewec. Ine ʒiŋuc muhuc mana‐jarepie sâqorewec: Jaŋe hâcne Jesu qambiŋ, erâ wâc dameŋ ʒiŋuczia neŋgocne sâko maŋsanaŋ ehuc Jesure miti qikiŋneeŋgopieŋ, irec Wofuŋzi behec‐jopaocmu. Mupie Judaŋic opâ ruac gâcne jaŋe mumbiŋ: Mâcne, Wofuŋzi bafic‐nâpoocmu, nâŋe fuŋfuŋfâcne. Dâŋ sisifucne iŋuc fowecte Paulozi mitire fuŋne jâmbâŋ ritu‐jarewec. Ehuc sâcmutâc dâŋte â mamanasiŋte â mitio tiŋke biaŋ ee irec dâŋ bâutuckehuc qâreŋke‐jarewec. Eme Judaŋic â qâpuc guru Anutuzi weniŋuc mana‐jareme fokac i wâc mufua‐jarewec. Erâ wâc dâŋ gâcne ʒuhuckewec. Miti fuŋqizecne kecʒiŋuc qâreŋkewec: Mosere sâcmutâc dâŋ reŋkehuc bibiaŋke i mi fokac, Jesu manasiŋkehuc bibiaŋke i mocjaha fokac. Sâcmutâc dâŋ bajuhuc kiŋ mi hefâsâezo, Jesurao roweckehuc kiŋ hefâsâezo. Irec Paulozi Romaŋic qâreŋke‐jarewec i dâŋ fâri hândâŋ â bubiaŋ dâŋ jâmbâŋ.
Romaŋic jaŋere papia dâŋ neŋgocne sâko jahec â moc fokac:
1. Jesu Kristo manasiŋkehuc kiŋ hefâsâezo. Ine gaŋ 1—8 irec maŋnao.
2. Judaŋic me qâpuc Kristo‐nâŋec mocjaha. Gaŋ 9—11.
3. Maŋzi roroc ehuc Wofuŋte erâ juzo. Gaŋ 12—16.
1
Paulo gie‐ticnere fuŋne
Paulo no Jesu Kristozi kiŋaŋ qaqa‐ticne bacnurâ aposolo‐ticne mucnuhuc Anuture Biŋebiaŋ râepe qareŋko raocte rowosâecnuwec. Apo 9:15; 13:2; Gal 1:15 Miti i hâcne fuaocte Anutuzi mârâc jaha porofete ejareme irec findaŋdâŋ tiri papiao qâreŋkembiŋ. Tit 1:2; Rom 16:25, 26 Qâreŋkepie Ŋokâ‐ticnerao iticnewec. E sahachec fufua i Dawidi ɋâricfâc‐ticne jaŋeraonec fuawec, Rom 9:5; Sam II 7:12; Mat 22:42; Tim II 2:8; Apo 13:33 erâ e maŋɋaɋac bâbâfua Mârohec jujuzi Anuture Ŋokâ jukac, irec fuŋne hâmokonec faharewecko fua taniŋke‐jâmbâŋkewec. Jesu Kristo e Wofuŋ‐nâŋeczi aki anonoc enarehuc aposolo gie tahacnuwec. Ehuc mâreŋ sâc ŋic miti jazepe mana rereŋ epie Jesure ʒâŋe biŋe raocte munarewec. Apo 26:16–18; Rom 15:18; Gal 2:7, 9 Eme ŋoŋe jaŋere âgofâc jaha, Jesu Kristore ŋicfâc eniŋte hefârec‐ŋopakicne, irec gie i ŋoŋerao iŋuc jaha bapere munarewec. Roma haeonec Anuture jorofâc, tiriŋic mucŋopakicne, ŋoŋere hâcne papia ʒi qâreŋkekopac. Mamac‐nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec. Kor I 1:2; Kor II 1:1; Efe 1:1; Ʒar 6:25, 26
Paulozi Roma haeo miti mamana iqic‐jopaocte muwec
Miti babaju‐ŋeŋicte mâreŋ sâc manapie biaŋkekacte qanaŋ ŋoŋere erâ daŋge mupe Jesu Kristorao qâra Anutu‐nanerao fotâcnekac. Rom 16:19; Tes I 1:8 No Ŋokâ‐ticnere Biŋebiaŋ muhuc maŋnanezi Anutu kiŋaŋ qacnepe fuŋne‐nane manakacte ere maio dâŋ ʒi mupe mananiŋ: Fil 1:18; Efe 1:16 10 No numucneekopac sâc ŋoŋere mâmâc hati manasuekopac, ehuc Anutu maname sâckeme hata bâfua‐nareme ŋoŋerao fâpemurâ âzâcneekopac. Apo 19:21; Rom 15:23, 32 11 No ŋoŋe honec‐ŋopapere enareekac. Ehuc fârâ maŋte bâmec moc baŋarepe qiŋ herâ juniŋte muekopac. Apo 28:31 12 Me kecʒiŋuc mupe: No ŋoŋerao fâpe mamanasiŋte fârine nowac gowatuŋ ehuc keketeŋ enʒepeneŋ. Pet II 1:1 13 Erâ âgofâc‐nane, fuŋne‐nane kâuc banʒipiŋte ʒiŋuc ŋazape: No ŋicguru gâcne jaŋerao eeckopac iŋuc jaha ŋoŋerao fârâ miti giere fârine piticne bâfuapemurâ hati muekopac. Erâ fâzo mupe sâc wiac gâcnezi niŋgiŋnume juekopac. Joh 15:16 14 Noni ŋic kosa, Grikŋic â kâte sanaŋ, mamanahec â mutucne mâmâc mitizi tofa bazu‐jarepemurâ munarekicne. 15 Irec Romaŋic ŋoŋe iŋuc jaha Biŋebiaŋ ŋazapemurâ maŋnanezi afeckeekopac.
Mamanasiŋte erâ juju hotâckezo
16 No Biŋebiaŋte manape mimi gaŋgaŋnehec mi eekac, i Anuture tâpirihec, irec mana sakac eniŋmu sâc bâpiaŋ‐jopaocmu, Judaŋic hâcne, erâ Grikŋic mâmâc. Mi Mâ 119:46; Kor I 1:18, 24; Apo 13:46 17 Biŋebiaŋko hâcne Anuture tiŋne fua taniŋkeekac, i hâcne eki mamanasiŋhec jaŋe tahac‐jopaekac, ehame mamanasiŋko utuckeniŋmu. Dâŋqâreŋ ʒiŋuc hâcne fokac: “Biaŋkekicnezi mamanasiŋte erâ juju hotâckeocmu.” Rom 3:21, 22; Hab 2:4
Ŋic jaŋe Anutu‐jeŋic beherâ dapâcko raʒimbiŋ
18 Ŋiczi ine Anutu qamaserâ sindaŋ ehuc kike hata‐ticne hesifuckeeŋgopieŋte kimbeŋ‐ticnezi sambâŋkonec fua taniŋkeekac. Joh 16:9; Tes II 2:12 19 Anuture fuŋne gâcne ŋiczi mamanane i manaeŋgopieŋ, Anutu jahac bataniŋke‐jarewec. Apo 14:15–17; 17:24–28 20 Anutu e ŋiczi mi hohonene, â mâreŋ bâfuahuc ine wiac fuŋne fuŋne râewec izi tâpiri sanaŋ‐ticne â qâreŋ‐ticne bataniŋkeme sâcne hone mana tarac eeŋgopieŋ. Irec ŋic gâcne jaŋe wemocko kâuc bahuc sahac ŋeŋezic dâŋ muniŋmu. Mi Mâ 19:1; Heb 11:3; Hio 12:7–9 21 Jaŋe ine Anutu jukac i mana‐bipiehuc mi jukac‐tinac eha araŋ mi bacnembiŋ â mucne bacne mi ecnembiŋ, aricne. Jaŋe mumusifuc fuŋne fuŋne bâfuahuc maŋmutuc epie dapâczi foŋjopawec. Efe 4:18; Bar 14:7 22 Ehuc nâŋe mamanahec juŋgopeneŋ muhuc sâke bâbâc eku maŋmutuc embiŋ. Jer 10:14; Kor I 1:20; Mi Mâ 106:20; Sâc 4:15–19 23 Iŋuc ejareme jaŋe Anutu juju hati e araŋ mi bacnehuc ŋic â wipe â qowi â homa, wiac sisiroweme hâcne irec ɋâŋ qâqâtâc barâ araŋ bacnembiŋ.
Ŋic jaŋe Anutu beherâ mamakâc embiŋ
24 Iŋuc epie Anutuzi hone suŋgiŋ ejareme maŋzi sasec kosa hurerâ mamakâc ehuc maŋ sahac‐jeŋic bâsâqorembiŋ. Apo 14:16 25 Jaŋe Anutu jâmbomac rune râpeckerâ burec maickembiŋ. Ehuc ru bâbâfua‐jeŋic qikiŋnerâ wiac bâfuakicne araŋ bacnehuc kiŋaŋ qacnembiŋ. Wiac bâfua‐fârewec e mumuteŋheczi mumuteŋhec juraʒihuc jume sâckeocmu. Jâmbomac. Rom 9:5 26 Ŋic jaŋe e hâcne râpeckembiŋte suŋgiŋ‐jopame sasec sâqocne jâmbâŋ bâfuambiŋ. Ehuc ŋokac jaŋe Anutuzi hata muwec i qâsorierâ mi jujuo rambiŋ. 27 Â ŋic jaŋe iŋuc jaha ŋowe ŋonâŋ juju qikiŋnerâ maŋjeŋicko sasecte ʒocsâko ʒame jaŋe jaŋackoaŋ mamakâc fuŋmoc bâfuambiŋ. Erâ bâbâsifuc‐jeŋicte okacne maŋ sahac sisipiric rombiŋ. Tah 18:22; 20:13; Kor I 6:9 28 Jaŋe Anuture fuŋne mana‐bipiehuc enʒaŋauc ecnepie suŋgiŋ‐jopame maŋjeŋic bâzickeme wiac mi eene i hâcne embiŋ. 29 Ehuc wiac hehesicne fuŋne fuŋne hurepie fewec, sindaŋ, andac, râŋgeŋne, erâ maŋjeŋicko iiŋguuŋ â ʒikâ â rârâsi â eeatuc, erâ gibioc izi fusucmakicne. 30 Jaŋe gupe bapa, micko âkec ŋic, Anutu kisâ eecne, ʒaubacne, pepecne, sahac mumuteŋ, sâqocnere hata bâbâfua, neŋgoc mamac dâŋ qaqatara, 31 maŋ mamanasu tâmiric juju, doc bapa, uruc jauŋ tâmiric juju. 32 Wiac iŋucne ehuc sipirickezo, Anuture micdâŋ iŋuc fokac i mana‐bipiehuc sifu eeŋgopieŋ, erâ i sawa mâcne, gâcnezi epie hume keteŋ ejareeŋgopieŋ wâc.

1:1: Apo 9:15; 13:2; Gal 1:15

1:2: Tit 1:2; Rom 16:25, 26

1:3: Rom 9:5; Sam II 7:12; Mat 22:42; Tim II 2:8; Apo 13:33

1:5: Apo 26:16–18; Rom 15:18; Gal 2:7, 9

1:7: Kor I 1:2; Kor II 1:1; Efe 1:1; Ʒar 6:25, 26

1:8: Rom 16:19; Tes I 1:8

1:9: Fil 1:18; Efe 1:16

1:10: Apo 19:21; Rom 15:23, 32

1:11: Apo 28:31

1:12: Pet II 1:1

1:13: Joh 15:16

1:16: Mi Mâ 119:46; Kor I 1:18, 24; Apo 13:46

1:17: Rom 3:21, 22; Hab 2:4

1:18: Joh 16:9; Tes II 2:12

1:19: Apo 14:15–17; 17:24–28

1:20: Mi Mâ 19:1; Heb 11:3; Hio 12:7–9

1:21: Efe 4:18; Bar 14:7

1:22: Jer 10:14; Kor I 1:20; Mi Mâ 106:20; Sâc 4:15–19

1:24: Apo 14:16

1:25: Rom 9:5

1:27: Tah 18:22; 20:13; Kor I 6:9