TITO
Tito e Helene ŋic. Paulozi miti qazucneme manawec (Galata 2:3). Paulo e rame ra jume ju ecnewec. Paulo â Banaba jahe Jerusalem haeo rapire bâjâpec‐jofame mâmâc rambiŋ (Galata 2:1). Juku Paulozi soreme ŋic jaŋere papia barame jajahec ewec. Ʒâhec ine Paulozi Kreta mucko râeme juhuc irecnec miti mamana hone soŋaŋ ejarewec. Paulo e Makedonia mâreŋko juhuc Tito papia râecnewec, ehuc erao raocte qâreŋkecnewec (gaŋ 3:12). Timoteore papia i qâreŋkewec dameŋ ijaha Tito ere qâreŋkewec wâc.
Kreta miti mamana jaŋerao Judaŋic fisirâ maŋ bâsifuc ejarembiŋ. Â Kretaŋic jaŋacnaonec gâcnezi maŋko fuac dâŋ mumbiŋ. Eme ŋic ŋokac jaŋe dâŋ i â i mâmâc manarâ mitio wiac esifuckezo embiŋ. Eme Paulozi irec uŋdâŋ qâreŋkewec (gaŋ 1:10–16 â gaŋ 3:8–11). Erâ micne bapa jaŋere dâŋ i mâmâc qâreŋkewec.
Tito e Kreta nucko Jesure kikefuŋ jumbiŋ jaŋere micne erâ juku ijaha hâmowec.
1
Mumuʒâwe â jambuŋdâŋ
Paulo, Anuture kiŋaŋŋic â Jesu Kristore aposolo, no gie munarekicne i Anuture bâwosâecfâc jaŋe mamanasiŋhec eniŋte â dâŋ fâri qizecne mitio fokac i mana taraniŋte; ehuc juju sanaŋte biŋedâŋ, Anutu burec tâmiriczi mârâc jaha dameŋ mi fowecko muwec, i manahuc juju sanaŋ worickehuc juniŋte. Dâŋticne i hâcne dameŋ‐ticnao mufuahuc Anutu bâbâpiaŋ‐nâŋeczi noni muromackepemurâ mupaŋke‐narewec. Efe 1:9, 10; Tim I 1:1, 11 Eme mamanasiŋ wirec fonârekacte motec jâmbâŋ‐nane jukomec Tito go hâcne papia ʒi râe‐garekopac. Anutu Mamac â bâbâpiaŋ‐nâŋec Kristo Jesu eraonec aki anonoc â wama gorao fotâcnerâ fozejec. Tim I 1:2
Soŋaŋ micne bapa jaŋere dâŋ
Gie tofane fokac i bataracmurâ Kreta nucko hetaracgupo, irec gazapo iŋuc ehuc hae sâc soŋaŋ râec‐jopa razemec. Ŋic moc bahac fâsâc â ŋokac mocjahahec juocmu, erâ naru motecfâcne mitihec â ʒaubac tâmiric â pepecne tâmiric juniŋmu, ŋic iŋucne râec‐jopazemec. Tim I 3:2–4 Micne bapa moc e Anuture gie soŋaŋkeekaczi bahacmâc juzejec, ehuc pepecne tâmiric â ʒâʒâicne tâmiric â waiŋ âmbâŋ mi nânâ â ʒikare aafec tâmiric â moneŋ mafare sasec tâmiric, iŋuc juzejec. Kor I 4:1; Pet I 5:2; Tim II 2:24 Erâ jauŋhec â wiac biaŋne sasawa dodopecke â wama ruaine, tiŋne, araŋ bapanehec â sowa bâtâchec juzejec. Mitidâŋ mu qaqazuc ehuc hatane basanaŋkekicne i paŋnea bajuzejec. Eme izi tâpiri râcneme dâŋ fâri biaŋ ŋic qazu‐jarehuc mu sawaŋ ejarezejec â miti âke sipueŋgopieŋ jaŋere dâŋ bawahazejec. Tit 2:1; Tim I 1:10; Tim II 4:3
Mumusifuc â eeatuc ŋic
10 Ŋic bocjahazi râŋgeŋne â dâŋ racne mumu â eeatuc‐jeŋichec juŋgopieŋ, Judaŋiczi opâ ruac jaŋerao wemo afecnezi iŋuc juŋgopieŋ. 11 Ŋic izi hâcne moneŋ mafare erâ, mumusifuc‐jeŋic qatarakicne i musawehuc garikiŋ gâcne furu jaha ba sipiric ejareeŋgopieŋ; ŋic iŋucne jaŋere mic qâbâzickezo. Tit 3:6; Joh 10:12; Pet I 5:2 12 Kreta jaŋacne porofete moczi ʒiŋuc muwec: “Kreta ŋic jaŋe burec hati, qowi mimicne â wiac âmbâŋ nânâ.” 13 No dâŋ i manape jâmbomac ekac. Irec go mu bâtiŋ sanaŋne ejaretec mamanasiŋzi bâɋârec‐jopame ɋiɋic qanʒepieŋ. Tim II 4:2 14 Ehuc Judaŋic jaŋere mamana gufuc dâŋ racne â ŋic dâŋfâri râpeckembiŋ jaŋere sâcmutâc dâŋ mi mananʒepieŋ. Tim I 4:7 15 Maŋɋaɋachec jueŋgopieŋzi wiac sasaware manapie ɋaɋacne eekac. Â sâqocnezi maŋjeŋic bâbiekume mamanasiŋ tâmiric embiŋ jueŋgopieŋ, jaŋe ine mamana â maŋjeŋic mâmâc wâwânâŋhec efârewecte wiac mocte manapie ɋaɋacne mi eekac. Mat 15:11; Rom 14:20 16 Jaŋe, Anuture fuŋne manaeŋgopeneŋ, miczi iŋuc muhapie eebapa‐jeŋiczi ine mickeekac. Jaŋe ŋic mamakâcne â dâŋ qaqatara, â gie biaŋne moc bapanere sâc mâcne. Tim II 3:5

1:3: Efe 1:9, 10; Tim I 1:1, 11

1:4: Tim I 1:2

1:6: Tim I 3:2–4

1:7: Kor I 4:1; Pet I 5:2; Tim II 2:24

1:9: Tit 2:1; Tim I 1:10; Tim II 4:3

1:11: Tit 3:6; Joh 10:12; Pet I 5:2

1:13: Tim II 4:2

1:14: Tim I 4:7

1:15: Mat 15:11; Rom 14:20

1:16: Tim II 3:5