1 Eme no ʒâŋe fipe feme mi ŋic moczi mucsâc badomahame honezepac i! 2 Iŋuc honerâ mupo: “Go wena rakomec?” Eme eki ʒiŋuc nazawec: “No Jerusalem haeo mucsâc fârehuc hâŋne â otecnere fuŋne manapemurâ rakopac.” 3 Eme aŋelo nohec dâŋewec e mai fuarâ domaha aŋelo moczi fuacnerâ ʒiŋuc âzâcnewec: 4 “Ajoc, go ŋicmotec erao gasacke rarâ ʒiŋuc âzâcnec: ‘Jerusalem maŋnao ŋic â qowi bocjaha juŋgopieŋte hae i sac tâmiric ŋezejec. 5 Ehame no nahac ʒoc iŋucne sac erâ râreckepemu, erâ ŋondeŋ‐jeŋicko juhuc tatamac‐nanezi batamaec‐jopapemu, Wofuŋte dâŋ iŋuc.’ ”

6 Wofuŋzi ʒiŋuc mukac: “Ajoc, ŋoŋe faic mâreŋkonec risieniŋ, noni hâcne mâreŋ tuturuŋne 4 ira bâtâtiec‐ŋopapo”; Wofuŋte dâŋ iŋuc. 7 Ajoc, Babe mâreŋko juŋgopieŋ ŋoŋe risierâ Zioŋko wareniŋ. 8 Anutu Tâpiri Ɋuŋɋasaŋ Wofuŋ e ŋicne ŋicne jaŋe wiac ŋowac rofârembiŋ jaŋerao sorecnuhuc kecʒiŋuc muwec: “Moc e ba bâuac eŋareocmuzi bunaneo baocmu hâcne. 9 Manaŋgopieŋ, no râsi ejarehuc jopapemu, eme kiŋaŋ qaqafâc‐jeŋic jaŋere meo feniŋmu. Iŋuc fuame ŋoŋe nore ʒiŋuc mana taranʒepieŋ: Anutu Tâpiri Ɋuŋɋasaŋ Wofuŋ eki sorewec. 10 O Zioŋte otâ, go ʒeri bari ec! Manakic, no fârâ gore ŋondeŋko ŋeŋe juju epemu, Wofuŋzi iŋuc mukac. 11 Iŋuc fuame ŋicguru bocjaha jaŋe dameŋ ira Wofuŋ norao qohotahuc ŋicfâc‐nane erâ juhapie no ŋondeŋ‐ŋeŋicko ŋeŋe juju epemu. 12 Eme ŋoŋe porofete nore ʒiŋuc mana taranʒepieŋ, Anutu Tâpiri Ɋuŋɋasaŋ Wofuŋ eki soreme nâŋerao warekac. Eme Wofuŋ e Judaŋic tiri mâreŋ ira fuŋfuŋfâc‐ticne bacjopahuc Jerusalem hae mocwâc bâwosâeocmu.”

13 Wofuŋ e tiri ufuŋ‐ticnaonec faharerâ wahakacte ŋicne ŋicne jaŋe ere maio niniŋke‐fârenʒepieŋ.