1 Findaŋdâŋ moc. Wofuŋzi Israe ŋic jaŋere dâŋ muwec ʒine hâcne. Sambâŋ qaratiewec fokac â mâreŋte hobeteŋne râewec, erâ wâc ŋicmaŋko Mâro ficneme huwec, Wofuŋ eki hâcne dâŋ kecʒiŋuc mukac: 2 “Manakic, no mupe Jerusalem hae i ŋic rârec rârec juŋgopieŋ jaŋere maŋsifuc opâ râqâc ezejec. Eme Jerusalem hae somâckehapie Juda e wâc ʒârâ ʒâpâ faio feocmu. 3 Eme ŋicne ŋicne jaŋe qâturerâ râsi ecneniŋmu dameŋ ira mupe Jerusalem haezi ŋicguru sasawa jaŋerao qânâ ŋemâcne iŋucne ezejec, ehame qânâ i bafahareniŋte eipiehuc jaŋe jaŋacne sipirickeniŋmu. 4 Wofuŋzi ʒiŋuc mukac: No ʒoaŋ ira becâsic sasawa hâhâwic hejarepemu, â becâsicko rara ŋic maŋmutuc bacjopapemu. No ŋic gâcne jaŋere becâsic ʒâŋe tiŋtuŋ bacjopa‐fârehuc Juda kikefuŋ jaŋe ine hone maiŋ ejarepemu. 5 Iŋuc ejarepe Judaŋic gurune gurune jaŋe jaŋaczia ʒiŋuc muniŋmu: ‘Jerusalem kikefuŋ jaŋe Anutu Tâpiri Ɋuŋɋasaŋ Wofuŋ‐jeŋiczi sasanaŋ bâfua‐jareekac.’

6 “No dameŋ ira Judaŋic gurune gurune jaŋe ejarepe ʒocfiki maŋnao ʒocbâruŋ iŋucne â jawa sânʒâŋ ŋondeŋko waha iŋucne enʒepieŋ. Ehuc fâreopec me qanaopec fotikiehuc ŋicguru ŋifec â ŋifec juŋgopieŋ jaŋe ʒâseŋ‐jopa‐fârenʒepieŋ, ehame Jerusalem hae rune jaŋe hae‐jeŋickoa ʒuhuckerâ junʒepieŋ.

7 “Wofuŋzi Juda sanaŋkeocte qanaŋ bafickeocmu, ehame Dawidi kikefuŋ‐ticnere ʒâŋe biŋe â Jerusalem ŋecjucfâc‐ticne jaŋere ʒâŋe biŋezi Judare sâc mi sirickezejec. 8 Wofuŋ e dameŋ ira Jerusalem ŋecjucfâc‐ticne ŋezic‐jopaocmu. Ehame tâpiri tâmiric jueŋgopieŋzi dameŋ ira Dawidire sâc bâfuanʒepieŋ, â Dawidire kikefuŋ jaŋe Wofuŋ Anuture kikefuŋ iŋucne ehuc ŋic micne bajareekac aŋelo e iŋucne enʒepieŋ. 9 No dameŋ ira ŋicne ŋicne Jerusalem râsi ecneeŋgopieŋ jaŋe bâsirowec‐jopa‐fârepemu.

10 “Eme no Dawidire kikefuŋ â Jerusalem ŋecjucfâc‐ticne jaŋerao busâqoc â mu huacbuc irec mâro râepe wahaocmu, eme âke mârâŋkembiŋ erao ʒâŋe fipie rame busâqoc manacneniŋmu, ehuc neŋgoc mamac jaŋe motec‐jeŋic mocjaha me mârâc fufua motec‐jeŋiczi hâmome kio owa eeŋgopieŋ irec sâc kio owa eniŋmu. 11 Dameŋ ira Jerusalem haeo mu mamakuc sâko fuaocmu i Megido wâneŋko Hadarimoŋ haeo fuawec irec sâc. 12 Mâreŋ ira ki mamakuc sâko fuaocmu ine kecʒiŋuc: Garikiŋ sâc jaŋe buc buc makuc baniŋmu. Dawidire garikiŋfâc jaŋe bucjeŋic eniŋmu â ŋonâŋfâc‐jeŋic jaŋe wâc buc jaha eniŋmu. Ehame Nataŋte garikiŋfâc jaŋe bucjeŋic eniŋmu â ŋonâŋfâc‐jeŋic jaŋe wâc buc jaha eniŋmu. 13 Erâ wâc Lewire garikiŋfâc jaŋe bucjeŋic eniŋmu; â ŋonâŋfâc‐jeŋic jaŋe buc jaha eniŋmu; Simeire garikiŋfâc jaŋe bucjeŋic eniŋmu; â ŋonâŋfâc‐jeŋic jaŋe wâc buc jaha eniŋmu. 14 Iŋuc fuame garikiŋ nâfocne juniŋmu jaŋe bucjeŋic efârehapie ŋonâŋfâc‐jeŋic jaŋe wâc buc jaha eniŋmu.