1 Manaŋgopieŋ, Wofuŋte dameŋ moc maickeocmu ira mafa wiac‐ŋeŋic ŋowac rokicne i ŋoŋe honehapie kâdoc qaniŋmu. 2 No ŋicne ŋicne jaŋe Jerusalem râsi ecnehuc ʒika qaniŋte hetumaŋ‐jopapemu. Ehame hae ro rauc ehuc ficko mafa wiac forakac i fiuc rofâreniŋmu, ehuc ŋokac bâsâqorec‐jopaniŋmu. Hae rune gâcne jaŋe kâpâcwâruo bacjopa raniŋmu, â gâcne jaŋe haeoa juniŋmu. 3 Iŋuc fuame Wofuŋzi faharerâ ʒika dameŋko ʒika qawec irec sâc ehuc ŋicguru keci jopaocmu. 4 Erâ ʒoaŋ ira Jerusalem ʒoaŋ wewefunaopec oliwa tiki ŋekac ira âterâ domaocmu; ehame oliwa tikizi ʒoaŋ wewefunaonec fâuckerâ raku ʒoaŋ huhunao tarame ʒâʒâŋiŋko uuruŋ sâko moc fuaocmu, eme tiki ŋifecnezi mâreŋ faicpec rârieocmu â ŋifecnezi mâreŋ juwicpec rârierâ ŋeocmu. 5 Iŋuc fuame tiki‐nanere uuruŋko hurâ wiseniŋmu. Uuruŋ i raku Azela hae ira tarakac. Ŋoŋe Juda ŋicwofuŋ Uʒija juhame homeŋ sâko bame wisembiŋ irec sâc wiseniŋmu hâcne. Ehame Wofuŋ Anutu‐ŋeŋic e tiriŋicfâc‐ticne jaŋehec ware fisiocmu.

6 Dameŋ ira fâroroc me mâmâteŋ me hoe sanaŋ wâc mi fuaocmu. 7 Dameŋ ira ʒoaŋzi qahuc jaha foocmu, hae owâeme ʒoaŋ tatamac jaha foha hae ŋafe furec mocwâc mi eocmu, i Wofuŋte mamanao iŋuc fuaocmu. 8 Dameŋ ira Jerusalem haeonec opâ fofone moc fisihuc foocmu, ehuc opâ fauckerâ moczi ʒoaŋ wewefunaopec hâwec fokac ira rahame moczi ʒoaŋ huhunaopec hâwec fokac ira raocmu. Erâ opâ i ʒoaŋ dameŋko mecne hoe dameŋko mecne rahuc jaha foocmu.

9 Eme Wofuŋ e mâreŋ sâko mâreŋ irec Wofuŋ Sâko erâ juocmu; dameŋ ira e mocjahazi Wofuŋ juocmu, â ere ʒâŋe biŋe mocjahazi ferâ foocmu. 10 Eme Jerusalem hae juwicpec mâreŋ forakac i Geba haeonec fuŋkerâ raku Rimoŋ hae ira mickekac izi wâneŋ sâko fuarâ fofârezejec. Jerusalem haezi ine tiki toŋko jaha ʒuhuckerâ ŋezejec; ine Benjamiŋte motâckonec ware mârâc motâc, tuturuŋte motâc hâcne, ira fisizejec; erâ Hananere fic ʒoricne bafekicne irecnec ware ŋicwofuŋte waiŋ bâpisickeeŋgopieŋko ira tarazejec. 11 Eme Jerusalem haezi sâwec tâmiric ŋeha ŋic ŋokac jaŋe maŋnao wama faio juhâmonʒepieŋ.

12 Jerusalem hae râsi ecneniŋmu ŋic i jaŋere faio Wofuŋzi mume wiac hâhâwicne kecʒiŋuc feocmu: Jaŋe ɋâricne jaha juhapie biuc‐jeŋiczi gâreckezejec, erâ ʒâŋe hândâŋ‐jeŋiczi ŋeŋe‐ticnao jaha ŋehuc fâuckerâ omaeha nameŋ‐jeŋiczi micjeŋickoa fohuc gârecke ʒaŋ ezejec. 13 Dameŋ ira Wofuŋtaonec wiac bipic tataraneheczi fai‐jeŋicko feme jaŋe jaŋackoaŋ rârâsi ehuc qaqac eniŋmu. 14 Eme Juda e wâc mâmâc Jerusalem haemaŋko ʒika bâfuaocmu. Ehuc ŋicne ŋicne rârec rârec juraŋgopieŋ jaŋere moneŋ mafa, gol siliwa erâ ŋaqi wiac bocjaha ro qâzuc efâreniŋmu. 15 Ŋic jaŋerao wiac hâhâwicne fuaocmu sâc ijaha becâsic, doŋgi, kamele â qowifâc‐jeŋic gâcne jaŋerao fuaocmu wâc.

16 Eme ŋicne ŋicne Jerusalem râsi ecnehuc ʒika qambiŋ jaŋeraonec ŋic ʒanʒaŋne juniŋmu jaŋe jarane jarane Jerusalem haeo ferâ Wofuŋ Sâko, Anutu Tâpiri Ɋuŋɋasaŋ Wofuŋ hâcne, e mai ecnehuc hombaŋ sâko ŋehuc junʒepieŋ. 17 Me ŋicguru moc jaŋe ferâ Wofuŋ Sâko, Anutu Tâpiri Ɋuŋɋasaŋ Wofuŋ hâcne, e mai mi ecneniŋmuo jaŋerao hoe mi heocmu. 18 Eme Aigita ŋic jaŋe ferâ Wofuŋ mai mi ecneniŋmuo ine Wofuŋzi ŋicne ŋicne Jerusalem haeo ferâ hombaŋ ŋeniŋte mi ejareha wiac hâhâwicne bâfua‐jareekac irec sâc jaha mume jaŋere faio feocmu. 19 Wiac izi hâcne Aigita ŋic â ŋicne ŋicne hombaŋ sâko mi ŋeniŋmu jaŋere bâbâtiŋ eocmu.

20 Dameŋ ira becâsic jaŋere goŋgoŋko qâreŋ kecʒiŋuc qâreŋkepie foocmu: “Wofuŋte erâ bâtirikicne”. Ehame Wofuŋte ufuŋko kuʒi wiac ŋerakac izi alata maŋfuŋko râqâc ŋerakac irec sâc ezejec. 21 Ehame Jerusalem haeo â Juda mâreŋko kuʒi ŋerakac sâc i bâtiripie Anutu Tâpiri Ɋuŋɋasaŋ Wofuŋ ere biŋ ŋezejec. Eme taha bâzi rikeniŋmu jaŋe fisirâ kuʒi i hâcne rorâ ira bâzire wiac rikenʒepieŋ. Iŋuc fuame Anutu Tâpiri Ɋuŋɋasaŋ Wofuŋ ere ufuŋko âbârâ gie bahuc wiac nareŋ gareŋ ee i mocwâc mi eniŋmu.