HIYBRIW
Hiybriw Biynimb Krays Ker Mindeyak Gok Kuyip Minj Tikyak
Minim Nind Niŋep
Jiwda biynimb gok kuyip nep, yimb bap Hiybriw apay. Minj kun biy, Jiwda biynimb Jiysis nup chiŋgyak gok kuyip, tikyak ak niŋbun ak pen, bi kuyip minj tikip ak aŋgiy, ma niŋbun.
Minj kun biy, Jiysis nup kirgiy, Jiwda giyiŋgipay rek giniŋg geyak niŋiy, kuyip tikiy aŋgyak, “Kanj siypsiyp tap gok pik simboŋgyiŋgipim ak, tap yikop kawnan paŋg niŋiy gipay rek giyiŋgipim; Jiysis chinup nen aŋgiy, likañ nuk key Nop nup simboŋgak ak, tap yomb yimb aŋgyak.”
Minim Ar Keykey Mindip Rek:
Gor Ñinuk biyomb Nop rek nep mindip minim ak mindip, chapta 1:1-3.
Jiysis biyomb, enjol gok sikoy minim ak mindip, chapta 1:4–2:18.
Jiysis biyomb, Mosis yip, Josiwa yip bi sikoy minim ak mindip, 3:1–4:13.
Bi simboŋgep nind mindyiŋgipay gok, woŋg giyak ak yikop rek giyak; Jiysis gak ar ak, tap yomb yimb gak minim ak mindip, chapta 4:14–7:28.
Jiysis bi Gor nup simboŋgep yomb yimb ak, likañ nuk key ak Nop nup simboŋgek mey, Gor “tep” aŋgek, tip ma kumniŋgamb minim ak mindip, chapta 8:1–9:28.
Meymey siypsiyp pik simboŋgyiŋgipay ak, yikop pik simboŋgipay; Jiysis chinup aŋgiy kumak ak, ñin nokom yimb simboŋgek mey, kim amjun rek ayip minim ak mindip, chapta 10:1-39.
Gor nup gosimb niŋon chinup kond mindeniŋgamb aŋgiy, nup nep kond mindpay minim ak mindip, chapta 11:1–12:29.
Yerip gey Gor niŋek tep giniŋgamb minim ak sek, minim aŋg day jiwak ak sek mindip, chapta 13:1-25.
1
Gor Ñinuk Chinup Minim Aŋgñak
1 Gor basind apis ikop kuyip minim aŋgniŋg, bi minim nup aŋgep gok gek, minim nup ar ak wisin niŋiy akaŋ, day niŋiy akaŋ, gos kiyk namb okok niŋiy aŋgñiyiŋgipay. 2-3 Nind kun giy gek, biynimb gok kuyip aŋgñiyiŋgipay ak pen, ñin kisen mindpun biy, Ñinuk ak key yokek apiy, chinup minim aŋgñak. Pen Ñinuk nuk key ma mindip: Nop mindip rek nep mindip. Nuk kunep Gor ak mey, chinup sup melik puŋgyomimb. Nop aŋgek, Ñinuk miñmon tap okok maŋgiysek alwol gayek mey, miñiy maŋgiysek kond mindip. Nuk nep minim aŋgek, miñmon tap okok timey ma gip, mindep nep mindip. Tap siy tap timey gach chinup ak nep aŋgiy, kumiy tip ak tikjakiy, am Nop ñin yipund kind okok ken mindiy, woŋg jimñiy gipiyr.
Enjol Gok Kayaŋ Rek Mindpay; Jiysis Mey Biyomb Yimb Mindip
4 Nuk enjol gok rek mer: nup Gor Ñinuk apay rek, nuk Biyomb yimb. Yimb nuk yiy ar biyoŋ mindip. 5 Gor enjol nuk gok kuyip, bap minim aŋgiy apkop, “Miñiy nup dipiyn ak, yip ‘Nop nuk;’ yand nup ‘Ñiyand’ aŋgiy” ma aŋgak. Akaŋ pen: “Yip ‘Nap nak;’ yand nip ‘Ñiyand’ aŋgiy,” ma aŋgak. Ñinuk nup nep, minim kun ak rek aŋgak.
6 Pen Ñinuk key yimb ak, mankumb biy yokniŋg, enjol gok yimb nup dand araniŋgiy aŋgak. 7 Pen enjol gok kuyip, minim ak aŋgiy aŋgak, “Enjol nuk gok gek, key yimb mindiy, yiŋgen rek diy opay aŋgak.” 8 Pen Ñinuk nup minim ak aŋgiy aŋgak:
“Gor. Nand kiyŋ gunap monmon gipay rek ma giniŋgamban; suŋ-tep mindiy, biynimb gok perper kond mindeniŋgamban. 9 Mindrep gipay ak nip tep gip, pen mindrep ma gipay ak nip tep ma gip. Kun ak nip aŋgen, Biyomb key yimb mindpan. Kun ak buŋgiy nand gok, beŋ nip okok mindpay; nand mey Biyomb yimb mindpan aŋgak.”
10 Minim gunap sek aŋgiy aŋgak, “Nand Biyomb wosrey kondoŋ okok mindiy,
mankumb biy sek, semb biyoŋ sek alwol gaynak.
11-12 Tap kun gok mindiy, kurginiŋgamb rek ayip ak pen;
nand mindnep mindeniŋgamban.
Tap kun gok, chech wor ay yapek,
tuŋgasik key siŋak ay,
kisenimb aypay rek giniŋgamb ak pen;
nand Biyomb chin ak, kun ak rek ma giniŋgamban.
Nak mindpan rek nep mindeniŋgamban aŋgak.”
13 Pen Ñinuk nup minim bap sek aŋgak:
“Nand ñin yipund kind yand akniy bisiŋg mindey, tap yerip yerip nip miluk niŋbay gok maŋgiysek, talak miŋgan nip okok ayniŋgayn aŋgak.”
Pen enjol gok kuyip, Ñinuk nup aŋgak kun ak rek, ma yimb aŋgak. 14 Kun ak enjol gok yerip rek mindpay? Kiyk Gor nup woŋg giñemb gok mindyiŋg, biynimb nuk perper mindeniŋgambay aŋgiy niŋimb gok kuyip, kond mindpay.