Yisasife Kanale Ke
Maki
Kaemalenea Ke
1
Ti faleneꞋamatea YoniꞋa mono ke huhaleno humaine.
Yisasi KalaisiꞋa Anumaya Kotina neꞋamofena kanale kea mage huno aepa hie. Anumaya Koti aune kanoa AisaiyaꞋa mage huno kaemaleneane
Anumaya KotiꞋa mage huno hie “Haviho ke hamapaisia kanoꞋnia Yisasi aulega hagoteꞋna hutesugeno kana valino hilato hugahie. KaꞋme kotegati nago kanomoꞋa keha keha huno mage hugahie “Anumayamo esia kana ali hilato hutama fatago hiho.” huno humaineane.
YoniꞋa ti faleneꞋamatea kanoa evaꞋyi huno kaꞋme kotega maineno mage huno hie “Tamakaya tamakuꞋa aiyahae hutama kefo yatamia ‘NagoꞋene ohugahune.’ hutama ataletesageꞋna tina falelamatesugeno Anumaya KotiꞋa kefo yatamia aigetamateno atalelamategahie.” huno humaine. Ani yupa Yelusalemu veaꞋene Yutia kotega veaꞋene Yoni mainelega umaineꞋya kefo yaꞋamihena hufalote hageno YoniꞋa Yotani lipi tina falematene.
YoniꞋa kemolu afumo ayolagefaleti kenaꞋa fakaꞋnino failineno amuꞋnofila pulamakamo augafaleti ayetalako huno kilineno kaveꞋa kenuꞋene tumemo timaꞋaene neneane. Mage huno hamapaiye “Nakavela nago kanoa ago egahie. Ani kanoa tusiꞋa tokiya yamaꞋa hanea kanogino nagaila ago nagaseno maigeꞋna nagaya afa kano mainoanagiꞋna agai aiyale ayesuana onategahie. Nagaya titeti falenelamatoanagino ani kanomoꞋa Anumaya Kotina Alu Aotage AvamuꞋaleti falelamategahie.” huno hie.
YoniꞋa Yisasina ti faletene.
Ani kanafina YisasiꞋa Kalili kotega hanea kumala Nasaleti kumateti egeno YoniꞋa Yisasina Yotani lipi tina faletene. 10 Tina faleneꞋategeno YisasiꞋa tipinagati aivati huno aupaꞋa ageana ikamoꞋa aihagalo higeno Anumaya Koti Alu Aotage AvamuꞋmoꞋa nama kana huno agaitega elavimaine. 11 Elavigeno ikapinagati nagola agea aino mage huno hie “Kagaya nagaiꞋni nafaꞋnemoga kagaifena aluya huno nahau nayamopafi nenagea neꞋnimoga kagaifena aluya huꞋna musekaꞋa nehue.” huno hie.
SataniꞋa Yisasina ayevataga humaine.
12 Anumaya Kotina Alu Aotage AvamuꞋamoꞋa Yisasina veaꞋne omai kaꞋme kotega anatino umaine. 13 Umainegeno SataniꞋa* Yisasife “Havi kava huo.” huno ayevataga higeno fotiꞋa (40) yupa YisasiꞋa ani kotega afela afuyagaene mainegeꞋya ensole anagaꞋmoꞋya meya huꞋya kava hutenae.
YisasiꞋa aepa heno aliꞋyamaꞋa alimaine.
14 Yonina nofi hutenageno YisasiꞋa Kalili kotega Anumaya Koti kanale kea mo hamapaiye. 15 YisasiꞋa mage huno hie “Anumayamo malenea kanamoꞋa ago evaꞋyi humainegi Anumaya Koti yagailamatesia kanamoꞋa aupaꞋa evaꞋyi hisia yafe tamakaya tamakuꞋa aiyahae hutama kefo yatamia ataletetama nagaifena kanale kea humainea kemoꞋa ‘Tamage humaine.’ hutama tamakupi maletama tamametitia hiho.” huno humaine.
YisasiꞋa foꞋa (4) vaya ke higeꞋya agai akave umainae.
16 YisasiꞋa Kalili ti kotumo agegayalega neꞋuno Saimonina aganaꞋamoꞋene EtaluꞋene anakeana noyame kuꞋya nehaꞋa kanolana maineꞋana ala kukonogo ti kotupi hagaꞋyu huꞋana nemalaꞋe. 17 YisasiꞋa mage huno hanapaiye “Nakave eꞋo. Nakave esaꞋageꞋna noyame kuꞋyama haꞋa kava huꞋna vaya kuꞋya hulanategahue.” huno hie. 18 HigeꞋana aupaꞋa kukonogoꞋania neꞋataleꞋana Yisasi akave umainaꞋe.
19 VaꞋageno YisasiꞋa nagoꞋene neꞋuno Sepetina netalamaꞋamogania YemesiꞋene YoniꞋene tipi kalefi maineꞋana kukonogo nefakaꞋniꞋageno YisasiꞋa monake. 20 Anaketeno YisasiꞋa ke higeꞋana Sepetia neꞋanafaꞋene aliꞋya vayaꞋaene tipi kalefiti neꞋamataleꞋana Yisasina akave vaꞋe.
Nago kanomo aguꞋafiti YisasiꞋa Kefo Avamula anatitalene.
21 Kapaneamu kumate taviteꞋya YisasiꞋa Sapati yupa mono nopi haino Anumaya Koti ke humavelie. 22 HumaveligenoꞋa agai kemoꞋa toꞋkiya yamaꞋa hanea kanomo ke kana hia yafena tusiꞋa amamaꞋyo aigeꞋya mage hae “NagoꞋa kahegi kema havilinaya anagaꞋmoꞋya nehaya avamete ke nehie.” huꞋya hae.
23 Anile nago kanoa Kefo AvamuꞋmoꞋa aguꞋafi falemainea kanoa mono nopi emaine. 24 Emaineno ala kenake huno mage hie “Avo Yisasigae Nasaleti kumate nafaꞋnemoga naꞋa hulategane? Tagaila tahaeka falilategahe emainano? Nagaya kagaifena ago havimainoe kagaya alu aotage kanoa Anumaya Koti hugatenea kano mainane.” huno hie. 25 Higeno YisasiꞋa Kefo Avamufena tokiyaꞋage ke huno mage hie “Kea ohuka maiyo. Mani kanoa ataleka agusafinagati vuo.” huno hutene. 26 Higeno ani Kefo AvamuꞋmoꞋa moyege meyege huteteno kasageke hia kava huteteno alakenake huno agusafiti ataleno hatilavimaine. 27 VigeꞋya mukiꞋa vayala amamaꞋyo aigeꞋya huge havige huꞋya mage hae “Na kava nehie? Na augafa haekafa ke nehie? TusiꞋa toꞋkiyaleti anumayaꞋage ke higeꞋya Kefo AvamuꞋmoꞋya agai kea ali hipoꞋya huꞋya hatilaviꞋya vae.” huꞋya hae. 28 Hageno YisasiꞋma humainea avagemoꞋa mukiꞋa Kalili kotega ute ete higeꞋya mukiꞋa veaꞋmoꞋya havimainae.
YisasiꞋa Pitana aꞋamona itaꞋamo alekanoa kaliꞋa alino kanale hutene.
29 YisasiꞋa YemesiꞋene YoniꞋene mono nona ataleꞋya anileti Saimonigani Etalugani nopinaga umainae. 30 Umainageno Saimonina aꞋamona itaꞋamo alekanoa amukonako kali neꞋaligeno YisasiꞋa uvaꞋyi higeꞋya aupaꞋa ani alekanohe Yisasina hapaimainae. 31 Hapaigeno YisasiꞋa agaite eno ayate alino hetitegeno amukonako kaliꞋamoꞋa agola kanale hutegeno kavela kaeno amamine.
YisasiꞋa mukiꞋa kali veala alino kanale humatene.
32 Unena yagea tavifalegahe higeꞋya veaꞋmoꞋya kasagoꞋya kali veaꞋnea Kefo AvamuꞋmoꞋya amakuꞋafima ali haviya nehia veaꞋnea Yisasite amavaleꞋya emainae. 33 MukiꞋa ani kumate veala fiate elitalu humainae. 34 YisasiꞋa havigu havagu kali neꞋaliya veaꞋnene ali hilato humateno mukiꞋa Kefo AvamuꞋmola amakuꞋafiti amanatitalegeꞋya Kefo AvamuꞋmoꞋya Yisasina agoꞋma agemainaya yafe YisasiꞋa mage huno hamapaiye “Mani yafena kea ohiho.” huno hamapaiye.
YisasiꞋa Kalili kotega aliꞋya alino vaiyemaine.
35 Natena tani kotigeno YisasiꞋa hetino ani nona ataleno vaya omai kotega umaineno nunamuna humaine. 36-37 UmainegeꞋya SaimoniꞋene nagoꞋa anagaꞋamoꞋyaene agaife aiyaka maeꞋya agaitega uꞋya mage huꞋya mo hae “MukiꞋa veaꞋmoꞋya kagaifena katineꞋayae.” huꞋya hapaiye. 38 Hapaigeno YisasiꞋa mage huno hamapaiye. “Alu kumate kumate vigetao nagaya mono kea mo hamapaigahue. Mono kema hamapaisua yafe nagaya emainoe.” huno hamapaiye. 39 MukiꞋa Kalili kotega viaꞋyamo mono nopi Anumaya Koti kea hamapaino Kefo Avamula veaꞋmogami amakuꞋafiti amanatitalene.
YisasiꞋa fugita kano alino kanale hutene.
40 Nagola fugitayamo augafa alino haꞋyagino atalako humainea kanomoꞋa Yisasite mepe huno mage huno hapaiye “Kahaisigekasina nagaila ago ali hilato hunatateꞋasine.” huno humaine. 41-42 Higeno YisasiꞋa kalagi aiteteno ayana haꞋyo huno augafale avate nehuno mage huno hie “NahaigeꞋna kaugafamoꞋa menia kanale hino huꞋna nehue.” huno higeno anile aupaꞋa kaliꞋamoꞋa haꞋno hutene. 43-44 HaꞋno hutetegeno YisasiꞋa mage huno hapaiye “AupaꞋa visanaꞋamoga ali hilato hugatoa yafena nago kanoa haꞋopaika mono nopi kava kanomote uka mukiꞋa veala kalikaꞋama aliꞋna kanale hugatoa kema havinuꞋyahena mono nopi kava kanomoꞋa kaugafa kamota huno kagetesigeka kaugafama ali kanale hugatoa yafena MoseseꞋa ‘Ma yama Anumaya Kotina amio.’ huno humainea yana Anumaya Kotina momio.” huno toꞋkiyaꞋage ke hapaiye. 45 Hapaiyanagi ani kanomoꞋa viaꞋamo kanaleꞋma hutea avagea alu kumate kumate hamapaigeꞋya kasagoꞋya veaꞋne haviteꞋya “Kalitia alino kanale hulatesie.” huꞋya Yisasite emainae. Aya yafe YisasiꞋa fufuꞋyate visia kana omalegeno amataleno vaya omai kotega umainegeꞋya alu kumateti kumateti veala Yisasite emainae.