1 Sala malongbyatak kan cha ilimusyu si laluɏatanyu kan sakon. Mipanggop si as-asawa, lu achipun mangasawa osaʼn tagu, ustu mit. 2 Ngim gapu ta achu lakabyasuɏ un pin-a makaob-obog si chakampun un asawacha, un-ulloy lu kacha osaʼn leɏaki ya byebyai awed asawala taplu lappun maawisanyu un makabyasuɏan. 3 Ked ha leɏaki un langasawa, masapuɏʼn ipiyeɏla long-eglaʼn ustu-ustu si asawala. Ulay bo asawalaʼn byebyai, masapuɏ boʼn ipiyeɏla long-eglaʼn ustu-ustu si asawala, taplu lagalaschaʼn man-asawa. 4 Ti ha byebyai un langasawa, chakampun un siya singkuwa si long-egla gapu ta uwan chi asawala. Ya isula bo si leɏaki, chakampun bo un siya singkuwa si long-egla ti uwan bo chi asawala.

5 Ked chikayuʼn man-as-asawa, achipun makwa un iyachiyu long-egyu si asawayu, lalaksig lu lantuɏagenyu si malluwaluwanyu. Ked lu magamput chi eɏgew un lantuɏagenyu, ituɏuyyu bo kachawiyanyuʼn man-asawa taplu achipun kayu masulisug kan Satalas un mangwa si byasuɏ. 6 Ha mangibyeg-ak si alla ta ammuwonyu un ipalubusku mangasawa, ngim chakampun un bilin. 7 Ti piok otyan lu makwa un tuɏachonyu sakon un achipun mangasawa. Ngim ammuk un chakampun un man-iisu taku, ti langkangkalasi kabyeeɏan taku un illidchon Apudyus.

8 Chikayuʼn chaampun mangasawa ya labyaɏu. Un-ulloy chi achi kayu mangas-asawa un isuk. 9 Ngim lu achipun kayu makaiyattom, mangasawa kayu. Ti un-ulloy chi mangasawa kayu lu maligligatan kayu un mangiyaattom si pion chi long-egyu.

10 Chikayuʼn langasawa, alla bilinku kan chikayu ngim chakampun si somsomokku lampeɏpuwala ti si Apu Jesus. Ha byebyai achipun makwa un ichangala asawala.*7:10 Ha imbilin Jesus un awed si Matthew 5:31-32, Mark 10:2-12, Luke 16:18 11 Ngim lu makaichang, masapuɏʼn achipun kasin mangasawa willu mangulin kan asawala. Ked isula bo si leɏaki, masapuɏʼn achipunla bo ichangan chi asawala.

12-13 Chikayu boʼn langasawa un chaampun mamati asawayu, alliya ibyegak kan chikayu chakampun un bilin Apu Jesus ti leɏpu si uwak un somsomok. Ulay achipun lamati asawan chi osa, lu piolaʼn mikabyeɏoy kan siya, masapuɏʼn achipunla ichangan. 14 Ked ulay achipun lamati leɏakiʼn asawan chi osa, ibilang Apudyus siya un lapapeɏkas gapu si pammatin asawala. Lu chakampun un katchi, ha aalakcha, isucha cha aalak cha achipun mamati. Ngim ha katuttuwaan, imbilang bo Apudyus chicha si sala un aalak cha mamati.

15 Ngim lu awatlaʼn pion cha achipun mamati un ichangan chi asawachaʼn mamati, makwa. Ked siyad mibilang un lawaya ha mamati un asawala. Kamatchi makwa ti pion Apudyus un mallin-awa taku si allaʼn mataguwan taku. 16 Ti chikayuʼn mamati, ma in-ilonyun mangammu lu matagu asawayuʼn achipun mamati, ulay lu achipun chikayu ichangan.

17 Kacha osaʼn mamati, masapuɏ otyan un ituɏuyla kilasasaedla si lamatiyala, ti hachi illidchon Apu Jesus kan siya. Kamatchi bo ibilinku kan cha losan un mamati un pin-a manchetchetong si kaili-ili. 18 Lu awatlaʼn lasogyatan chi osaʼn leɏaki si langayagen Apudyus kan siya, chakampun un masapuɏʼn singtola makaalan chi sogyatla. Ked lu achipun lasogyatan si langayagen Apudyus, chakampun bo un masapuɏʼn mampasogyat. 19 Ti intalu, ulay lasogyatan willu achipun, ti chakampun si hachi lapotog. Ti siyad lapotog chi tumuttuwaan taku si bilin Apudyus. 20 Ked ulay lu silu kilasasaed chi osaʼn tagu si langayagen Apudyus, chakampun un masapuɏʼn obsola si sala. 21 Ked lu awatlaʼn musassuka si langayagen Apudyus kan sika, intalu lu ituɏutuɏuyluʼn mammusassu. Ngim lu mipalubus chi mawayaam si kilamusassum, ustu mit lu makwa. 22 Ti ha musassu si langayagen chi Apu, ked mambyalin lawaya un tagula. Isula bo si taguʼn lawaya si langayagen Kristu, mambyalin siya musassun Kristu. 23 Amod chi lambyayed Kristu kan chikayu, ked chakampun otyan un mambyalin kayu musassun cha tagu. 24 Ked susulud, lu silu kilasasaedyu si langayagen Apudyus kan chikayu un mamati, ituɏutuɏuyyu un tumitimpuyug kan Apudyus.

25 Lu mipanggop kan cha allaʼn chaampun mangasawa, lappun ibilinku kan chikayu un lampeɏpu kan Apu Jesus, ngim gapu si kachegula kan sakon makwaʼn mantegochak un mangibyega si kasomsomkak. 26 Ha somsomokku, gapu kan cha ligat si salaʼn timpu un-ulloy lu sissiya kayu si kasasaedyu. 27 Ngim chikayu un lilaus langasawa, achiyu ichangan chi asawayu. Ngim chikayu un chaampun mangasawa, un-ulloy chi achi kayu mansingit si asaw-onyu. 28 Ngim lu mangasawa kayu, chakampun si makabyasuɏ kayu. Chakampun si makabyasuɏ byebyeɏasang lu mangasawa. Ngim ibyegak un un-ulloy lu achi kayu mangasawa, ti piok un milisi kayu si achu un ligligat si allaʼn biyeg un laklak-amon cha man-asawa.

29 Susulud, ha piok un ibyega, chakampun un mabyeyeg chi inggewan taku si allaʼn pita. Ked chikayuʼn leɏaki un alla asawala, ipapatiyu otyan un mansimbi kan Apudyus un isun chi lappun asawala. 30 Ked chikayu un malomchom isun otyan chi achipun kayu malomchom ya chikayu un lagalas isun otyan bo chi achipun kayu manggalagalas. Ya ulay bo chikayuʼn mangngila un awed cha kukkuwala, ilanyu ta chakampun otya un ha lingin-anyu sosomkonyu. 31 Ya ulay silu kilasasaedyu willu biyangyu si allaʼn pita si sala, byebyeanyu cha hachi ti achipun mabyeyeg ked gumatong chi alungus cha losan.

32 Ha piok lappun otyan manchanchalagenyu. Ha leɏakiʼn lappun asawala, lawaya un mangwa si losan un mampagalas kan Apudyus, ti lappun uchum si somsomsomkola. 33 Ngim ha leɏaki un alla asawala, lappun uchum si somsomsomkola lu achi mipanggop si mataguwan si allaʼn pita ya gumalasan asawala, 34 ked isun chi lagodwa somsomokla. Ked ulay bo byebyai un lappun asawala, lappun uchum si somsomkola lu achi mansimbi kan Apu Jesus, ti siyad piola ichatunla losan un long-egla ya somsomokla kan Apudyus. Ngim ha byebyai un alla asawala, achu somsomkola mipanggop si mataguwala si allaʼn pita ya gumalasan asawala. 35 Ha mangibyeg-ak si alla, chakampun si ipalitku un mangasawa kayu, ngim abus chi bumaɏuwanyu otyan. Piok un ustu-ustu cha koonyu ya lawaya kayu un mansimbi kan Apudyus un lappun malaktak kan chikayu.

36 Ngim lu mipanggop kan cha lantuɏeg un man-asawa, ked gapu kan cha ligat si allaʼn pita simsimmokcha un olatoncha, ustu mit. Ngim lu achipuncha makaiyattom si long-egcha, ked kasincha somsomkon un man-asawacha, chakampun un byasuɏ lu man-asawacha. 37 Ngim lu awed leɏakiʼn lakatuɏeg un mangasawa, ngim makwalaʼn miyattom chi liklala un lappun mangipalit kan siya ked simsimmokla un achipun masapuɏ un mangasawa, un-ulloy chi kamatchi. 38 Bibiɏu mangasawa, ngim un-ulloy chi achipun.†7:38 Cha uchum un Greek un ugud si 36-38 ked lappun ossaan un piolaʼn uguchon. Ha uchum ibyegacha un ha allaʼn bersikulu ked mipanggop si bumaru ya bumalasang un liyabyeyan kan siya.

39 Ha byebyai un alla asawala, achipun makwa un ichangala asawala ked kasin mangasawa. Ngim lu matoy chi asawala, makwa un kasin mangasawa si piola, ngim masapuɏʼn siyad asaw-ola mamati kan Apu Jesus. 40 Ngim ha somsomokku, un-ulloy chi achipun kasin mangasawa. Ammuk un mitimbuɏuy chi somsomokku si Ispiritun Apudyus.