1 Susulud, piok un somsomkonyu cha lakwa kan cha hachiʼn aappu taku si awi si langipuyutan Moses kan chicha. Si hachi, tilalikchungan chi libuu chicha un siya inyalan Apudyus un mangipuyut kan chicha si ayancha. Ked mallin-awacha si lalidchaɏalancha si gawan chi kalanchaʼn Mancheɏaeg un Byeybyey.*10:1 Exodus 13:21-22, 14:21-29 2 Ked cha hachiʼn aappu taku, isucha labunyagen si hachiʼn libuu ya hachiʼn byeybyey ti tummuttuwacha kan Moses. 3 Ya losancha pin-a killan chi tilapay un illodcheg Apudyus, un kalanchaʼn manna,†10:3 Exodus 16:35 4 ya ililumcha bo hachiʼn chelum un pileɏoswan Apudyus si byetu.‡10:4 Exodus 17:6; Numbers 20:11 Ha miyaligen chi byetu, si Kristu un illiinggew kan chicha si losan un ummoyancha. 5 Ngim ulay lu katchi, achipun las-om si Apudyus kan cha kaachuwan kan chicha. Ked chilusala chicha, ot hachi langkakatoyancha si lugeɏ un lappun ummili.§10:5 Numbers 14:29-30

6 Ked cha hachiʼn losan un laklakwa, siya man-achaɏan taku otyan ta achipun taku maawis un mangwa si lawwing un isun cha aappu taku si awi,*10:6 Numbers 11:4 7 ya achi taku manchaychayaw kan cha silan-apudyus un isun cha killingwan cha uchum kan chicha. Ti ha liigili un killingwacha, kalala, “Ummaammuy cha taguʼn langa-langan ya ummilu-ilum si hachiʼn inyatangcha si silan-apudyus, ya lalagsaglicha bo.”†10:7 Exodus 32:6 8 Achipun taku otyan makaob-obog kan cha chakampun un asawa taku un isun cha killingwan cha uchum kan chicha. Ti si langwaan cha uchum si kamatchi, latoy cha chuwampuɏu ya tiɏullibuʼn tagu si ossaan un eɏgew. 9 Ked achipun taku mangin-in-an si Apudyus, un isun cha killingwan cha uchum kan chicha ot kintob cha uɏog chicha ot latoycha.‡10:9 Numbers 21:4-6 10 Ya achipun taku otyan umingu-inguk, un isun cha killingwan cha uchum kan chicha, ot pilatoy chi anghel chicha.§10:10 Numbers 16:31-50

11 Lakwa losan cha kamatchi ta mansampaɏan taku, ked liigilicha bo ta man-achaɏan takuʼn matattagu si sala, ti allà akit un alungus cha losan. 12 Ked losan un mangibyegaʼn lapigsa pammatila, masapuɏʼn man-alled ta achi makabyasuɏ. 13 Ked maawatanyu otyan un losan un masulisugen makabyasuɏan, gagangayla un mipachas cha losan un tagu. Ngim mantegochen si Apudyus, ked ingkarilaʼn achipunla ipalubus un masulisug taku si achipun taku makaya. Lu masulisug taku, siya mangidchela si kilakoscheɏ taku un mangiyattom ta awed in-ilon taku un mangilisi si sallut Satalas.

14 Ked susulud un ay-ayatok, man-awichenyu palagchaychayaw si silan-apudyus. 15 Ammuk un laangsan kayu, ked somsomkonyu otyan cha allayaʼn ibyegak. 16 Somsomkon taku cha alla, lu makakan taku si tilapay un Mammammokan kan Apu Jesu Kristu, losan taku manyaman kan Apudyus, milak-am taku si binchisyun ked lu makailum taku si byeyas un siya mitimbuɏuyan taku si libukbukan chi chaɏan Jesu Kristu ked siya machuɏsan cha byasuɏ taku. Ked hachi boʼn makan un pilakalong-egla, lu lapispis-ig ya lakakan taku, hachi bo mangibyega un lipati taku si latoyala si krus. 17 Gapu ta os-ossaan chi tilapay un si Jesus, ked ulay lu achu taku, isu taku os-ossaan un long-eg mipagapu si os-ossaan un kalon taku.

18 Somsomkonyu cha Israelitas. Lu makakancha si hachi un lichatun kan Apudyus, siya mangipaila un mipaticha bo lakachaychayaw kan siya. 19 Himma piok un ibyega, ha latattagu kamma silan-apudyus un chaychayawoncha, ya awed kamman lansabyaliyan cha liyatang kan chicha ya uchum un makan? 20 Lappun, ngim tuttuwaʼn cha iyat-atang cha achipun mamati kan cha silan-apudyus, chakampun kan Apudyus chi mangichatulancha ngim cha aɏan. Ked issak un makatimpuyug kayu si aɏan. 21 Ti achipun makwa un makakan kayu ya makailum kayu si hachiʼn Mammammokan si latoyan Apu Jesus lu makakan kayu ya makailum kayu bo kan cha manchayaw si aɏan. 22 Ha mangwa kayu si mangimulan Apudyus? Ya lakoskoscheɏ kayu kamman lu siya?

23 Lu awatlaʼn awed cha mangibyega un, “Lawayaak un mangwa si byaɏanglaʼn piok.” Tuttuwaʼn lawayaan taku, ngim achipun michaɏan cha losan un koon taku si bumaɏuwan taku ya achipun bo mampakoscheɏ si pammatin cha kadwa taku. 24 Ked ha koon taku otyan, kacha osa somsomkola bumaɏuwan cha bubuɏunla un chakampun un abus chi bumaɏuwan chi long-egla.*10:24 Itullongyu Philippians 2:4

25 Makwa un kalonyu cha losan un mangin-an un ischa si mekit un lappun im-imus, ta achi maallilaw cha somsomokyu. 26 Ti kalan chi ugud Apudyus, “Cha losan un awed utla pita, uwan Apudyus ti killingwala.”†10:26 Psalm 24:1

27 Lu ayagen chikayu kan cha achipun mamati un makakan kan chicha, ingkayu lu pionyu, ked losan un ichuslugcha, kalonyu un lappun im-imus lu liiyatang willu achipun, ta bibiɏu mangalanyu. 28-29 Ngim lu awatlaʼn awed mangibyega un liiyatang chi hachiʼn kalonyu, achiyu kalon gapu kan siya, ti ha awed si somsomokla byasuɏ. Ti himma simbila lu ipatutlu chi wayawayam un mangan ked ha somsomok chi kadwam byasuɏ? 30 Ti lu manyamalak kan Apudyus pakgey machillaw si mangalak kan cha losan un iyamanku?

31 Ngim ha ibyegak kan chikayu, cha losan un koonyu, koonyu si michayawan Apudyus, ulay chi mangalanyu ya umilumanyu. 32 Ya an-allechenyu ta achiyu koon cha maasusuwan cha uchum, ulay Judio willu Gentil, ya ulay bo cha losan un susulud taku un mamati kan Apudyus. 33 Ti katchi pin-ak koon, un cha losan un kook, piok un maay-ayu cha losan un tagu. Ked chakampun un bumaɏuwak chi somsomkok ti siyad singtok cha bumaɏuwan cha losan taplu matagucha otyan.