1 Ulay lu awatlaʼn awed kabyeeɏak un man-ugud si ulay siluʼn ugud chi tagu ya ulay bo ugud cha angheles, ngim lu lappun ayatku si asintataguk, lappun simbin cha pin-ak ug-ugguchon ti isuk chi gangsa un kangkangkangoncha willu uchum un kumangkalingking chi gingala. 2 Ked ulay lu kabyeeɏak un mangibyegbyega si ugud Apudyus willu maawatak cha losan un somsomok Apudyus, ya ulay lu mangkoscheɏ pammatik un makwak un iyatun chi bilig si luwaluk, ngim lu lappun ayatku, lappun simsimbik. 3 Ked ulay lu idchok losan cha kukkuwak kan cha kapus, ya mangkatoyak un mangipapatiʼn mitun-ud kan Apudyus, ngim lu lappun ayatku, lappun magalebku.

4 Ha taguʼn awed chi tuttuwaʼn ayatla si asintatagula, ked laalus ya lasayakaw. Achipun maapos ya achipun mamaspasweɏ. 5 Achipun latangsit willu achipun lakillot. Achipunla ipatut chi bumaɏuwala abus. Ya chakampun bo un mallasu sumangaala. Ya chakampun un sosomkola lawwing un killingwacha kan siya. 6 Ked mansigeb chi somsomokla lu awed itullongla un mangwa si lawwing, ngim maganggalasan si katuttuwaan. 7 Ha taguʼn ustu ayatla si asintatagula, maalusala cha losan un makwa kan siya, ya mamati si losan ya lamlamaola bo un ustu koola, ya maattomala losan un malligatala.

8 Lappun kiged chi ayat. Ngim cha losan un kabyeeɏan un idchon Apudyus si tagu, awed chi mangkigachela. Isun chi kabyeeɏan un mangibyega si losan un ipakaammun Apudyus, mangkiged cha hachi. Ked ha kabyeeɏan un man-ugud si sabyalin ugud, mangkiged bo cha katchi, ti chakampun un pappasig masapuɏ. Ya ulay bo kilalaing, mangkiged bo. 9 Ti kuɏang chi kilalaing taku si sala ya ulay bo kabyeeɏan taku un mangipakaammu si ugud Apudyus. 10 Ngim lu gumatong chi wechewechela kan chitaku un lappun kuɏangla, makaan losan cha kabyeeɏan. 11 Iyaligku kabyen-ogku, ti si kabyen-ogku, ilaalak cha man-uugudku ya mansosomsomokku ya ulay bo mangwaak kan cha losan un makwa. Ngim si salaʼn chummakeɏak, kilaanku losan cha ilaalak un ugalik. 12 Ha osa boʼn aligla, chakampun un patunged lalaweg chi man-aawat taku si sala, ti isun chi mallagechawalan si man-uuɏabun lagechawan un achipun patunged maimatulan. Ngim si umaliʼn eɏgew un mansagung taku kan Apu Jesus, patunged lalaweg chi mangitullongan taku kan siya. Ked si sala, akit cha ammu taku, ngim si umaliʼn eɏgew, achu cha maagammuwan taku, un ha miyisuwala, isun chi kilalaweg chi mantutullong Apudyus kan chitaku.

13 Ked abus cha tiɏuʼn mallalayun iinggew kan chitaku. Ha umula, siya pammati taku kan Apudyus, ked ha mikadwa, ha lamlama taku mipagapu kan Jesu Kristu. Ked ha mikatlu, ayat un siya kapopotgen kan chicha losan.