1 Gapu ta lapaligatan si Kristu si long-egla, lakasagala kayu otyan un malligat un isula. Ti lu mapaligatan chi long-eg, iyageylaʼn mangwa si byasuɏ.*4:1 Ha uchum un piolaʼn uguchon si Greek gapu ta lanligat si Kristu utla pita, isagalayu somsomokyu un mipati makaligat. Ti ha taguʼn lapaligatan, lagamputla inyagey un makabyasuɏ. Romans 6:1-11; Colossians 2:12, 3:3 2 Ked malipud si sala inggala si matoyanyu, masapuɏʼn paituray kayu si pion Apudyus, chakampun un ha sigud un pipion chi long-eg un lawwing. 3 Masapuɏ un achipunyu koon cha pin-ayu killingwa si sin-eɏgew un pipion cha Gentil un koon. Isun chi makachegchegas, sigud un pipion chi long-eg, kabubuuk, mallukuluku, leɏabos un ganggalas, ya kabibiin un malayawan si silan-apudyus. 4 Ngim si sala, mataegcha ti inyageyyuʼn pin-a makakopya kan chicha si leɏabos un lawwing un kokkooncha. Ked hachi man-uguchencha si lawwing kan chikayu. 5 Ngim songbyatancha kan Apudyus un lakasagala un manguis kan cha latattagu ya cha latoy. 6 Ked hachi mibyegbyeg-an chi bibiɏuʼn chameg ulay kan cha latoy, taplu makuischa un isun cha losan un tagu. Ngim libyegbyega kan chicha chi bibiɏuʼn chameg taplu makatagucha si laispirituan un isun Apudyus.

7 Allà akit chi alungus cha losan ked masapuɏʼn mansomsomok kayuʼn ustu ya tingngeɏonyu long-egyu ta lappun malaktak si malluwaluwanyu. 8 Ked ha kapopotgen, masapuɏʼn man-asiayat kayu, ti ha ayat pulasala cha amod un byasbyasuɏ.†4:8 Proverbs 10:12 9 Ya mallaay kayu otyan un mammangili ya achi kayu uminguk. 10 Usaɏon otyan chi kacha osa chi illidchon Apudyus un kabyeeɏala un mansimbi si bumaɏuwan cha bubuɏunla, isun chi osaʼn bibiɏuʼn man-ayyuwan kan cha lakalakalasi un binchisyun un illidchon Apudyus. 11 Ked ha laidchen si kabyeeɏan un mambyegbyega, masapuɏʼn ibyegbyegala ugud Apudyus. Ked ha laidchen bo si kabyeeɏan un mansimbi, masapuɏ un mansimbi si kiged chi kabyeeɏala un illidchon Apudyus. Kamatchi makwa, ta cha losan un makwa, maichaychayaw si Apudyus gapu kan Jesu Kristu. Siya machaychayaw ya mallakabyelin un manturay si ing-inggala. Amen.

12 Bubuɏun un ay-ayatok, achi kayu maschaaw si amod un mapaligatanyu, un isun chi awed achipun maawatan un makmakwa kan chikayu. 13 Ngim ha koonyu otyan, ganggalasonyu makaligatanyu si ligat Kristu, ta makaganggalas kayu ya mipaila michayawala. 14 Pian kayu lu mibibiin kayu gapu si pammatiyu kan Kristu, ti inggew kan chikayu chi machayaw un Ispiritun Apudyus. 15 Ngim otyan ta lappun mapaligatan kan chikayu gapu si pummatoyanyu, man-aakaw kayu, mangmangwaanyu si lawwing ya bumibbiyanganyu si lappun ilay-ayanyu. 16 Ngim lu mapaligatan kayu gapu kan Kristu, achipun kayu otyan mabiin ngim chayawonyu si Apudyus ti libilang kayu un tagula.

17 Gumatong chi timpuʼn manguisan Apudyus kan cha tagu, ked ulaola cha tagula. Ked lu chitaku ulaola kuison, simma makwa kan cha achipun tumuttuwa si bibiɏuʼn chameg un lampeɏpu kan Apudyus! 18 Ti kalan chi liigili un ugud Apudyus,

19 Ked chikayuʼn mapampaligatan gapu si pion Apudyus, ipapatiyuʼn mangwa si bibiɏu ya ipuɏangyu long-egyu kan Apudyus un mantegochen, ya ituɏutuɏuyyu un mangwa si bibiɏu.