1 Susulud un ay-ayatok, losan cha alla ingkarin Apudyus kan chitaku. Peɏkason taku long-eg taku si losan un mampakaisaw si long-eg ya somsomok taku. Ya ipapati taku un matagu un mampeɏkas ya umogyat kan Apudyus.

2 Lukatanyu somsomokyu kan chikami ti lappun killingwami si lawwing kan chikayu ya lappun bo liyam-anmi ya lappun iluyunganmi kan chikayu. 3 Chakampun un ibyegak alla ta pabyasuɏon chikayu. Ti tuttuwaʼn imbyebyeggak un ay-ayatonmi chikayu, ked ulay man-os-ossaan taku un matoy ya man-os-ossaan taku un matattagu. 4 Ked mantegochak kan chikayu, ked ichayawmi chikayu. Ked ulay achu cha lapaligatanmi, masegegak mipagapu kan chikayu, ked amod chi galasmi kan chikayu.

5 Ked ulay chi gummatnganmi ud Macedonia, lappun illongmi. Achu ligatmi si losan un ayanmi ti achu cha mansasanga kan chikami ya umogyat kami bo. 6 Ngim si Apudyus, un malegeg si somsomok cha chummauy, silegegla somsomokmi si gummatngan Titus. 7 Ked chakampun un abus chi gummatngala gummalasanmi, ngim silegegla chikami si imbyegala lalegagenyu kan siya. Imbyegala bo ayatyu un mangitullong kan sakon, ya impakaammula manchachauyanyu, ya langitatakcheɏanyu kan sakon, siya amochen chi galasku si sala.

8 Ti ulay lu lummawing chi somsomokyu si suɏatku, achipulak lambyabyawi un langisuɏat. Ti mailak un chummauy chi somsomokyu si suɏatku kan chikayu, ulay sin-akitan abus. 9 Ked si sala, lagalasalak, chakampun un gapu si chummauyan chi somsomokyu ngim gapu si lambyabyawiyanyu. Ti inyuseɏn Apudyus chi chummauyan chi somsomokyu un bumaɏuwanyu, ked lappun lasaktan kan chikayu. 10 Ti ha lambyalagen chi chummauyan chi somsomok ked mambyabyawiyan un mangichaɏan si mataguwan ked chakampun un byabyawiyon chi hachi. Ngim ha lailubungan un chumauyan ked ha mambyalagela otoy. 11 Ngim kan chikayu, tuttuwaʼn impalubusyu si Apudyus un languseɏ si hachiʼn chummauyan chi somsomokyu. Ked ha lambyalagela impapuutyu pammatiyu un kasinyu impotog chi ustu-ustuʼn pin-ayu koon, ti lilawingyu killingwan chi hachiʼn lakabyasuɏ un chakampun un pionyuʼn mitakuɏung, ti pionyuʼn mangwa si ustu. Ked chilusayu siya ta achi kayu mabiilan kan Apudyus ya ulay kan chikami. Ked ha osaʼn lambyalagen chi lambyabyawiyanyu, pionyu boʼn itullong sakon. Ked maila un pasig ustu killingwayu mipanggop si kamatchi un lappun lakabyasuɏan. 12 Ked ulay lu laluɏatak si hachi, chakampun un gapu ta lakabyasuɏ willu lauyungan. Ngim laluɏatak ta ipakaawatku kan chikayu si sangwalan Apudyus, lu mailonyu un langipotog kan chikami. 13 Ked allaya gapu un lasegeg kami.

Chakampun abus un lasegeg kami, lagalasan kami bo si langitullonganmi kan Titus, ti bummaɏu somsomokla si killingwayu. 14 Inchayawku chikayu kan siya ked lappun mabiilak. Ngim pasigmi ibyega kan chikayu katuttuwaan, ked isula boʼn pasig katuttuwaan cha losan un imbyegami kan Titus mipanggop kan chikayu. 15 Ked laam-amod bummaɏu somsomokla kan chikayu, ti achipunla maliwatan cha galasyuʼn tummuttuwa si imbyegala, ya chalegyu ya ogyatyu si lammamangiliyu kan siya. 16 Ked amod galasku ti mantegochen kayu un lappun mangkuɏangala.