1 Ud Caesarea awed chi osaʼn leɏakiʼn mangngachen Cornelius, kapitan cha singgasut un suɏchachu un Romano un kalanchaʼn “Kumpanyan chi Italia.” 2 Mangapudyus cha Cornelius un simbyeyan. Losancha chaychayawon si Apudyus. Malagtuɏung kan cha kakapus un Judio ya pasig malluluwalu kan Apudyus.

3 Si simmachemaan, inggew chi impailan Apudyus si in-ilop kan siya. Intullongla osaʼn anghel Apudyus un ummoy kan siya ot kalala, “Cornelius!”

4 Intutukkeɏn Cornelius siya ot ummogyat ot kalala, “Ma ibyegam, Apu?”

Ot kalan chi anghel, “Chingngeɏn Apudyus cha luwalum ya ammula in-ilom un tumuytuɏung kan cha kapus. 5 Si sala mangibuunka si umoy ud Joppa mangayeg si osaʼn leɏakiʼn mangngachen Simon un kalanchaʼn Peter. 6 Inggew uwan cha Simon, un manchachait si lalat, awed chi byeɏoyla si igid chi byeybyey.”

7 Ot ummoyon pun chi anghel, ilayagen Cornelius cha chuwaʼn bubùulola ya osaʼn mangapudyus un suɏchachu un lansimsimbi kan siya. 8 Imbyegala kan chicha cha losan un lakwa ot imbuunla chicha ud Joppa.

9 Labigat pun si lummamatuk ummachalichaʼd Joppa, ustu boʼn ummoy lalluwalu si Peter si latalap un otop chi byeɏoycha. 10 Labitin ot piolaʼn mangan ngim si mangiyalaancha si makan, inggew chi impailan Apudyus kan siya impain-ilop. 11 Intullonglaʼn liwalit ud langit ot inggew chi isun chi ewan luput un labubukyed lipacheɏa si pita un latatakkod chi mampasiigid. 12 Cha inggew ked losan un kalasin cha alimeɏ, mangkakkachap ya mantattayap. 13 Oli pun chingngeɏn Peter chi ginga un kalala, “Peter, lumibbyatka ta peɏtiyom chi piom un kalon.”

14 Ngim kalan Peter, “Lai Apu, ti lappun kilkillankù ibilangmiʼn Judio un kiisaw.”

15 Hachiʼn lan-ugud kalala kasin, “Achim ibilang un kiisaw cha makan un killingwan Apudyus.” 16 Lamitlu hachi lakwa, ot kakma lipangatuʼd langit chi hachiʼn luput.

17 Si malomsomsomkan Peter lu simma piolaʼn uguchon chi intullongla si in-ilop, gummatong cha taguʼn imbuun Cornelius ot ilimuscha byeɏoy Simon. Ked inggewcha pun si liwangan un sumisiked, 18 ilimuscha lu awed lanchawos kan Simon Peter udchi.

19 Sissiya un somsomsomkon Peter lu simma pion chi impailan Apudyus kan siya un uguchon, ot kalan chi Ispiritu kan siya, “Peter, awed cha tiɏuʼn leɏakiʼn mangmangngit kan sika. 20 Lumibbyatka ya lumogsedka. Achika manchuwachuwa un mitun-ud kan chicha ti sakon chi langibuun kan chicha.”

21 Ot lummogsed si Peter ot kalala kan cha hachiʼn leɏaki, “Sakon chi singsingtonyu. Simma panggopyuʼn ummali utla?”

22 Summongbyatcha, “Si kapitan Cornelius chi langibuun kan chikami un umoy mangayeg kan sika, ti imbyegan chi anghel Apudyus kan siya un paayegla sika ta chongɏola ibyegam. Mangapudyus si Cornelius ya chaychayawola si Apudyus ya mas-oman cha Judio siya.” 23 Ot limangilin Peter chicha ot ummiyancha udchi.

Labigat pun, lakalubbyat si Peter kan chicha ot litun-ud bo cha uchum un mamatiʼn iJoppa kan chicha.

24 Kasin pun labigat gummatongchaʼd Caesarea. Iluuway cha Cornelius chicha, pati cha agila ya bubuɏunla un ilayagela. 25 Alla pun un lumlok si Peter, ummoy Cornelius ilabot siya ot lampalintuming si sangwalan Peter ta chayawola siya. 26 Ngim pilasiked Peter siya un kalala, “Sumikedka, ti taguwak bo un isum.” 27 Summiked si Cornelius ot lilumlokchaʼn lan-ug-uggud. Intullong pun Peter cha achu un taguʼn lauppun udchi, 28 kalala kan chicha, “Ammuyuʼn mipalit si ugalimiʼn Judio un makabibiɏun ya ulay manggaggakay kan cha Gentil. Ngim impakaammun Apudyus kan sakon un masapuɏʼn achipunku ibilang cha asintataguk un kiisaw. 29 Si lampaayagenyu kan sakon, ummaliyak un achipun lanchuwachuwa. Si sala piok un maammuwan lu puggey un ilayagelak.”

30 Summongbyat si Cornelius, “Miikapat eɏgewla sala, malluwaluwaluwak ud uwami si machema. Ot kakma summiked si sangwalak chi osa un taguʼn malilisiling chi silupla. 31 Ot kalala kan sakon, ‘Cornelius, chingngeɏn Apudyus cha luwalum ya simsimmokla cha pin-am koon un tumuɏung kan cha kakapus. 32 Mangibuunka si umoy ud Joppa mangayeg kan Simon Peter. Lanchawos si byeɏoy Simon, un manchachait si lalat, un awed chi byeɏoyla si igid chi byeybyey.’ 33 Ot kakmak impaayeg sika. Ked bibiɏu ta ummalika. Si sala awed kami losan si sangwalan Apudyus ta chongɏonmi losan cha imbilin Apudyus kan sika un ibyega.”

34 Oli pun illugin Peter un lan-ugud, kalala, “Sala un maawatak un man-iisuwon Apudyus cha losan un tagu.*10:34 Deuteronomy 10:17 35 Awatola ulay siluʼn tagu, Judio man willu Gentil, lu mamaticha kan Apudyus ya ustu kooncha. 36 Ammuyu chi bibiɏuʼn chameg un illidchon Apudyus kan cha Israel, si langibyegbyeg-ala si lumin-awaan chi angos gapu kan Jesu Kristu un Apun cha losan un tagu. 37 Ammuyu cha lapotog un laklakwa si intilun chi Judea. Mallugiʼd Galilee si lagamput John langibyegbyeg-an mipanggop si bunyeg. 38 Ya ammuyuʼn chilutukan Apudyus si Jesus un iNazareth ya illidchola Ispiritula ya kilabyelinla kan Jesus ta ulay silu ayala pin-a langwa si bibiɏu ya pin-a lampalin-awa kan cha losan un pilaligatan chimunyu ti awed si Apudyus kan siya. 39 Ya chikamiʼn apostoles chi mampaloklok kan cha losan un killingwala ud Jerusalem ya uchum un ilin cha Judio. Illansacha si Jesus si krus ot hachi latoyala. 40 Ngim tilagun Apudyus siya kasin si mikatluʼn eɏgew ot lampaila. 41 Chakampun si losan cha tagu ngim chikami abus un chilutukan Apudyus un mantistigu, un lakakan ya lakain-ilum kan siya si ummuliyala lataguwan. 42 Imbilinla kan chikami un ibyegbyegami bibiɏuʼn chameg kan cha tagu ya paloklokanmi un si Jesus chi chilutukan Apudyus un manguis kan cha latattagu ya latoy. 43 Tistiguwan cha losan un propeta mipanggop kan Jesus ta lu silu mamati kan siya mapakawan cha byasuɏla mipagapu si ngachenla.”

44 Si man-ugu-uguchen Peter, ummoy chi Ispiritun Apudyus kan cha losan un lanchochongngeɏ si ugud. 45 Oli pun, laschaaw cha mamatiʼn Judio un litun-ud kan Peter, un lampeɏpuʼd Joppa, ti illidchon bo Apudyus chi Ispiritula ulay kan cha Gentil. 46 Ti chingngeɏcha chicha un man-ug-uggudcha si sabyaliʼn ugud ya chaychayawoncha si Apudyus. Ot kalan Peter, 47 “Ilawat cha allaʼn tagu Ispiritun Apudyus un isun chi langawatan taku. Ked awed kamma mangipalit kan chicha un mabunyagencha?” 48 Oli pun imbilin Peter un mabunyagencha si ngachen Jesu Kristu. Ot tilawichencha si Peter ta inggew kan chicha si pigan eɏgew.