1 Si hachiʼn timpu, illugin Ari Herod un mamaligat kan cha uchum un mamati. 2 Impasiwatla uɏun James, un sulud John.*12:2 Ha allaʼn ari ked Herod Agrippa 1 un apun Herod the Great ya amulakon Herod Antipas un lampasiwat si uɏun John un Mambubunyeg. 3 Laammuwala pun un lagalasan cha Judio si kingwala, imbilinla un pachokmala si Peter. (Lakwa alla si timpun chi piyasta un mangalancha si tilapay un lappun yeastla.) 4 Ot lachokmaan pun si Peter, impabyaɏudla siya ot imbilinla un man-achug cha sin-oppat un grupun suɏchachu kan Peter. Pilanggop Herod un kuison si Peter si sangwalan cha tagu lu magamput chi Piyastaʼn Lallausan.

5 Ngim si inggewan Peter si byabyayɏuchen, intuytuɏuy cha mamati illuluwalu siya kan Apudyus.

6 Si hachiʼn labi sakbyey un ilawan Herod si Peter ta makuis, lasusuyop si Peter si mambyeatan cha chuwaʼn suɏchachu, un lakakawwaɏan chi imala si chuwaʼn kaweɏ. Cha uchum un suɏchachu lan-achugcha si sawang chi byabyayɏuchen.

7 Ot kakma lampaila osaʼn anghel Apudyus ot inggew chi silaw un sililawala kuwetun inggewan Peter. Pilikpikla butikan Peter ta byangolola siya ot kalala, “Chesam! Lumibbyatka!” Ot laodcheg cha kaweɏ si imala. 8 Ot kalan chi anghel kan siya, “Mansilupka ya mansancheɏka!” Ot kingwala. Ot kalan bo chi anghel kasin, “Iggam takpin chi siluplu ya tun-uchom sakon.” 9 Ot tilun-ud Peter chi anghel un lummawa si byabyayɏuchen. Achipunla ammu lu tuttuwa chi pin-an chi anghel koon, ngim kalala lu in-ilop abus. 10 Lilausancha ummula ya mikadwa un man-aachug ot lichuumcha si kilagaʼn sawang un mangkapon si siudad. Ot liwalit chi kilagaʼn sawang un lappun langiwalit ot lummawacha. Si lalidtidchaɏalancha si osaʼn kesa, kakman chi anghel tilelan si Peter.

11 Oli pun lan-imamchong si Peter ot kalala, “Tuttuwa gayam! Imbuun Apudyus chi anghella ta seɏaklibyelak kan Herod ya losan un simsimmok cha Judio un kooncha kan sakon.”

12 Si somsomsomkola, ummoy ud uwancha Mary un ilan John Mark. Udchi lauppulan cha achuʼn tagu un malluwaluwalu. 13 Langkongkong si Peter si sawang ot ha osaʼn bubùulon un byebyai un mangngachen Rhoda ummoyla intullong. 14 Lailasinla pun un gingan Peter, amod chi galasla ot achipunla inwalit chi sawang. Ngim lalodchak un ummoy chaɏom ot imbyegala un awed si Peter un sumisiked si sawang.

15 Kalancha kan siya, “Latingangka lin!” Ngim impatutla un tuttuwa imbyegala. Kalancha, “Anghella lin!”

16 Intuɏuy Peter langkongkongkong. Ot inwalitcha pu sawang ot intullongcha siya, laslaschaawcha. 17 Lansinyeɏ si Peter ta gumilokcha. Imbyegala in-ilon Apudyus un langilawa kan siya si byabyayɏuchen. Ot kalala, “Ibyegayu kan James ya cha susulud.” Ot ummoy si sabyaliʼn lugeɏ.

18 Labigat pun, lagulu cha suɏchachu ti lappun si Peter. 19 Ot impasngit Ari Herod si Peter ngim lappun inchesancha. Ot ilimbistigela cha lan-aachug ya impaotoyla chicha. Ummoyon si Herod ud Judea ot ummoy illinggew ud Caesarea.

20 Si inggewan Herod udchi, amod chi silangala kan cha taguʼd Tyre ya Sidon. Ngim gapu si alla, simsimmokchaʼn umili un man-os-ossaancha un mangay-ayu kan Herod. Ot ilawischa si Blastus un ap-apun cha inggew si palasyun Herod ti pionchaʼn makapippiya kan Herod, ti cha iliʼn inturayala siya mangeancha si kaloncha.

21 Chillumtong pu eɏgew un lampamitingan Herod, illiggala silupla un silup chi Ari ot ummamuy si aammuyan chi Ari ot lan-ugud si sangwalan cha tagu. 22 Lagamput pun lan-ugud, simpapakuy cha tagu un kalancha, “Gingan chi osaʼn apudyus, chakampun un tagu!” 23 Hachi ked, kakman chi anghel Apudyus chilusa siya ti achipunla pilachayawan si Apudyus ot ilamin chi ogos chi long-egla ot latoy.

24 Ngim lituytuɏuy lanchilongeɏ ugud Apudyus ot ummachu cha mamati.

25 Lagamput pu kawachin cha Barnabas kan Saul ud Jerusalem, langulinchaʼd Antioch, inyawitcha si John Mark.