1 Gummatong si Gubillachuɏ Festus si probinsiya ud Caesarea. Lummaus pu tiɏuʼn eɏgew, ummoy ud Jerusalem. 2 Gummatong pun udchi, ummoy cha ap-apun cha papachi ya cha papangat cha Judio ta ichiɏumcha si Paul kan siya. 3 Chilawatcha kasin un iyulinla si Paul ud Jerusalem, ti panggopchaʼn umoy isalob siya si chaɏan ta otoyoncha. 4 Summongbyat si Festus kan chicha un kalala, “Labyabyantayan si Paul ud Caesarea, ked achipun mabyeyeg chi mangulilak udchi. 5 Ked ibyegayu kan cha uchum un pangatyu ta mitun-udcha kan sakon ked ichiɏumcha allaʼn tagu lu awed lakabyasuɏala.

6 “Illinggew si Festus si waɏu willu simpuɏuʼn eɏgew ud Jerusalem, ot langulin ud Caesarea. Labigat pun, ummamuy langkuis ud korti ot impaayegla si Paul. 7 Gummatong pun, lachaliguyup cha Judio un lampeɏpuʼd Jerusalem, ot achu mangkachegson un ipabyasuɏcha kan siya ngim achipuncha mapaloklokan.”

8 Oli pun tilakcheɏan Paul chi long-egla, un kalala, “Lappun killingwak si sumupling si lintog takun Judio willu sumupling si templo taku willu sumupling si Emperador.”

9 Ngim pion Festus un mas-oman cha Judio siya, ot kalala kan Paul, “Ha piom un umoy ud Jerusalem ta udchi mangimbistigeɏak si cha ipabpabyasuɏcha kan sika?”

10 Ngim kalan Paul, “Issak ti allaak utla si sangwalam, un masapuɏʼn maimbistigeɏak. Sikan mismu chilutukan chi Emperador un manguis kan sakon. Ya ammum un lappun byasuɏk kan chicha. 11 Ked lu awed byasuɏk un umalay un matoyak, achipulak mangkadkachegu ta milisiyak. Ngim lu lappun katuttuwaan cha ipabyasuɏcha kan sakon, lappun kalintogen chi ulay silun taguʼn mangiyawat kan sakon kan chicha. Chawatok un miiyoy chi kasusku kan Emperador.”

12 Oli pun inyintuud Festus kan cha kukunsiseɏla, un kalala, “Gapu ta chilawatluʼn maiyoy chi kasuslu kan Emperador, ibuunku sika kan siya.”

13 Laeɏgewalan pun, gummatong cha Ari Agrippa kan Bernice un suludlaʼn byebyai ud Caesarea ta umoycha geggakayon si Festus. 14 Si illinggewancha udchi si achuʼn eɏgew, ilug-uggud Festus kan Ari Agrippa chi kasus Paul, un kalala, “Awed chi byaɏud utla un tilelan Gubillachuɏ Felix. 15 Si inggewak ud Jerusalem, inchiɏum cha ap-apun cha papachi ya cha pallakayon cha Judio ya chilawatchaʼn kodchongak un mapatoy siya. 16 Imbyegak kan chicha un chakampun si ugalin cha Romano un mangiyawat si tagu un lichiɏum lu achipun yan makasillangu kan cha langichiɏum kan siya ta awed wayala un malakcheɏ si long-egla si ipabyasuɏcha kan siya. 17 Gummatongcha pun utla, achipunku intantan chi kasusla, ngim labigat pun ummamuyak si kukùisan ot impaayegku si Paul 18 Summiked pun cha langichiɏum kan siya un man-ugud. Kalak lu awed manchegson un ipabyasuɏcha kan siya, ngim lappun mit. 19 Ha lan-is-isikancha abus kan siya ked mipanggop si pammatin cha Judio ya mipanggop si osaʼn latoy un mangngachen Jesus un ibyegbyegan Paul un ummuli latagu kasin. 20 Gapu ta lappun ammuk un man-imbistigeɏ si kamatchin kasus, ilimusku kan Paul lu piolaʼn maiyoy chi kasusla ud Jerusalem, ta udchi maimbistigeɏ. 21 Ngim chilawatla un matelan un isun chi byaɏud taplu ha Emperador chi manguis kan siya. Ot imbilinkuʼn mabyantayan siya inggala paitiɏudku siya kan Emperador.”

22 Ot kalan Ari Agrippa kan Festus, “Piok un chongɏon chi allaʼn tagu mismu.”

“Lu bigat, makwan chongɏom siya,” kalan Festus.

23 Ot labigat pun, ummoy cha Ari Agrippa kan Bernice si kurti, un illiggacha ang-anggacha. Lakaoy bo cha komander cha susuɏchachu ya cha papangat si hachiʼn siudad. Lilumlokcha pun losan, impaayeg Gubillachuɏ Festus si Paul. 24 Ot kalan Festus, “Ari Agrippa ya chikayu losan un alla utla. Itullongyu allayan tagu un inchiɏum cha losan un Judio ud Jerusalem ya utla Caesarea kan sakon, un ip-ipkawcha un lappun lobbonglaʼn matagu. 25 Ngim lappun inchesak si kabyasuɏala un umalay un matoyala, ngim chilawatlaʼn maiyoy chi kasusla kan Emperador, simsimmokkuʼn ibuun siya udchi. 26 Ngim lappun ustu-ustu si isuɏatku kan Emperador mipanggop kan siya. Ked siya gapun chi mangipasanguwak kan chikayu losan, amod gey kan sika Ari Agrippa ta lu magamput taku imbistigeɏon siya awed misuɏatku. 27 Ti lappun simbin chi ibuunku byaɏud kan Emperador lu lappun ustu si ipabyasuɏcha kan siya.”