1 Gummatong kami pun si teɏanteg, laammuwanmi un Malta chi ngachen chi ili un gummatnganmi. 2 Bibiɏu in-ilon cha umili udchi un lammangili kan chikami. Lan-apuycha si man-alichuwanmi, ti ummuchen ya tummunglin. 3 Lanchagup si Paul si simposot un kayu ot inggabbyala si apuy. Gapu si atungla, lummoswa umtoy un uɏog ot intatàomla iman Paul. 4 Intullong pun cha umili un likikisin chi uɏog si imala, kalancha si kacha osa kan chicha, “Lappun chuwachuwalan kapapatoy chi taguʼn alla, ti ulay lu lakalasat si byeybyey, ngim achipun chi mangchon si lintog ipalubus un matagu siya.” 5 Ngim iwweɏegweg Paul chi uɏog si apuy ot lappun lakwa kan siya. 6 Lilamlamacha un lumtog chi imala willu mabyelikted matoy. Ngim labyeyeg un iluwaycha ot intullongchaʼn lappun lakwa kan siya, ot laobos chi somsomokcha ot kalancha osaʼn apudyus siya.

7 Inggew chi pitaʼn adchaliyan si lanchissaagenmi un uwan Publius un pangat si hachiʼn ili. Limangilila chikami ud uwacha si tiɏuʼn eɏgew. 8 Liyaspuɏʼn lapalating ya lachug-an chi aman Publius. Ummoy Paul intullong siya si kuwetu ot lalluwalu pun, impatayla imala kan siya ot lummin-awa siya. 9 Laammuwan pu lakwa kan siya, ummoy cha losan un lasakit si hachiʼn ili kan Paul ot pilalin-awala chicha. 10 Achu cha impakchew cha umili kan chikami. Ingkamin pun bo, inggetongcha bo losan un kasapuɏanmi un mambiyasi.

11 Illinggew kami ud Malta si tiɏuʼn buɏan, oli pun lanlugen kami si osaʼn bapur un lampeɏpuʼd Alexandria un illinggew udchi si timpun chi agilid. Ha meɏkala si sangu ked “Kapin un apudyus.”*28:11 Ha kapin un apudyus un kalancha, chicha cha Castor kan Pollux, chicha apudyus un chaychayawon cha mangkawachi si bapur. 12 Ummoy kami ud Syracuse, ot illinggew kami udchi si tiɏuʼn eɏgew. 13 Malipud udchi, intuɏuymi lambiyasi ot gummatong kami ud Rhegium. Labigat pun bo, illugin chi bidbid ud chaya un lampeɏpuwanmi ot lanlubbyat kami kasin ot si mikadwaʼn eɏgew, lichuum kami ud Puteoli. 14 Udchi inchesanmi cha uchum un mamati ot ilayagencha chikami un inggew kan chicha si pituʼn eɏgew. Ot intuɏuymi lalidchaɏan un umoy ud Rome. 15 Chingngeɏn pun cha mamatiʼd Rome chi mipanggop kan chikami, ummalicha ilabot chikami ud mekit Appius ya Tiɏun Checheggusan.†28:15 Ha mekit ud Appius, ha kaachayula ked 70 un kilomitro malipud Rome. Ha tiɏun checheggusan, 53 kilomitro chi kaachayula. Intullong pun Paul chicha, lanyaman kan Apudyus ya lasegeg chi somsomokla.

16 Gummatong kami pun ud Rome, lapalubusan si Paul un inggew si osaʼn byeɏoy un byabyantayan chi osaʼn suɏchachu siya.

17 Lummaus pu tiɏuʼn eɏgew, ilayagen Paul cha papangat cha Judio un inggew ud Rome. Lanchetchetongcha pun, kalala kan chicha, “Susulud, lappun killingwak si lawwik un sumupling kan cha kailiyan taku willu ugalin cha chachakkeɏ taku. Ngim isulaʼn chilokmaalak ud Jerusalem ot inyawatcha sakon kan cha Romano. 18 Ilimbistigeɏn pun cha Romano sakon, pionchaʼn wayawayaan sakon ti lappun inchesancha si killingwak un umalay un matoyak. 19 Ngim ilisit pun cha Judio, kapilitan un chilawatkuʼn maiyoy chi kasusku kan Emperador. Achipulak manchiɏum kan chicha. 20 Hachi gapula un ilayagek chikayu ta itullongku chikayu ya makauguchak kan chikayu, ti piok un ipakaammu kan chikayu lu himma gapun chi labyaɏuchek. Siyad gapula pammatik si lamlamaon takuʼn galak Israel.”

21 Kalancha kan siya, “Lappun ilawatmi si suɏat un lampeɏpuʼd Judea mipanggop kan sika. Ya lappun lawwing un imbyegacha willu ilugudcha mamati un lampeɏpu udchi. 22 Ngim ammumi un pepewingon cha tagu si ili-ili cha kakadwam un sumuysuɏut kan Jesus, ked pionmi un chongɏon chi kasomsomkam.”

23 Ot langibyegacha si eɏgew un man-uuguchencha. Chillumtong pu hachiʼn eɏgew, achu-achu cha ummoy si inggewan Paul. Ot illugila si bigbigat inggala maschom un langipakaawat ya langibyegbyega mipanggop si mampangatan Apudyus. Ilawisla chichaʼn mamati mipanggop kan Jesus un iluseɏla lintog Moses ya cha libluʼn inggilin cha propeta. 24 Laawis cha uchum si imbyegbyegala, ngim cha uchum, achipuncha mamati. 25 Ot ummoyonchaʼn, lagodgodwa ya lansisillongbyatcha. Ngim sakbyey un umoyoncha, inyalungus Paul imbyega, “Tuttuwa imbyegan chi Ispiritun Apudyus kan propeta Isaiah mipanggop kan cha chachakkeɏ taku, 26 un kalala,

28 “Ked masapuɏ un ipakaammuk kan chikayu un awed cha imbuun Apudyus un umoy mangibyega kan cha Gentil mipanggop si in-ilon Apudyus un malagu kan cha tagu, ked chumngeɏcha.” 29 Lagamput pun Paul imbyega cha alla, ummoyon cha Judio un pin-acha lansisillongbyat.§28:29 Ha allaʼn bersikulu lappun si kaachuwan un manuscript si Greek.

30 Chuwaʼn tawon chi illinggewan Paul si ilabyangalaʼn byeɏoy ud Rome. Limangilila cha losan un ummoy langgaggakay kan siya. 31 Lateɏod un langibyegbyega mipanggop si mampangatan Apudyus ya langitudtuchu mipanggop kan Apu Jesu Kristu ked lappun langipalit kan siya.