1 Lummaus pu lasawaɏan si opat un tawon, ummoy kami kasin kan Bernabas ud Jerusalem ked ilawitmi si Titus. 2 Ummoy kami udchi gapu ta impatigammun Apudyus. Gummatong kami pun, ummoyak lakaugud kan cha apostoles un pin-a mangipangpangu kan cha mamati. Ot imbyegak kan chicha bibiɏuʼn chameg un ibyegbyegak kan cha Gentil ta ammuwoncha un ustu pin-ak imbyegbyega ta achi kenga imbyegbyegak si chamu ya sala. 3 Ot ummallamungcha un ustu losan, ulay bo si Titus un biɏunku un Gentil, achipuncha impatut impasogyat. 4 Ngim illinggew cha uchum un mangipatut un lakaamung kan chikami un aginpapati, ummalichaʼn mantamcheg lu puggey un chitakuʼn lamati kan Jesu Kristu ked mipalubus un achipun tumungpeɏ si ugalin cha Judio. Ti ha somsomokcha, ipatutcha pakwa cha alla kan chitaku. 5 Ngim pulus un achipunmi tiluttuwa chicha, ulay sin-akitan, taplu michagas chi katuttuwaan un bibiɏuʼn chameg kan chikayu.

6 Ngim cha allaʼn maibilang un langangatu un isun cha papangat taku, ulay silu cha man lappun mansabyaliyala kan sakon, ti lappun piliyan Apudyus si tagu ya lappun bod inchogacha si intudtuchuk. Ked ha mangibyeg-ak gapu ta isula un lappun sumabyaliyak kan chichaʼn papangat, ti chakampun un lapotog kan sakon chi kilasasaedcha, kan chakampun un kilasasaed chi mangibilangan Apudyus si tagu. 7 Ti ilagammuchaʼn chilutukalak kan Apudyus un mangibyegbyega si bibiɏuʼn chameg kan cha Gentil. Isun bod chi lanchutukala kan Peter un mangibyegbyega kan cha Judio. 8 Ti si Peter, lakwa un apostoles cha Judio gapu si pallakabyelin Apudyus, ked siya bo isun chi lakwa kan sakon un apostoles cha Gentil. 9 Ked biligbig cha James, Peter ya John un maibilang un papangat cha mamati un Apudyus chi lanchutuk kan sakon. Ked lilamalucha chikami kan Barnabas ta mangipain-ancha un mangkakadwa kami. Ked lan-asiteulanmi un chikami kan Barnabas chi umoy mangibyegbyega kan cha Gentil ya chicha bo kan cha Judio. 10 Ked ha abus un chilawatcha kan chikami, sosomkonmi un tumuɏung kan cha kakapus un mamati ud Jerusalem, ked siya bo insosomokku un koon.

11 Ngim si ummaliyan Peter ud Antioch si osaʼn eɏgew, ilomɏak siya si sangwalan cha tagu ti laillachu. 12 Kamatla lakwaala: Si gummatngan Peter ud Antioch, lakaubung kan cha uchum un mamati un Gentil. Ngim si hachi, gummatong pun cha uchum un Judio un imbuun James un lampeɏpuʼd Jerusalem, lummissut un lakaubung kan cha Gentil ot summila ti umogyat kan cha Judio un mangipatut un masapuɏʼn masogyatan cha losan un mamati.*2:12 Si lintog Moses, mipalit un makakan chi osaʼn Judio si cha Gentil langked lu mangan si paliyaw ked machimok. 13 Ot cha uchum un mamati un Judio ud Antioch, tiluɏedcha bo si Peter, ammucha losan un cha pin-acha kingwa ked chakampun un ustu. Ked ulay si Barnabas, laawis si killingwan Peter un ag-agin. 14 Ngim laammuwak pun un achipun mitimbuɏuy chi killingwacha si katuttuwaan un intudtuchun chi bibiɏuʼn chameg, ilomɏak si Peter si sangwalancha losan. Kamatla imbyegak: “Peter, tuttuwaʼn Judioka, ngim inyageylu un maluttuwa si ugaliyuʼn Judio gapu si lamatiyam kan Jesu Kristu. Ked puggey ipatut si sala ipakwa kan cha Gentil chi ugalin cha Judio lù?”

15 Ot intuɏuykuʼn kalan kan chicha losan, “Lisisigud un Judio taku ti liyalak taku un Judio, ked chakampun un isu taku cha Gentil un lappun ammucha si lintog Apudyus. 16 Ngim ammu taku mit un chakampun un malungpaɏan si lintog Apudyus un inggilin Moses chi makaalan chi lakabyasuɏan kan Apudyus, ti abus chi mamatiyan kan Jesu Kristu. Ked ulay chitaku un Judio, abus chi lamatiyan taku kan Jesu Kristu chi langibilangan Apudyus kan chitaku lalintog kan siya, ked chakampun un ha lalungpaɏan taku si hachiʼn lintog. Ti chakampun un siyad makaalan chi byasuɏn chi tagu kan Apudyus chi malungpaɏala si lintog taku un Judio.”†2:16 Psalm 143:2

17 Ked hachi mangawatan taku un ulay chitaku un Judio, malagbyasuɏ taku, un isun cha Gentil. Ngim makwa un kalan taku, si Kristu langwa kan chitaku malagbyasuɏ gapu si langiwalilan taku si lintog ta mamati taku kan siya? Lai, chakampun si katchi! 18 Ti ha katuttuwaan ked, ipailak un lakabyasuɏak lu ulilok kasin chi lintog un lan-awichek si sin-eɏgew. 19 Ti hachiʼn lintog, laaawwatak un lu silu sumupling, matoy. Ked lappun lamlamak un matuɏungan si hachiʼn lintog. Ked si Jesu Kristu lamlamaok un maluɏung kan sakon un mangwa si pion Apudyus. 20 Ti libilang un lakakatoyak kan Jesu Kristu si krus, ked chakampun kan sakon chi mangituray si somsomokku si salaʼn katattaguk, ngim si Jesu Kristu un awed kan sakon. Ti ha biyegku si sala, ked mibyeseɏ si pammatik si Alak Apudyus un langipaila si ayatla kan sakon ya inchuyala long-egla para kan sakon. 21 Susulud, achipun makwa un iwalin taku kachegun Apudyus. Ta lu siyad mangibilangan Apudyus un lakaalan cha byasuɏn cha tagu kan siya gapu si lalungpaɏancha si lintog Moses, achi kappay lappun simbin chi latoyan Jesu Kristu.