1 Susulud, chakampun un sissiyan musassu taku ti liwayawayaan Jesu Kristu chitaku si kilamusassu taku si lintog! Ked isosomokyu cha hachiʼn killingwala, ked achiyu ipalubus un kasin chikayu mammusassuwon si lintog.

2 Sakon si Paul un suludyu, ilawegkuʼn mangibyega kan chikayu, ked ammanyu chongɏon: Lu mamati kayu un ha masogyatanyu maseɏaklibyenyu, lappun simbin Kristu kan chikayu. 3 Somsomkonyu allaʼn ibyegak ta ikasinku: Lu kalanyuʼn masapuɏʼn matungpeɏ kalu lintog mipanggop si sogyat, masapuɏ boʼn tuttuwaonyu losan cha hachiʼn lintog un inggilin Moses. 4 Cha hachiʼn mangibyega un ha lintog chi tuttuwaoncha un mangibilangan Apudyus kan chicha lalintog, misilacha kan Jesu Kristu, ya achipun Apudyus chicha kacheguwan. 5 Ngim chitaku, manlamlama taku un ha mangibilangan Apudyus kan chitaku lalintog, ked gapu si kalobbongan chi Ispiritula, ya gapu bo si lamatiyan taku kan Jesu Kristu. 6 Ta lu mamati taku kan Jesu Kristu, lappun kalasin cha lasogyatan ya cha achipun, ti ha masapuɏ, ha lamatiyan taku kan siya un maila si man-asi-ay-ayatan taku.

7 Ha impapatiyu si chamu, ustu mit! Ked si sala simma langawis kan chikayu un sumila si katuttuwaan? 8 Chakampun mit un Apudyus un lamili kan chitaku leɏpuwan chi hachi. 9 Isun chi yeast, un ulay akit, paboteɏola losan un mikamsala, hachi isun chi intudtuchucha kan chikayu. 10 Ngim mantegod chi somsomokku mipagapu kan chikayu, ti piyeɏok si Apu Jesus un maluɏung si somsomokyu ta achiyu wiwinwichen cha hachiʼn sabyalin itudtuchucha. Ti ha taguʼn mangallilaw si somsomokyu, ulay lu silu, ochesala machusaala kan Apudyus.

11 Ngim ulay sakon, susulud, lu itudtuchuk un masapuɏʼn tuttuwaon taku lintog mipanggop si sogyat, achipulak otyan paligatan kan cha chogak un Judio mipanggop si itudtuchuk un latoyan Jesu Kristu si krus. 12 Ha piok, cha hachiʼn mangan-allilaw si somsomokyu mipanggop si sogyat, telancha otyan chikayu.

13 Susulud, ilayagen Apudyus chitaku ta mawayawayaan taku, chakampun un masapuɏʼn tuttuwaon taku yan chi lintog un inggilin Moses. Ngim achipun makwa un mallasunyu hachiʼn mawayaanyuʼn mangwa kan cha byaɏanglaʼn pion chi long-eg, ti ha masapuɏʼn koon taku, man-asitilluɏung taku kan cha biɏun taku gapu si man-asi-ay-ayatan taku. 14 Ti losan cha lintog Apudyus, silalip-ut chi allayaʼn osaʼn bilin un kalala, “Masapuɏʼn ay-ayatom chi asintatagum un isun chi man-aayatlu si long-eglu.”*5:14 Leviticus 19:18 15 Ngim lu man-asikotob kayu ya man-asisubog kayu, an-allechenyu ti kamatchi man-asiyam-alanyu.

16 Allaya itudtuchuk kan chikayu: Ipalubusyu Ispiritun Apudyus un mangichaɏan si somsomokyu ya tuttuwaonyu piola, ked kapilitan un achipunyu koon cha lawwing un sigud un pion chi long-egyu. 17 Ti ha lawwing un pion chi long-eg, issala pion chi Ispiritun Apudyus. Ked isula bo si pion chi Ispiritun Apudyus, un issala bo pion chi long-eg. Ked cha allaʼn chuwa, man-asipatutcha si somsomok, ked achipun kayu makakopya si ammuyuʼn bibiɏu. 18 Ked lu Ispiritun Apudyus chi mangichaɏan kan chikayu, chakampun un lintog chi mangichaɏan kan chikayu.

19 Patunged mampapattak chi pion chi long-eg un lisisigud si tagu, ti ha piola, isuyopla chakampun si asawala ya koola cha losan un kilalawwing, 20 un isun cha manchayaw si silan-apudyus, ya manguseɏ si pallakabyelin satalas un isun chi man-aalisig ya mambubuyun. Ked cha uchum un meɏpu si pion chi long-eg, siya gumulu ya susubbogen, ulay bo apos, sanga ya kilaagum. Ked ha chalilotlot cha hachiʼn pion chi long-eg, siya mansisilaan un lappun timpuyug, 21 ti awed chi apos. Ya ulay bo bilubuuk ya liluluku ya uchum un lawwing. Imbyegabyegak kan chikayu ngim ikasinku bo ibyega un lu silu pin-a mangwa si kamatchi, achipun mipati si Mampangatan Apudyus.

22 Ngim sabyali ibungan chi Ispiritun Apudyus kan chitaku. Ti ha iloswala siya ayat, galas, lin-awan chi somsomok, kilaattom, kilaalus, malagchegu ya kilabiɏu, ya mantegochen, 23 ya kilaalled ya palagpakumbyabya. Ta lu cha hachi awed kan chitaku, lappun lintog un sumupling kan chitaku. 24 Losan un tagun Jesu Kristu, illissancha lawwing un pion chi long-eg ti isun chi lipaticha liilansa si lilansaan Jesus si krus. 25 Ked susulud, gapu ta Ispiritun Apudyus chi langatod si makataguwan taku kan Apudyus si umaliʼn eɏgew, masapuɏʼn potgon taku siya si katattagu taku. 26 Achipun taku malaysayaw ti lappun uchum si ibungala lu achi man-asiillapos ya lawwing un somsomok kan cha uchum.