8
Si Jesus Chi Kangatuwan Un Pachi Taku
1 Ha allaʼn pionmiʼn uguchon: Awed chi kangatuwan un pachi taku un ummamuy si machuwalan chi Kangatuwan un Apudyus ud langit un makaturay kan siya. 2 Ked mansimsimbi un kangatuwan un pachi si Kasantuwan un Lugeɏ un siya tuttuwaʼn sigey un tinulda un si Apudyus mismu chi lamaud, chakampun si tagu.
3 Kacha kangatuwan un pachi ked lachutukancha un mangichatun kan cha sagut ya cha ayam un chatun kan Apudyus. Ked gapu ta siya kangatuwan un pachi taku masapuɏʼn awed bo ichatunla kan Apudyus. 4 Lu awed si Jesus utla pita si sala, achipun makwa un mampachi ti allat cha papachi un mangichatun kan cha sagut un imbilin chi lintog Moses. 5 Ha kawachicha un pachi ked isun chi kopya ya alliliwan chi awed ud langit un igew Apudyus. Ti alla pun un mampaud si Moses si sigey un tinulda un manchaychayawancha, bilegbyegaan Apudyus siya un kalala, “Masapuɏʼn ammam tuɏachon cha losan un kopyan chi impailak kan sika si illinggewam si bilig.”*8:5 Exodus 25:40 6 Ngim si sala, ha kawachin Jesus un lipiyeɏ kan siya un kangatuwan un pachi ked langatngatu lu ha kawachin cha ummulaʼn pachi, ti siya mangiyugud si labibbiɏun tuɏeg Apudyus kan cha tagu. Labibbiɏu baruʼn tuɏeg Apudyus lu ummulan tuɏegla ti libyaseɏ si labibbiɏun ingkarila.
7 Ti lu lappun kuɏang chi chamuʼn intuɏeg Apudyus, achipun otyan masapuɏʼn awed mikadwaʼn tuɏeg. 8 Ngim tilagammun Apudyus chi kilakuɏang cha tagu ot kalala:
“Gumatong chi timpu kalan chi Apu un mangwaak si baruʼn katuɏagen
kan cha Iyisrael ya cha iJudah.
9 Chakampun un isun chi tuɏeg un killingwak kan cha aappucha
si eɏgew un langitallayak kan chichaʼd Egypt.
Ti achipuncha tilungpeɏ chi intuɏegku,
ot lan-awichek chicha, kalan Apudyus.
10 Allaya baruʼn tuɏeg un kook kan cha taguʼd Israel si umaliʼn eɏgew.
Pasigku ipaspasmok kan chicha cha lintogku ya kook ta igettokcha tuttuwaon.
Ked sakon chi man-Apudyuscha ya chicha bo mantaguk.
11 Ked achipun masapuɏ un man-asitudtuchucha willu man-asibyegacha,
‘Ammuwonyu si Apudyus, ti losan cha tagu ammuwon sakon,
cha kabyabyaan inggala cha kangatuwan.’
12 Ti pakawalok cha byasbyasuɏcha ya
achipunku sosomkon cha kilalawwingcha.Ӡ8:12 v. 8-12 Jeremiah 31:31-34
13 Ha mangibyeg-an Apudyus si baruʼn tuɏeg, killingwala ummulan tuɏeg un magamput chi kasimbiyala. Ked ammu taku un losan un magamput chi kasimbiyala ya chummachaan ked achipun mabyeyeg ked maumas.