1 Susulud, gapu ta lamati kayu kan Jesu Kristu un Apu takuʼn kachayawan, masapuɏn achi kayu mampili si tagu gapu si kasasaedcha. 2 Lungay awed chuwaʼn tagù umali si maup-uppulanyu, ha osa byaklang un mansisingsing si buɏawan ya laleman chi silupla ked ha osa, kapus un mampitto-pittoy 3 ked siya ipain-anyu si bibiɏu chi byaklang ya kalanyu, “Allaya umamuyam un laleman,” ngim kalanyu si kapus, “Ancha sumikachem willu Mallupiledka si ikiyak,” 4 ked lakabyasuɏ kayu ti mampili kayu si tagu ya lambyalin kayu kuis un lawwing chi somsomokyu.

5 Chongɏonyu, susuludkuʼn ay-ayatok. Siya chilutukan Apudyus cha kakapus un tagu si allaʼn lubung un byaklang si pammati ya chicha mipati si mampangatala un siya ingkarila kan cha mangay-ayat kan siya. 6 Ngim imbibiinyu cha kakapus! Cha byabyaklang met cha mangam-amis kan chikayu ya pin-a mangichiɏum kan chikayu si korti. 7 Chicha pin-a mangibyega si lawwing si machaychayaw un ngachen Jesu Kristu un pilati taku.

8 Ked lu tungpaɏonyu kapopotgen un lintog Apudyus un kalala, “Masapuɏʼn ayatom cha asintatagum un isun chi man-aayatlu si long-eglu,”*2:8 Leviticus 19:18 ustu pin-ayu koon. 9 Ngim lu mampili kayu si tagu gapu si kilasasaedcha, makabyasuɏ kayu ti suplingonyu lintog Apudyus. 10 Ti lu silu mangibyegaʼn tuttuwaola cha losan un lintog ngim lu siluplingyu os-ossaan un lintog Apudyus ked lakabyasuɏ kayu si losan. 11 Ti imbyegan Apudyus si lintogla un kalala, “Achika makachegchegas,” kalala bo, “Achika pumatoy.”†2:11 Exodus 20:13-14, Deut. 5:17-18 Ked ulay lu achipunka makachegchegas ngim lu pumatoyka, isula bon siluplinglu cha lintog Apudyus. 12 Ked somsomkonyu un sigulachuʼn kuison Apudyus chikayu lu tiluttuwayu lintoglaʼn manwayawaya kan chitaku. Ked ha uguchonyu ya koonyu masapuɏʼn umulud si itudtuchun chi lintog. 13 Ti achipun Apudyus kacheguwan chi taguʼn achipun kumachegu si asintatagula. Ngim cha malagchegu kan cha uchum, achipun umogyat lu kuison Apudyus siya.

14 Susuludku, himma simbila lu awed taguʼn mangibyega un alla pammatila, ngim achipun mailad chi bibiɏuʼn angwatla? Ha taguwon kamman chi pammatila siya? 15 Lungay awed choga takuʼn mamati un makasapuɏ si silup ya makan, 16 ya kalan chi osa kan chikayuʼn, “Ingkan, otyan ta binchisyulan chika kan Apudyus ya idchen chika si masapuɏm un makan ya silup,” ngim lu achipunyu idchen si masapuɏla, himma simbin chi hachi? 17 Kamatchi bo pammati gey un abus, lu achipun mapatachulan si bibiɏuʼn angwat, lappun simbila ya miyalig un lalattoy.

18 Ngim awed chi mangibyega, “Ha osaʼn tagu, awed pammatila abus ngim ha osa, awed bo bibiɏuʼn angwatla abus.” Ked katla isongbyatku: “Achipunlu mipaila kan sakon chi katuttuwaan chi pammatim lu achipunlu mapatachulan si bibiɏuʼn angwat. Ked sakon, ipailak kan sika chi kilatuttuwan chi pammatik si bibiɏuʼn angwatku.” 19 Mamati kayu un ossaan si Apudyus? Ustu mit, ngim somsomkonyu un ulay cha chimunyu mamaticha bo kan Apudyus ya mamayogpogcha si ogyatcha kan siya. 20 Chikayuʼn laog-oggogen! Ha pionyuʼn ipailak un ha pammati un lappun kingwalad bibiɏu ked lappun simbila? 21 Isun Abraham un apu taku si awi. Chakampun kamman un siya langibilangan Apudyus kan siya un lalintog gapu si killingwala si langichuyaala kuma kan alaklaʼn Isaac si altar?‡2:21 Genesis 22:1-14 22 Mailayu un lapatachulan chi pammatila si bibiɏuʼn angwatla, ked ummustu-ustu chi pammatila gapu si killingwala. 23 Ot latungpeɏ liigili un ugud Apudyus un kalala, “Lamati si Abraham kan Apudyus ot lapalintog siya si sangwalan Apudyus.”§2:23 Genesis 15:6, Romans 4:3 Ya laawagen bo siya un biɏun Apudyus. 24 Mailayu un ibilang Apudyus un mapalintog chi tagu gapud chi killingwala, chakampun si pammatila gey abus.

25 Isun bo Rahab un aggasoyan un byebyai. Ti si gummatngan cha Israelitas un ummoy lantamcheg, lamati siya kan Apudyus. Intaɏula chicha ya tiluɏungala chichaʼn ummawid si sabyaliʼn chaɏan. Imbilang Apudyus siya un lalintog gapu si killingwala un lammangili kan cha ummoy lantamcheg.*2:25 Joshua 2:1-21

26 Katchi bo chi pammati, lu achipun mapatachulan si bibiɏuʼn angwat ked lalattoy, isun chi long-eg un latoy lu lappun angosla.