1 Chingngeɏn pun cha Pariseo un umachu-achu cha sumuysuɏut kan siya ya achu cha bilunyagen Jesus lu si John. 2 Ngim ha katuttuwaan, chakampun kan Jesus chi lambunyeg ngim cha disipulusla abus.

3 Chingngeɏn pun cha Jesus chi imbyegacha, tilelanchaʼd Judea ot langulinchaʼd Galilee. 4 Ked masapuɏʼn mangoychaʼd Samaria. 5 Gummatongcha si osaʼn ili ud Samaria un mangngachen Sychar, un adchaliyan si pitaʼn illidchon Jacob kan Joseph un alakla. 6 Inggew chi bubun Jacob udchi ot ummamuy si Jesus si cheeg chi bubun ti laungeɏ un lalidtidchaɏan. Chancheli lumamatuk si hachiʼn timpu.

7 Ot gummatong chi byebyaiʼn iSamaria un umoy malakchu ot kalan Jesus kan siya, “Idchelak u si ilumok.” 8 Ossaan si Jesus si hachiʼn timpu ti ummoy cha disipulusla si ili ngummila si makan.

9 Kalan chi byebyaiʼn iSamaria kan siya, “Puggey sika un Judio mangkochew si ilumom kan sakon un iSamaria?” (Ti cha Judio achipun cha makabibiɏun kan cha iSamaria.)*4:9 Ti cha Judio achipuncha useɏon cha pin-an cha ISamaria

10 Ot summongbyat si Jesus kan siya, “Lu ammum otyan chi maatod Apudyus kan sika ya lu siluwak un mangkochew si chelum, mangkochewka otyan kan sakon ta idchek sika si chelum un mangtod si biyeg.”

11 Kalan chi byebyai, “Apu, lippun manggaudlu si chelum ya mallusgong chi bubun alla. Chimma ingka malakchuwan si chelum un mangtod si biyeg? 12 Ha langatngatuka kamman lu si Jacob un apu taku? Ti siya langatod si bubun alla un ilin-ilumla ya cha aalakla ya cha ayamcha?”

13 Ot summongbyat si Jesus, “Lu silu umilum si chelum alla, mauwaw kasin, 14 ngim lu silu umilum si chelum un idchok, ked achipun pulus mauwaw. Ti ha chelum un idchok kan siya ked mambyalin un isun chi uud un man-ay-ayus chi biyeg un mallalayun.”

15 Ot kalan chi byebyai kan Jesus, “Apu, idchelak u si lait un chelum ta achipulak mauwaw kan achipulak pin-a umoy malakchu utla.”

16 Ot kalan Jesus kan siya, “Ingka ayagen si asawam ked mangulin kayu utla.”

17 Kalan chi byebyai, “Lappun asawak.” Kalan Jesus kan siya, “Tuttuwa imbyegam un lappun asawam. 18 Ti lima cha ilasawam ked ha leɏakiʼn ikakabbyeɏoylu si sala ked chakampun si asawam. Tuttuwa imbyegam.”

19 Ot kalan chi byebyai kan Jesus, “Apu, ammuk un propetaka. 20 Cha aappumi si awi, allayaʼn bilig chi lanchaychayawancha kan Apudyus. Ngim chikayu un Judio, kalanyu un Jerusalem chi ustu un manchaychayawan kan Apudyus.”

21 Ot kalan Jesus kan siya, “Byebyai, mamatika kan sakon, chumtong chi timpuʼn chakampun si bilig alla willu Jerusalem chi manchaychayawan cha tagu kan Apudyus. 22 Chikayun iSamaria, achipunyu ammu chi chaychayawonyu. Ngim chikamiʼn Judio, ammumi chaychayawonmi ti cha Judio meɏpuwan chi Malagu kan cha tagu. 23 Ngim chancheli chi timpu, ked allaʼn gummatong, cha tuttuwaʼn manchaychayaw masapuɏʼn manchaychayawcha kan Ama si Ispiritu ya katuttuwaan. Ti cha katla cha singsington chi Ama un manchaychayaw kan siya. 24 Si Apudyus ked Ispiritu. Ked cha manchaychayaw kan siya, masapuɏʼn chaychayawoncha Siya si Ispiritu ya katuttuwaan.”

25 Ot kalan chi byebyai kan siya, “Ammuk un umali chi Messias un kalanchaʼn Kristu. Lu umali, ipakaawatla cha losan kan chitaku.”

26 Oli pun kalan Jesus, “Sakon un makaug-uggud kan sika, Sakon chi Kristu.”

27 Ot gummatong cha disipulusla. Lataegcha ti inchesancha siya un makaug-uggud si byebyai. Ngim lappun lan-imus kan chicha lu simma masapuɏʼn chi byebyai ya puggey makaug-uggud kan siya.

28 Oli pun tilelan chi byebyai sasakchuwalaʼn angang ot langulin si ili ot imbyegala kan cha tagu, 29 “Umali kayu ta itullongyu leɏakiʼn langibyega kan sakon si losan un killingwak. Siya lin chi Kristu!” 30 Ot ummoycha si inggewan Jesus.

31 Oli pun ilàaɏuk cha disipulus si Jesus, un kalancha, “Mistulu, umalika mangan!”

32 Ngim kalala kan chicha, “Awed chi killanku un achipunyu tagammu.”

33 Ot lan-asiimus cha disipulus, “Awed langigetong si killanla?”

34 Ot kalan Jesus kan chicha, “Ha ibilangkuʼn makan ked kook chi pion Apudyus un langibuun kan sakon ya gamputok koon chi impakwala kan sakon. 35 Awed chi kalanyuʼn lu lumaus chi opat buɏan ked man-aali. Ibyegak kan chikayu, mallangɏanga kayu ya itullongyu cha pappayaw, leum cha pagoy ked makwaʼn maali! 36 Cha man-aali ked matangchalancha ked cha taguʼn aliyoncha, awed biyegchaʼn mallalayun. Ked matetteɏok cha lammuɏa ya cha lan-ali losan. 37 Ti tuttuwa ug-uggud un kalala, ‘Sabyali mammuɏa ya sabyali man-apit.’ 38 Imbuunku chikayuʼn umoy man-ali si achipunyu kilawachi, kilawachin cha uchum ked chikayu mangapit si bungan chi kawachicha.”

39 Achu cha iSamaria un lamati kan Jesus si hachiʼn ili gapu si imbyegan chi byebyai un imbyegan Jesus kan siya cha losan un killingwala. 40 Ot gummatong pun cha iSamaria kan Jesus, tilawichencha siya ot illinggewcha udchi si chuwaʼn eɏgew. 41 Ot ummad-achu cha lamati kan siya gapu si intudtuchula.

42 Ot kalancha si byebyai, “Mamati kami si sala, chakampun si mipagapu si imbyegam ngim chingngeɏmi mismu cha intudtuchula ked ammumi un siya tuttuwaʼn Malagu kan cha tagu utla lubung.”

43 Lagamput pu chuwaʼn eɏgew, tilelanchaʼd Samaria ot ummoychaʼd Galilee. 44 Ot kalan Jesus un mismu, “Achipun mapotgen chi propeta si mismuʼn ilila.” 45 Gummatongcha pun ud Galilee, latetteɏok cha tagu un lammangili kan siya, ti ummoycha pun lakapiyasta ud Jerusalem, intullongcha losan un killingwala si Piyastan Lallausan.

46 Oli pun langulin kasin cha Jesus ud Cana un ili ud Galilee. Udchi lambyalilola byeyas chi chelum. Inggew chi osaʼn opisyeɏ ud Capernaum un lasakit chi alakla. 47 Chingngeɏla ked un awed si Jesus ud Galilee un lampeɏpuʼd Judea, ummoyla ilàaɏuk siya ta umoy ud Capernaum ta palin-awaola chi alaklaʼn leɏaki un mamattoyon. 48 Ngim kalan Jesus kan siya, “Achipun kayu mamati inggala awed mailayù lakaskaschaaw.”

49 Ot kalan chi opisyeɏ kan siya, “Apu, kewam u umalika ta achi matoy chi alakku.”

50 Oli pun kalan Jesus kan siya, “Ingkan, matagu alaklu.” Lamati hachiʼn tagu si imbyegan Jesus ot ummoyon.

51 Si inggewala si chaɏan, ilabot cha bubùulola siya ot imbyegacha kan siya un, “Latattagu alaklu!”†4:51 Ha kaachayun chi Capernaum umoy ud Cana ked umoy un tiɏumpuɏun ya chuwaʼn kilometro. 52 Ot ilimusla kan chicha lu silu uras un lummin-awaan chi alakla ot kalancha, “Machemad gebyen un lakaan chi atungla.”

53 Ingkagasmok chi Ama un hachi ustuʼn uras un langibyeg-an Jesus kan siya un, “Matagu alaklu.” Ot lamati siya ya cha paminyala kan Jesus. 54 Laoy chi mikadwaʼn lakaskaschaaw un killingwan Jesus ud Galilee si lampeɏpuwalaʼd Judea.