1 “Imbyegak cha laoy kan chikayu ta achiyu man-awichen chi pammatiyu. 2 Peɏyawoncha chikayu si sinagoga. Ked chumtong chi timpu un mangtoyancha kan chikayu, ked kalanchaʼn kooncha chi alla un mansimbi si pion Apudyus. 3 Katla kooncha kan chikayu ti achipuncha am-ammu sakon ya si Amak. 4 Ngim imbyegak cha laoy kan chikayu ta lu chumtong chi timpu un mangwaancha, somsomkonyu un insigudku imbyega kan chikayu.” Achikpun imbyega cha laoy kan chikayu si chamu, ti awechak un sissiya kan chikayu.

5 Ngim ibyegak si sala, ti mangulilak si langibuun kan sakon. Ked lappun mangimus kan chikayu lu udma ayak? 6 Gapu ta imbyegak kan chikayu, chummauy kayu buggey. 7 Ngim tuttuwa ibyegak kan chikayu. Bumaɏuwanyu lu umoyolak, ti lu achipulak umoyon, achipun bo umali Ispiritun Apudyus un Katuɏunganyu. Ngim lu inyakon, ibuunku siya un tumuɏung kan chikayu. 8 Ked lu umali siya, ipakaawatla kan cha tagu un laillachu mipanggop si byasuɏ ya kilalintog ya si manchusaan Apudyus. 9 Lu mipanggop si byasuɏ, ipaloklokla un lakabyasuɏcha ti achipun cha mamati kan sakon. 10 Lu mipanggop si kilalintog, ipaloklokla un tuttuwaʼn lalintogak. Ha mangagammuwancha ked mangulilak kan Ama ud langit ked achipunyu sakon kasin mitullong. 11 Lu mipanggop si manchusaan Apudyus kan cha tagu, ipaloklokla un lagagamput lakodchongan si Satalas un ap-apun cha achipun mamati.

12 “Achu piok un ibyega kan chikayu, ngim amod lu maawatanyu si sala. 13 Ngim lu umali Ispiritun Apudyus un tuttuwa, siya mangipakaammu kan chikayu si katuttuwaan un mampeɏpu kan Apudyus. Achipun man-ugud si uwalan somsomok, ngim siyà uguchola chingngeɏla kan Apudyus ya ipakaammula kan chikayu cha makwa si umaliʼn eɏgew. 14 Ked pachayawala sakon, ti cha awed si somsomokku, hachi umoyla ipakaammu kan chikayu. 15 Cha losan un awed kan Amak, ked awed bo kan sakon. Ked siya mangibyeg-ak un ha Ispiritu, siya ipakaammula cha lampeɏpu si somsomokku kan chikayu.”

16 Intuɏuy Jesus, “Achipun mabyeyeg ked achipunyu sakon mitullong. Ngim achipun bo mabyeyeg ked kasinyu bo itullong sakon.”

17 Ked cha uchum un disipulusla lan-asiimuscha, “Simma piola lin un ibyega? Imbyegala un achipun mabyeyeg, ked achipun taku mitullong siya ya achipun bo mabyeyeg ked kasin taku bo itullong siya. Ya kalala bo un umoy kan Amala. 18 Ked simma piola lin un ibyega un, ‘Achipun mabyeyeg?’ Achipun taku maawatan.”

19 Ammun Jesus un pionchaʼn imuson kan siya, ot ilimusla kan chicha, “Ha man-iillimus kayu mipanggop si imbyegak un achipun mabyeyeg ked achipunyu mitullong sakon, ngim achipun bo mabyeyeg ked kasinyu bo itullong sakon? 20 Tuttuwa allaʼn ibyegak kan chikayu: man-ibin kayu ya mallangchu kayu, ngim cha achipun mamati kan sakon matetteɏokcha. Manchachauy kayu ngim ha langchuyu mambyalin un galas. 21 Ha miyaligela isun chi umalak un byebyai un amod chi ligatla. Ngim lu ummalak, laliwatala ligatla gapu si galasla si alakla. 22 Isula bo kan chikayu, ti manchachauy kayu si sala. Ngim lu chumtong chi timpu, mantitillullong taku kasin ked amod chi galasyu ked lappun makakaan si halat un galas kan chikayu.

23 “Lu chumtong chi hachiʼn timpu, chakampun kan sakon chi manchawatanyu, ti si Amak. Tuttuwa allaʼn ibyegak kan chikayu, lu silu chawatonyu kan Amak gapu si ngachenku, idchola kan chikayu. 24 Inggalad chi salaoy, lappun pay laing chilawatyu gapu si ngachenku. Si sala manchawat kayu ot maawatyu ta maam-amod chi galasyu.”

25 Intuɏuy Jesus un lan-ugud, “Imbyegak cha laoy kan chikayu si pangngalig. Chumtong chi timpu un achipunku useɏon chi pangngalig lu makauguchak kan chikayu, ngim makauguchak kan chikayu un ustu-ustu mipanggop kan Ama. 26 Lu chumtong chi hachiʼn eɏgew, manchawat kayu kan siya gapu si ngachenku ya chakampun si ibyegak un ichawatak chikayu kan Ama. 27 Ay-ayaton chikayu kan Ama ti ay-ayatonyu sakon ya tuttuwaonyu un lampeɏpuwak kan Apudyus. 28 Lampeɏpuwak kan Ama ot ummaliyak utla lubung. Ngim si sala, telak utla lubung ked mangulilak kan Ama.”

29 Oli pun kalan cha disipulusla kan siya, “Ilam! maaawwatanmi ibyegbyegam si sala ti achipunlu iluseɏ cha pangngalig. 30 Si sala, laammuwanmi un ammum losan. Achipun masapuɏ un man-imus kami ti am-ammum chi awed si somsomokmi. Hachi mamatiyanmi un lampeɏpuka kan Apudyus.”

31 Ot kalan Jesus, “Mamati kayu si sala? 32 Chanchali chi timpu un mabukeɏ kayu, ked kacha osa mangulin si byeɏoyla ked sakon chi abus un matelan. Ngim ha katuttuwaan, chakampun si abusak ti awed si Amak kan sakon. 33 Imbyegak laoy kan chikayu ta lumin-awa cha somsomokyu gapu kan sakon. Paligatan chikayu kan cha achipun mamati, ngim pakoscheɏonyu somsomokyu ti ilabyakku si Satalas un sinturay utla lubung.”