1 Lummaus pu pigan eɏgew, kasin lampaila si Jesus kan cha disipulusla si igid chi Byeybyey un Tiberias. Katla lakwa. 2 Inggew cha Simon Peter, si Thomas un ngadloncha Kapin ya Nathanael un iCana un sakup chi Galilee, cha mansulud un alak Zebedee, ya cha chuwaʼn disipulus Jesus. 3 Kalan Simon Peter kan cha kakadwala, “Inyak malabukuɏ.”

Ot kalancha kan siya, “Umali kami kan sika.” Ot lambyangkacha. Lilablabichaʼn lalabukuɏ ngim lappun laaɏacha.

4 Wiswisngit pun, summisiked si Jesus si teɏanteg, ngim achipun cha disipulus immatulan siya. 5 Ot kalala kan chicha, “Susulud, awed laaɏayu?”

Kalancha, “Lappun pulus.”

6 Kalan Jesus kan chicha, “Ikop-eɏyu tabukuɏyu si machuwalan chi byangka ot mangaɏa kayu si achuʼn ikan.” Ot ingkop-eɏcha tabukuɏcha, ot achipuncha makaguyguy ti amod chi tilabukuɏancha.

7 Ha disipulus un ay-ayaton Jesus immatulala siya ot kalala kan Peter, “Siya si Apu takuʼn Jesus.” Chingngeɏn ked Simon Peter un siya si Apu Jesus, lansilup si takpin chi silupla ot lummayug si chelum ot mangkiyat un umoy kan Jesus. 8 Ngim cha uchum un disipulus, latelancha un giluyguy cha tabukuɏchan laplu si ikan. Chakampun si achayucha si teɏanteg ti umoy un singgasut un metro.

9 Lummogsedcha pun si teɏanteg, intullongcha bumaɏabyaɏan uling ya ikan un lichachawis ya inggew bo tilapay. 10 Ot kalan Jesus kan chicha, “Umigetong kayu si ikan un tilabukuɏanyu.” 11 Summakyat si Peter si byangka ot giluyguyla tabukuɏ un laplu si mangkachakkeɏn ikan. Umoy un singgasut ya limampuɏu ya tiɏu lamungla. Ulay lu amod chi kilaachula, achipun lapissay chi tabukuɏ.

12 Ot kalan Jesus kan chicha, “Umali kayu ta mangan taku.” Lappun ossaan kan cha disipuluslaʼn langituled langimus lu silu siya, ti ammuchaʼn siya si Apu Jesus. 13 Ot illaɏan Jesus chi tilapay ya ikan ot inwaɏasla kan chicha. 14 Hachi pitlun chi lampain-an Jesus kan cha disipulusla lalipud si ummuliyala lataguwan.

15 Lagamputcha pun langan, kalan Jesus kan Simon Peter, “Simon un alak John, ha chakchakeɏ kamma ayatlu kan sakon lu ha ayatlu kan cha allaʼn uchum?”

Ot kalan Peter, “O Apu, ammum mit un ay-ayatok sika.”

Ot kalan Jesus kan siya, “Lu katlat, ayyuwalam cha lamati un ibilangkun keɏliluk.”

16 Ot impidwan Jesus un ilimus, “Simon un alak John, ha tuttuwaʼn ay-ayatolak?”

“O Apu,” kalan Peter, “Ammum mit un ay-ayatok sika.”

Ot kalan Jesus kan siya, “Lu katlat, ayyuwalam cha lamati un ibilangkun keɏliluk.”

17 Ot impitlun Jesus un kalala, “Simon un alak John, ha tuttuwaʼn ay-ayatolak?”

Ot chummauy si Peter ti pilitlula ilimus chi hachi. Ot kalala, “Apu, ammum losan. Ammum un tuttuwaʼn ay-ayatok sika.”

Ot kalan Jesus kan siya, “Ayyuwalam cha lamati un ibilangkun keɏliluk. 18 Tuttuwa allaʼn ibyegak kan sika. Si kabarum, koom chi piom un koon ya ummoyka si piom un ayan. Ngim lu meɏakayka, uyachom cha imam ked bilaɏud chika ta iyoy chika si achipunlu pion un ayan.” 19 Imbyegan Jesus chi alla ta impakaammula in-ilon Peter un matoy ta maichaychayaw si Apudyus. Oli pun, kalala kan siya, “Tun-ucholak.”

20 Ot lantuwili si Peter ot intullongla disipulus un ay-ayaton Jesus un mituntun-ud. Siya bo hachiʼn lansancheg kan Jesus si alungus chi langalancha si labi ya siya langimus lu silu mangiyibit kan siya. 21 Ot intullong pun Peter siya, kalala kan Jesus, “Apu, simman bo makwa kan siya?”

22 Ot kalan Jesus, “Ulay lu piok un taguwon siya inggalà mangulilak kasin, lappun bibiyanglu. Masapuɏʼn tun-ucholak.”

23 Inggan chi langibyeg-an Jesus si hachi, lanchilongɏan cha lamati un achipun chi hachiʼn disipulus matoy. Ngim achipun Jesus imbyega un achipun matoy allaʼn tagu, ti ha kalala abus, “Ulay lu piok un taguwon siya inggalà mangulilak kasin, lappun bibiyanglu.”

24 Siya disipulus Jesus un langibyega kan cha laoy ya langigili kan cha alla. Ked ammumi un tuttuwa losan.

25 Achu bo cha killingwan Jesus un achipun liigili. Lu miigilicha losan si liblu, achipun umalay chi lubung alla un inggewancha.