4
Ha Lalubsubyen Satalas Kan Jesus
(Mrk. 1:12-13; Luk. 4:1-13)
1 Oli pun impuyut chi Ispiritun Apudyus si Jesus si lugeɏʼn lappun ummili ta udchi malubsubyen Satalas kan siya. 2 Lallaun siya si opat puɏuʼn eɏgew ya opat puɏuʼn labi ot patunged labitin. 3 Ot ummoy si Satalas kan Jesus ot kalala, “Lu tuttuwaʼn Alak chika kan Apudyus, ibyegam kan cha allaʼn byetu ta mambyalin cha tilapay.”
4 Ngim summongbyat si Jesus, “Liigili si ugud Apudyus un kalala,
‘Chakampun si makan abus chi ikatagun cha tagu, ngim masapuɏcha kacha ugud Apudyus.’*4:4 Deuteronomy 8:3 ”
5 Oli pun impuyut Satalas si Jesus si salimpatuk chi templo si laapudyusan un siudad ud Jerusalem. 6 Ot kalala kan siya, “Lu tuttuwaʼn Alak chika kan Apudyus, lumayugka ti liigili si ugud Apudyus un,
‘Bililon Apudyus cha anghelesla ta ayyuwalan chika ya tapayaon chika taplu ulay cha chapanlu achipun masugat si byetu.’ ”†4:6 Psalm 91:11-12
7 Ot kalan Jesus kan siya, “Ngim liigili bo si ugud Apudyus,
‘Achim mangin-in-an si Apu un Apudyuslu.’‡4:7 Deuteronomy 6:16 ”
8 Ot impuyut Satalas si Jesus si kataklangan un bilig ot impailala cha losan un turay ya mampangatan utla lubung ya cha losan un bilaklangcha. 9 Ot kalala, “Idchok losan cha alla kan sika, lu mampalintumingka ya manchayawka kan sakon.”
10 Summongbyat si Jesus un kalala, “Wissedka Satalas! Ti kalan chi liigiliʼn ugud Apudyus,
‘Chayawom si Apu un Apudyuslu ya siya abus chi mansimbiyam.’§4:10 Deuteronomy 6:13 ”
11 Ot tilelan Satalas si Jesus, ot gummatong cha angheles Apudyus ot ilayyuwalancha siya.
Lilugiyan Jesus Un Lambyegbyega Ud Galilee
(Mrk. 1:14-15; Luk. 4:14-15)
12 Chingngeɏn pun Jesus un libyaɏud si John un Mambubunyeg, langulin siya ud Galilee. 13 Tilelalaʼd Nazareth ot ummoy illinggew ud Capernaum un osaʼn ili si igid chi byeybyey ud Galilee un sakup chi Zebulun ya Naphtali. 14 Lakwa laoy ta tuttuwaʼn matungpeɏ inggilin propeta Isaiah un kalala,
15 “Si pita ud Zebulun kan Naphtali, si igid chi byeybyey, un chomangon chi
chewwang ud Jordan inggala si sakup chi Galilee un igew cha Gentil.
16 Cha tagu udchi, isun chi inggewcha si manggikbot gapu si byasuɏcha.
Ngim si umaliʼn eɏgew, itullongcha lapigsan Silaw.
Siya mansilaw kan cha inggew si manggikbot un igew cha latoy.”*4:16 Isaiah 9:1-2
17 Malipud si hachiʼn timpu, lilugiyan Jesus un lambyegbyega un kalala,
“Mambyabyawi kayu kan cha byasuɏyu ti chanchali Mampangatan Apudyus.”
Ha Langayagen Jesus Kan Cha Opat Un Katatabukuɏ
(Mrk. 1:16-20; Luk. 5:1-11)
18 Si lalidtidchaɏalan Jesus si teɏanteg chi byeybyey ud Galilee, intullongla cha chuwaʼn mansulud, cha Simon un ngadlon cha Peter ya si Andrew un pin-acha malabukuɏ ti siya kawachicha. 19 Ot kalan Jesus kan chicha, “Tun-ucholak ta isuɏuk kan chikayu in-ilonyuʼn malabukuɏ si tagu.”†4:19 Si Greek “Tun-ucholak” - ha piolaʼn ibyega mitun-ud kan Jesus un disipulusla. 20 Ot kakmacha tilelan cha tabukuɏcha ot litun-udcha kan siya.
21 Si lalidtidchaɏalanchad chi teɏanteg, intullong Jesus cha chuwaʼn mansulud, cha James kan John un alak Zebedee. Inggewcha si byangka kan cha Zebedee un amacha un pin-ala isagala tabukuɏcha. Ot ilayagen Jesus chicha. 22 Ot kakmacha tilelan chi byangkacha ya si amacha. Ot litun-udcha kan Jesus.
Ha Lantudtuchuwan Jesus Ya Lamalin-awaala Kan Cha Lasakit
(Luk. 6:17-19)
23 Ummoy si Jesus kan cha losan un iliʼd Galilee. Ot lantudtuchu si cha sinagogacha. Imbyegbyegala Bibiɏuʼn Chameg mipanggop si Mampangatan Apudyus ya pilalin-awala bo cha lakalakalasiʼn sakit ya cha ligat cha tagu. 24 Ked lanchilongeɏ pin-an Jesus killingwa si cha losan un iliʼd Syria. Hachi gapulaʼn lan-iyoy cha tagu kan cha losan un lasakit, un lakalakalasi sakitcha ya ligatcha, isun cha laaɏan, laketoy ya lapalalais, ot pilalin-awan Jesus chicha. 25 Amo-amod cha taguʼn litun-ud kan siya un lampeɏpuʼd cha probinsiya ud Galilee, Judea, Decapolis, Jerusalem ya cha iliʼn inggew si chomangon chi chewwang ud Jordan.