15
Ha Lankalasiyan Chi Tudtuchun Cha Iyawi Ya Lintog Apudyus
(Mrk. 7:1-13)
1 Hachi ked, gummatong cha uchum un Pariseo ya cha mimistulun chi lintog un lampeɏpuʼd Jerusalem. Ot ummoycha kan Jesus lan-imus, un kalancha, 2 “Puggey cha disipuluslu un achipuncha tuttuwaon chi ugali un tilawid taku kan cha leɏpuwan taku? Achipuncha mambiɏu sakbyey un mangancha.”
3 Silongbyatan Jesus chicha un kalala, “Chikayu ngay, payuggey suplingon chi bilin Apudyus ya siya bò tiluttuwayu ugaliyu? 4 Ti kalan chi bilin Apudyus, ‘Potgom cha amam kan ilam ya lu silu mangeɏaweg si amala ya ilala masapuɏʼn matoy.’*15:4 Exodus 20:12, Deuteronomy 5:16 5 Ngim bilay-anyu bilin ti itudtuchuyuʼn lu awed mituɏung chi tagu si amala kan ilala, intalu lu achipunla idchon. Mallasunyu laing kan chicha un kalan, ‘Inggew chi idchok kan chikayu ngim ingkarik un idchon kan Apudyus’ 6 Ha katchi kamma in-ilonyuʼn mamotpotog si amayu ya ilayu? Bilay-anyu bilin Apudyus ta piga gey lu suɏutonyu kachawiyanyu. 7 Aginpapati kayu! Tuttuwa imbyegan Apudyus kan propeta Isaiah mipanggop kan chikayu!
8 Kalan Apudyus, ‘Cha taguʼn alla, chaychayawoncha sakon si tupokcha
ngim adchayuwan chi somsomokcha kan sakon.
9 Lappun simbin chi malaychayawancha kan sakon,
ti siyad itudtuchucha ugali un kingwan cha tagu,
ked kalanchaʼn bilinku.’ ”†15:8-9 Isaiah 29:13
Ha Makabyasuɏan Chi Tagu
(Mrk. 7:14-23)
10 Ot ilayagen Jesus cha amod un tagu ot kalala kan chicha, “Ammanyu chongɏon ta maawatanyu. 11 Chakampun si lumlok si tupok chi tagu malimok kan siya, ngim siyad malimok kan siya cha lawwing un lumoswa si tupokla.”
12 Oli pun ummoy cha disipulusla kan siya ot kalancha, “Ha achipunlu kamman ammu un lasaktan cha Pariseo si imbyegam?”
13 Summongbyat si Jesus si pangngalig un kalala, “Losan un muɏa un chakampun kan Amak ud langit chi langimuɏa ked mabyagut. 14 Bay-anyu cha Pariseo, ti isucha lakuɏap un mangipuyut si chaɏan cha isuchaʼn kuɏap. Ti lu ipuyut chi lakuɏap chi isula un kuɏap, kapilitan un miɏus-ubcha si abut.”
15 Ot kalan Peter kan Jesus, “Ipakaawatlu u kan chikami chi pangngalig un imbyegam geled.”
16 Ot kalan Jesus, “Ha achipunyu bo maawatan? 17 Ha achipunyu ammu un losan un lumlok si tupok chi tagu mangoy si buwangla ked lummoswa? 18 Ngim cha lumoswa si tupok chi tagu ked lampeɏpu si somsomokla ked siya malimok kan siya. 19 Ti ha somsomok chi tagu siya meɏpuwan cha lawwing un kopya, un isun chi pumatoy, makachegchegas ya mangwa kan cha kakitkitagen, akaw, cha tilutuli ya mangkiyakiyap. 20 Laoy cha malimok si tagu. Chakampun si mangalan chi tagu un achipun mambiɏu chi malimok kan siya.”
Ha Pammatin Chi Osaʼn Gentil Un Byebyai
(Mrk. 7:24-30)
21 Oli pun tilelan cha Jesus udchi ot ummoycha si sakup chi Tyre ya Sidon. 22 Ot inggew chi osaʼn byebyai un iCanaan un Gentil, un ummoy kan Jesus. Ot inyipkawla kalan un, “Apu, un galak David, kacheguwalak u! Ti patunged chi alakkuʼn byebyeɏasang tilotoman chi ligat ti laaɏan.”‡15:22 In Greek ha byebyai ked iCanaan. Ha piolaʼn ibyega ked ha byebyai osaʼn Gentil, chakampun un Judio.
23 Ngim achipun Jesus silongbyatan chi byebyai. Ot ummachali cha disipulusla kan siya ot kalancha, “Peɏyawom siya ta achi sumitong un mituntun-ud.”
24 Ngim kalan Jesus, “Libuulak abus kan cha galak Israel un liyalig cha si lataɏak un keɏlilu.”
25 Ngim ummoy lampalintuming chi byebyai si sangwalan Jesus ot kalala, “Apu, tuɏungalak u!”
26 Ot lan-alig si Jesus un kalala, “Chakampun un ustu lu ipakan chi kalon chi alak si asu.”
27 Ot summongbyat chi byebyai, “O, tuttuwa Apu, ngim ulay bo cha asu kaloncha cha bugta un maodcheg lu mangan cha apucha.”
28 Ot kalan Jesus kan siya, “Byebyai, lapigsa pammatim! Matungpeɏ lait un chawchawatom.” Ot kakma lummin-awa alaklaʼn byebyeɏasang.
Pilalin-awan Jesus Cha Achuʼn Tagu
29 Tilelan Jesus udchi ot langoy si teɏanteg chi byeybyey un Galilee. Ot lalagecha si osaʼn bilig ot ummamuy. 30 Ot litun-ud cha amod un taguʼn langiyoy kan cha bubuɏuncha un lakalakalasi cha saksakitoncha. Cha lapilay, lakuɏap, laasimbyachu, laumeɏ ya cha uchum un sakit. Ot impasangucha kan Jesus ot pilalin-awala chicha. 31 Laschaaw cha hachiʼn amod un tagu si intullongchaʼn makaginga cha laumeɏ, kummoscheɏ cha laasimbyachu, makatidchaɏan cha lapilay ya makatullong cha lakuɏap. Ot chilaychayawcha Apudyus chi Israel.
Ha Lamakalan Jesus Si Opat Libun Tagu
(Mrk. 8:1-10)
32 Oli pun ilayagen Jesus cha disipulusla ot kalala, “Macheguwak kan cha allaʼn tagu, ti illiinggewcha kan sakon si tiɏuʼn eɏgew ked laamin chi byaɏuncha. Chakpun pion un paoyolon chichaʼn mabibittin, ti matalimuchewcha si chaɏan.”
33 Summongbyat cha disipulusla kan siya, “Udma intaku mangean si umalay un ipakan taku kan cha amod un tagu utlaʼn lappun bilumɏoy?”
34 Ot ilimus Jesus kan chicha, “Piga awed un tilapayyu?”
Ot kalancha, “Awed chi pitu un tilapay ya akit un mangkapaat un ikan.”
35 Oli pun pilaamuy Jesus cha amod un tagu si pita. 36 Ot illaɏala pituʼn tilapay ya ikan ot lanyaman kan Apudyus. Lagamput pun, pilispis-igla ot illidchola kan cha disipulusla ot inwaɏascha kan cha amod un tagu. 37 Langkakakancha losan ot laslassugcha. Ot chilagup pun cha disipulusla cha lasaweɏ, laplaplu pituʼn langaya. 38 Umoy un opat libu cha langan un leɏaki, achipun libilang cha byebyai ya cha aalak.
39 Ot pilaoyon Jesus cha amod un tagu. Ot lallugencha kan cha disipulusla si byangka ot ummoycha si sakup chi Magadan.