1 Lummaus pu olom eɏgew, ilayagen Jesus si Peter ya cha James kan John un mansulud ot lalagecha cha tummalin si mantaklang un bilig. 2 Si langitullongancha kan Jesus, lambyaliw chi tullongla, ked ha lupala lummilalilang un isun chi ilit ked ha silupla amod chi putilakla un malilisiling.

3 Ot intullongcha cha Moses kan Elijah un makaug-uggud kan Jesus. 4 Oli pun kalan Peter kan Jesus, “Apu, bibiɏu ta alla taku utla. Lu piom, mangwaak si tiɏuʼn sigey, ta sin-ossaanyu kan cha Moses ya si Elijah.”

5 Si man-ugu-uguchen Peter, tilalikchungan chi libuun lumilalilang chicha. Ot inggew chi ginga un lampeɏpu si hachiʼn libuu un kalala, “Laoy chi Alakkuʼn tagtagopok ya siya masmas-omak. Chongɏonyu siya!”

6 Chingngeɏn pun cha disipulus chi hachi, lallukbubcha si pita gapu ta amod chi ogyatcha. 7 Ot ummoy si Jesus kan chicha ot pilikpikla chichaʼn kalala, “Lumibbyat kayu, achi kayu umogyat.” 8 Ot lantangedcha pun, lappun intullongcha si tagu abus si Jesus.

9 Si lan-osgenchad chi bilig, bililin Jesus chicha, “Achiyu pay ibyegbyega intullongyu inggalà Sakon un Alak chi Tagu ked umuliyak matagu.”

10 Ot ilimus cha disipulus Jesus, “Puggey un kalan cha mimistulun chi lintog un masapuɏʼn umun-ula umali si Elijah lu si Kristu?”*17:10 Malachi 4:5

11 Ot summongbyat si Jesus, “Tuttuwaʼn ummulà Elijah ummali ta isagalala losan. 12 Ngim ibyegak kan chikayu un lagamput ummali si Elijah, ngim achipun cha tagu siya immatulan. Ot killingwacha pionchaʼn koon kan siya. Ked katchi boʼn paligatancha Sakon un Alak chi Tagu.” 13 Oli pun laawatan cha disipulusla un si John un Mambubunyeg chi ibyegbyegan Jesus.

14 Gummatongcha pun si inggewan cha amod un tagu, ummoy kan Jesus chi osaʼn leɏaki ot lampalintuming si sangwalanla ot kalala, 15 “Apu, kacheguwam u alakkuʼn laketoy! Patungedla tilotoman chi ligat ti lu lumoswa ketoyla, pappasig misubbya si apuy willu mitup-ung si chelum. 16 Illiyoyku siya kan cha disipuluslu ngim achipuncha siya mapalin-awa.”

17 Summongbyat si Jesus, “Chikayuʼn lappun pammatila ya bilobokon un tagu si sala! Mikapiga man chi iinggewak kan chikayu? Mikapiga mangan-alusak kan chikayu? Igetongyu halat un alak kan sakon.” 18 Oli pun ilomɏan Jesus chi aɏan un inggew si alak ot ummoyon. Ot kakma lummin-awa hachiʼn alak.

19 Ot lan-aggakaw cha disipulus Jesus ummoy kan siya ot ilimuscha, “Pakamiggey achipun makapeɏyaw si hachiʼn aɏan?”

20 Ot kalan Jesus kan chicha, “Simman ti kuɏang chi pammatiyu. Tuttuwa ibyegak kan chikayu, lu awed akit si pammatiyu un isun chi kapaat chi bukeɏn chi mustasa, makwaʼn kalanyu si bilig allaʼn, ‘Man-atunka u si anchiya,’ ked tuttuwaʼn man-atun. Ti lappun achi makwa kan chikayu! 21 Ngim lu cha katchiʼn aɏan, lappun makapeɏyaw malaksig si luwalu ya palaglaun.”†17:21 Ha allaʼn bersikulu lappun si kaachuwan un manuscript si Greek, ngim si Mark 9:29 awed.

22 Lachagup pun cha disipulus Jesus ud Galilee, kalala kan chicha, “Sakon un Alak chi Tagu, mipuɏangak kan cha tagu 23 un mamatoy kan sakon, ngim si mikatluʼn eɏgew umuliyak matagu.” Chingngeɏn pun cha disipulusla hachi, patunged cha chummauy.

24 Gummatong pun cha Jesus kan cha disipulusla ud Capernaum, ummoy cha uchum un manchachagup si bugis si templo kan Peter ot ilimuscha, “Ha mambyayed kamman chi mistuluyu si bugis chi templo?”

25 “O, mambyaybyayed kabbo.” Summongbyat si Peter.

Si lilumlokan Peter si byeɏoy, kalan Jesus kan siya, “Simon, simma maibyegam? Silu manchagupan cha Ari utla pita si bugis? Cha sigud un tagula willu cha kakkaili?”

26 Kalan Peter, “Cha kakkaili.”

Ot kalan Jesus kan siya, “Siya tuwa, achipun otyan mambyayed cha sigud un tagu utla. 27 Ngim ulay chakampun si kailiyan taku, bay-anyu ta achi lumawik chi somsomok cha tagu kan chitaku. Ingka mamungwit si byeybyey ked ha umulan mabungwitan, takangom chi tupokla ked awed chi pilak un umalay un mambugis cha chuwa. Ked eɏam ya ummoylu bilayachen chi bugista.”