4
Ha Machayawan Chi Hachiʼn Umaammuy Un Mampangat Ud Langit
Lagamput pun cha hachi, lantangechak ud langit ot lailak chi sawangla un liwawalit. Ot kasinku bo chingngeɏ gingan chi hachiʼn chamuʼn lakaug-uggud kan sakon un isun chi gingan chi tangguyub, un kalala, “Wilù utla ta ipailak kan sika cha masapuɏʼn makwa si umaliʼn eɏgew.” Ot si hachi, impangatuwak si Ispiritun Apudyus ud langit. Ot intullongku umaammuy si tugew chi Ari. Ked ha kopyan chi hachiʼn umaammuy, mamilipilit un isun cha hachiʼn mangkangilaʼn byetu un kalanchaʼn jasper ya carnelian. Ya kilalligun chi tileg chi umaammuyala un isun chi siling chi byetu un kalanchaʼn emerald.* 4:3 2-3, Ezekiel 1:26-28 Awed bo chuwampuɏu ya opat un aammuyan un lampalikwos si hachiʼn aammuyan Ari, ked cha umaammuy, cha chuwampuɏu ya opat un mangipangpangu. Ked lasilupancha si mamputilak ya awed chi koronacha un byalituk. Ot awed bo leɏpu si umaammuyan Ari un sumsumlit un kilat ya kumichukichung un kuchuɏ. Ked ha sangwalan bo, awed cha pituʼn pagsilawan un gumilegileb, ked chicha pituʼn kalasi un Ispiritun Apudyus. Ked ha sangwalan bod chi hachiʼn umaammuyala, awed chi mallin-ong un byeybyey un isun chi tullong chi samling.
Awed bo cha lampalikwos si umaammuyan Ari un opat un parsua ked losan ata ochogcha ya sangwalancha. Ha osa, isun chi layun chi tullongla, ked ha mikadwa, isun chi byaka. Ked ha mikatlu, isun chi lupan chi tagu lupala, ked ha mikapat, isun chi bukaw un tumattattayap. Ked losan cha hachiʼn opat, sin-oolom cha payakcha ked losan bò ata, ya ulay bo long-egcha. 4:8 6-8, Ezekiel 1:5-6, 10-18 Eɏgewoncha ya labiyonchaʼn mangkankanta ked lappun ummillongan chi kankantacha un kalancha,
“Lappun miyisuwan chi kilabiɏun
chi Apu takuʼn Apudyus un Mallakabyelin,
ti siya kabiɏuwan. Siya illiinggew si luglugin cha losan,
ya awed bo si sala, ya iinggew bo si ing-inggala.” 4:8 Isaiah 6:2-3
Ked cha hachiʼn opat un matattagu un parsua, siyaʼd ikankantacha kilabiɏun chi hachiʼn umaammuy un Ari, ked chaychayawoncha ya manyamyamancha kan siya un matatagu si ing-inggala. Ked si hachiʼn mangkankantaancha, 10 mampalintuming cha hachiʼn chuwampuɏu ya opat un mangipangpangu si sangwalan chi hachiʼn umaammuy si malayawancha kan siya un matatagu si ing-inggala. Ot illiggacha koronacha si sangwalanla, ot ikankantacha,
11 “Apumi un Apudyus, kalobbongam un machayaw
gapu si kilabiɏum ya pallakabyelinlu,
ti sika langwa si losan. Ked gapu si ayatlu,
siya lakwaan ya lataguwan cha losan.”

*4:3 4:3 2-3, Ezekiel 1:26-28

4:8 4:8 6-8, Ezekiel 1:5-6, 10-18

4:8 4:8 Isaiah 6:2-3