15
Cha Pituʼn Anghel Ya Ha Alungus Cha Ligat
1 Ot si hachi, awed bo osaʼn lipaila ud langit un patunged lakaskaschaaw un sinyeɏ un makwa si umaliʼn eɏgew, ti awed cha pituʼn angheles un lalangchon si mangalungus un pituʼn ligat un makwa utla pita. Hachi cha ligat si alungus chi malusaan Apudyus kan cha tagu.
2 Ot intullongku malayatayaw un byeybyey un lakamsan si apuy. Ya intullongku bo cha langɏog si hachiʼn kaog-ogyat un ayam ya hachiʼn silan-ayam un issu-issula, ya cha losan un achipun lampameɏka si lambyeɏn chi ngachenla. Ked summisikedcha si teɏanteg chi byeybyey un ilooglencha arpa un illidchon Apudyus kan chicha. 3 Ot kilankantacha kantan Moses un lansimbi kan Apudyus si awi, ya kantan chi Keɏlilu. Kamatla kilantacha:
“Sikan Apu un Apudyus un Mallakabyelin,
lappun miyisuwan cha losan un killingwam un patunged kaskaschaaw!
Sika Arin cha losan un tagu si lubung,
patunged ustu-ustu ya pasig tuttuwa cha losan un kachawiyam!
4 Lappun achi umogyat kan sika si sala, Apu!
Ya lappun bod achi mangibyega si kilangatum,
ti lappun miyisuwan chi kilabiɏum.
Ked cha losan un tagu si lubung,
umalicha losan un malaychayaw kan sika
ti laawatanchaʼn ustu-ustu cha losan un pin-am koon.”
5 Lapalos ked, intullongku boʼn lilukat chi templo ud langit, ked mamàila hachiʼn chaɏom chi Kachayawan un Inggewan Apudyus. 6 Ot lummawa cha hachiʼn pituʼn angheles si hachiʼn templo un ilooglencha pituʼn ligat. Ked lasilupancha losan si mampeɏkas ya malilisiling un mamputilak, ya lisawigi si biɏukungcha bilalituk un takyed. 7 Ot ha osa kan cha hachiʼn opat un parsua ummoyla silin-ossa inwatwat kan cha hachiʼn pituʼn angheles chi chuyug un byalituk un lalaplu si sangan Apudyus un matatagu si ing-inggala. 8 Ked gapu si kilabiɏun Apudyus ya pallakabyelinla, losan asuk chi chaɏom chi templo, ked lappun makaslok inggala magamput cha pituʼn ligat un koon cha hachiʼn pituʼn angheles.