19
Ha Manlaglagsakancha Awed Ud Langit
1 Lagamput pu hachi, chingngeɏk chi mantobyeg un gingaʼn cha achu-achuʼn tagu ud langit, un ikankantacha,
“Machaychayaw si Apudyus! Siya abus un Malagu kan cha tagu,
machayaw ya mallakabyelin!
2 Katuttuwaan ya lalintog chi mangkukuisla kan cha tagu!
Chilusala hachiʼn byebyai un lanchilameg chi kilaputala,
siya langawis kan cha losan un tagu si allaʼn pita
ta mipaticha makabyasuɏ si byasuɏla.
Ya chilusala siya gapu si lamatoyala kan cha
lansimbi kan Apudyus.”
3 Ya kalancha boʼn langipokaw,
“Machaychayaw si Apudyus! Mipangatu si ing-inggala chi asuk
un lampeɏpu si lanchinchilameg un ili!”
4 Ked cha chuwampuɏu ya opat un mangipangpangu ya cha opat un parsua, losan cha lampalintuming un malayaw kan Apudyus un umaammuy si Mampangatala, ot kalancha, “O, Tuttuwa! Machaychayaw si Apudyus!”
Ha Mangkaseɏan Chi Keɏlilu
5 Oli pun chingngeɏk bo ginga un lampeɏpu si ummaammuyan Apudyus, un kalala, “Chayawonyu si Apudyus taku, chikayu losan un mansimbi ya losan un manchaychayaw kan siya. Ulay langatu willu labyabya, chayawonyu losan si Apudyus!”
6 Ot si hachi, chingngeɏk bo isun chi gingan cha achu-achuʼn tagu, un isun chi alaas chi tumeteub un chelum ya isun chi kichung chi kuchuɏ, un ip-ipkawcha,
“Machaychayaw si Apudyus! Ti siya abus chi mallakabyelin un
Apu taku un mangituray kan cha losan!
7 Matetteɏok taku ya mangganggalas taku ya chaychayawon
taku siya un kangatuwan!
Ti si sala, gummatong chi timpuʼn mangkaseɏan chi Keɏlilu,
ked lansasaggala hachiʼn asaw-ola, 8 ti laatod kan siya baruʼn silup un mamputilak un lappun akit mansala.” (Ha miyaligen chi hachiʼn silup, cha bibiɏuʼn pin-an cha tagun Apudyus killingkingwa.)
9 Ot kalan chi anghel kan sakon, “Igilim cha allaya: Pian cha hachiʼn laimbiteɏan si kaseɏn chi Keɏlilu.” Ya kalala bo, “Katuttuwaan cha hachi ti mismuʼn imbyegan Apudyus.”
10 Ot lampalintumingak un malayaw si hachiʼn anghel, ngim kalala, “Achim sakon chayawon! Abus si Apudyus un chayawom ked lappun uchum, ti osaak boʼn mansimbi kan Apudyus un isum ya cha bubuɏunlu, ked ooglen taku losan cha katuttuwaan un intudtuchun Jesus.” Ti ha katuttuwaan un intudtuchun Jesus, siya impakaawat cha propeta.
Ha Langɏogen Chi Langakabbyayu Si Mamputilak Un Kabyayu
11 Oli pun intullongkuʼn liwalit ud langit ot lummoswa osaʼn mamputilak un kabyayu. Ot hachiʼn langakabbyayu, langachalan si “Malagpati ya Katuttuwaan,” ti lalintog chi mangkukuisla ya mangubyatala kan cha kabusuɏla. 12 Ha atala ked isun chi gumilegileb un apuy. Ya achu-achu koronan chi ari si uɏula. Ked lagiliyan chi long-egla si ngachen un lappun mangagammu si piolaʼn uguchon lu achi abus siya. 13 Ha silupla ked laslop si chaɏa. Ked ha ingngachencha kan siya, “Ha Ugud Apudyus.” 14 Ked cha losan un suɏchachuʼd langit, un lakasilup si mamputilak, lituntun-udcha kan siya un langakabbyayucha bo si mangkaputilak un kabyayu. 15 Ot awed chi lummoswa si tupokla un mantachom un sabli ked siya mangabyakla kan cha losan un tagu si lubung un achipun mamati. Ya siya mangipangat kan chicha, ked patunged ustu-ustu mantuturayla ya lappun makaabyak kan siya. Ti si Apudyus un Mallakabyelin, ipailala bo manchuchusala si tagu un isun chi mangkupisan chi astan si astola. 16 Ked liigili ngachen si silupla ya eɏpula un, “Arin cha losan un ari ya Apun cha losan un ap-apu.”
17 Oli pun intullongku bo osaʼn anghel un summisiked si ilit. Ot pilokawala cha losan un sissiwit un sintatattayap ud langit, un kalala, “Wayyu, machagup kayu ta mangkakakan kayu si allaʼn chakeɏʼn piyastan Apudyus! 18 Wayyu, kalonyu lecheg cha ari ya pangat cha suɏchachu, susuɏchachu ya cha kakapitancha, cha kabyayu ya langakabbyayu, ya cha losan un tagu, lawaya ya musassu, labyabya ya langangatu.”
19 Oli pun intullongku bo hachiʼn kaog-ogyat un ayam ya cha losan un ari si allaʼn pita ya cha susuɏchachucha. Ked lachagupchaʼn lan-um-umung ta gubyatoncha hachiʼn langakabbyayu ya cha susuɏchachula. 20 Ngim lachokmaan chi hachiʼn kaog-ogyat un ayam ya ulay chi hachiʼn silan-propeta un pillakalong-egla un pin-a langwa si lakaskaschaaw ta malallutla kan cha losan un tagu un lameɏkaan si meykan chi hachiʼn ayam ya cha losan un taguʼn malaychayaw si hachiʼn silan-ayam un isula. Ked si hachiʼn lalokmaancha kan chicha, likop-eɏchaʼn matattagu si hachiʼn byeybyey un apuy un gumilegileb un asupli. 21 Ked cha losan un susuɏchachucha, lapatoycha si sabli un lummoswa si tupok chi hachiʼn langakabbyayu si mamputilak un kabyayu. Ot lambusbusugen cha losan un sissiwit cha lechegcha.