1 Lagamput pu hachi, intullongku baruʼn langit ya baruʼn pita, ti laumas chi chamuʼn langit ya pita ya byeybyey. 2 Ot intullongku lasantuwan un siudad, siya baruʼn Jerusalem, un chumedchedcheɏa un lampeɏpu kan Apudyus ud langit, un isun chi mangkaseɏʼn byebyai un lansilup si laleman ya lakasagalan mangabot si mangasawa kan siya. 3 Ot chingngeɏk chi mantobyeg un ginga un lampeɏpu si ummaammuyan ari un kalala, “Gummatong chi mikabyeɏoyan Apudyus kan cha tagu, ked si sala, mantagula chicha. Iinggew si Apudyus kan chicha ya siya abus chi Apudyus un chaychayawoncha.*21:3 2 Corinthians 6:16 4 Ked pulasala cha losan un luwacha. Lappun kasin matoy ya lappun kasin malomchom ya man-ibin ya lappun bo kasin malligatan, ti losan un laklakwa kan chicha si chamu un pita, lummakpuscha.”

5 Oli pun kalan chi hachiʼn ummaammuy un ari, “Si sala, pabiɏuwok cha losan un byaleg.” Ot kalala bo kasin kan sakon, “Igilim cha allaʼn ilugudku, ti tuttuwa ya mantegochen.”

6 Ya kalala bo kan sakon, “Lagamput! Sakon chi Alpha un luglugi ya sakon bo Omega un alungus cha losan. Ked lu silu mauwaw, pailumak si chelum un meɏpu si chegsi un tumagu si ing-inggala un lappun byayedla. 7 Ya ipatawidku losan cha alla kan cha achipun paabyak kan Satalas, ya mambyalilok bo chicha alakku ta sakon chi man-Apudyuscha. 8 Ngim kaog-ogyat chi mambyalagen cha ogyatan, cha lappun pammaticha, cha langwa si kabibiin, cha kapapatoy, cha pin-a makachegchegas, cha mansansalamangka, cha malaychayaw si silan-apudyus, ya cha pin-a mantuntulli, ti lappun patinggan chi iinggewancha si byeybyey un asupliʼn gumilegileb, ked hachi kalanchaʼn mikadwaʼn otoy.”

9 Ot kummatam kan sakon chi osa kan cha pituʼn angheles un langisuyat si hachiʼn illinggew si pituʼn chuyug un lalaplu si alungus cha ligligat, ot kalala, “Wilu ta ipailak kan sika byebyai un asaw-on chi Keɏlilu.” 10 Ot tilingngeɏak si Ispiritun Apudyus, ot illiyoyak si anghel si tuktuk chi mantaklang un bilig. Ot impailala kan sakon chi lasantuwan un siudad un Jerusalem un chumedchedcheɏa un lampeɏpuʼd langit kan Apudyus. 11 Ked malilisiling chi hachiʼn ili gapu si kilabiɏun Apudyus. Ked malilisiling un isun chi langilaʼn byetu, isun chi jasper ya lagechawan un crystal. 12 Ked laaɏed chi hachiʼn ili si mantaklang un tuping, un lasawaɏan si chuwa sawangla, ya laguwechaan bo si lasawaɏan si chuwa un angheles. Ked cha sawangla liigili cha ngachen cha lasawaɏan si chuwa un alak Israel. 13 Cha sawangla, tiɏu langkapon si sumileɏan ilit, tiɏu bo kapon si mipisukan ilit, tiɏu bo kapon chaya ya tiɏu langkapon si lagud. 14 Hachiʼn aɏed, lasawaɏan si chuwa lipon-ed un tukudla un liigiliyan cha ngachen cha lasawaɏan si chuwa un apostoles chi Keɏlilu.

15 Hachiʼn anghel un lakaugud kan sakon, ilooglela bilalituk un palaisong un mangisongla si hachiʼn siudad, cha sawangla ya cha aɏedla. 16 Hachiʼn siudad, man-iisu kaanchula, kaeɏwala ya kataklangla. Ilisong pun chi anghel chi hachiʼn siudad, umoy si chuwaʼn libu ya opat gasut un kilometro kaanchula, siya bo kaeɏwala ya ulay chi kataklangla. 17 Ilisongla bo aɏedla, ked ha kataklangla, lasuluk si olompuɏu ya olom un metro. 18 Hachiʼn siudad, losan bilalituk ya malilisiling un isun chi samling. Ked ha aɏedlaʼn tiluping, losan jasper un langilaʼn byetu. 19 Ha pon-edlaʼn lasawaɏan si chuwa, laeɏ-eɏkusancha si mangkangkalasi un langilaʼn byetu. Ha ummula ked byetuʼn jasper; ha mikadwa byetuʼn sapphire; ha mikatlu byetuʼn agate; ha maikapat byetuʼn emerald; 20 ha mikalima, onyx; ha mikalom, carnelian; ha mikapitu, chrysolite; ha mikawaɏu, beryl; ha mikasiyam, topaz; ha mikasimpuɏu, chrysoprase; ha mikasimpuɏu ya ossaan, jacinth; ked ha mikasimpuɏu ya chuwa, amethyst. 21 Cha simpuɏu ya chuwaʼn sawang ked perlas, sin-ossa un mangkachakkeɏʼn perlas. Ked ha kesa si hachiʼn siudad, bilalituk losan un isun chi siling chi samling.

22 Ngim lappun templo si intullongku si hachiʼn siudad, ti ha mantemplocha si Apudyus un Mallakabyelin un Ap-apu ya Keɏlilu. 23 Hachiʼn siudad, achipunla masapuɏ ilit ya seɏeg un silawla ti masilawan si lilang chi kilachayaw Apudyus ya lilang chi Keɏlilu. 24 Ked losan cha tagu si lubung, masilawancha si lilang chi hachiʼn siudad, ked cha losan un ari si lubung, iyoycha kilabyaklangcha si hachiʼn siudad. 25 Cha sawangla, miwawayyangwang un lappun miyolobyela ti achipun lumabi. 26 Ked losan boʼn kilabyaklang ya kilachayaw chi lubung, maiyoycha losan si hachiʼn siudad. 27 Ngim achipun makwa un lumlok cha losan un achipun lapeɏkas si sangwalan Apudyus, isun cha matuli ya mangwa si kabibiin. Ti abus cha lilista ngachenla si liblun chi biyeg un ay-ayyuwalan chi Keɏlilu makaslok si hachiʼn siudad.