1 Ked sikaʼn manguis si kilalawwing cha uchum, achim kalan un milisim chi machusaam kan Apudyus, ulay lu silukaʼn tagu. Ta lu kuisom cha kilalawwing cha uchum ya koom bo cha pin-acha killingwa, siyad koom chi machusaam kan Apudyus. 2 Ti ammu taku un ustu-ustu mangkukuis Apudyus kan cha taguʼn mangwa si kakammatchiʼn lawwing. 3 Ngim sikaʼn manguis si kilalawwing cha uchum, un siya bo pin-am koon, kalam pun lu mailisim chi machusaam kan Apudyus? 4 Willu amsiwom chi manchechegula, kilaattom ya kilaalus Apudyus? Sigulachuʼn ammum chi kilaalus Apudyus ti piolaʼn ibyabyawim cha lawwing un pin-am killingwa.

5 Ngim gapu ta latangkin chi somsomoklu, chogchog-am chi machusaam kan Apudyus si eɏgew un gumatngan chi ustu-ustuʼn manguisala kan cha losan un tagu utla pita. 6 Ti sigulachuʼn idchon Apudyus si kacha tagu subyalit chi killingwacha.*2:6 Psalm 62:12; Proverbs 24:12 7 Ngim cha taguʼn mangipapati un mangwa si bibiɏu, michayaw, mapotgen ya makakuwacha si biyeg un mallalayun. Ti chicha mangidchen Apudyus si mallalayun un biyeg. 8 Ngim cha taguʼn singsingtoncha abus chi uwachaʼn bumaɏuwan kan achipuncha mamati si katuttuwaan ngim kooncha cha losan un lawwing, ked chicha mangipain-an Apudyus si sangala ya chusala. 9 Ked mapaligatan ya masigabyen cha losan un taguʼn pin-a mangmangwa si lawwing, ked umula cha Judio asiyot cha Gentil. 10 Ngim losan un tagu un mangwa si bibiɏuwon Apudyus, ked michayawcha, mapotgencha ya lumin-awa bo somsomokcha. Ked umun-ula cha Judio asiyot cha Gentil. 11 Ti man-iisuwon Apudyus chi mangkukuisla kan cha losan, un lappun laksigola.†2:11 Deuteronomy 10:17

12 Ti losan un lakabyasuɏ ked maisila kan Apudyus ta machusacha si ing-inggala. Lu cha Gentil ked achipuncha ammu lintog Moses. Ked chakampun un lintog chi mambyeseɏan Apudyus un manguis kan chicha. Ngim cha Judio, ammucha hachiʼn lintog, ked siya mambyeseɏan Apudyus si manguisala kan chicha gapu ta achipuncha tungpaɏon. 13 Ti achipun Apudyus ibilang cha tagu lalintog gapu si mangammuwancha si lintog, ngim ha ibilanglaʼn lalintog un tagu, cha maluttuwa si lintog. 14 Lappun ammun cha Gentil si lintog Moses, ngim lu awatlaʼn kooncha ustu un intudtuchun chi lintog, hachi main-ala un laammuwancha ustu si somsomokcha, ulay lappun kan chicha lintog, lambyalin un lintog kan chicha. 15 Ked ipailacha un ammun chi somsomokcha cha ipakwan Apudyus si lintogla. Ha somsomokcha mangipaloklok un siya ustu, ti ha mismuʼn somsomokcha mangibyega lu bibiɏu willu lawwing cha pin-acha koon. 16 Ked katchi koon Apudyus un manguis si losan un tagu, ti lu gumatong chi hachiʼn eɏgew, kuison Jesu Kristu cha losan un litataɏu si somsomok. Siya ibyegbyegak un impakaammun chi Bibiɏuʼn Chameg.

17 Ked chikayuʼn Judio, kalanyu un Judio kayu un tagun Apudyus ya mantegod kayu si maluttuwaanyu si lintog un malagu kan chikayu. Ya ilastugyu langammuwanyu si tuttuwaʼn Apudyus. 18 Ya ammuyu bo pion Apudyus un koonyu ya lalaing kayu bo un mampili si kabiɏuwan, ti allat chi lintogla un maludtuchu kan chikayu. 19 Ya sigulachuʼn chikayu sinlobbong un mangichaɏan kan cha isun chi lakuɏap, ya chikayu bo isun chi silaw un malilaw kan cha inggew si gikbot. 20 Chikayu awed chi kalobbongala un maludtuchu kan cha pin-a mangwa si tilitingang, maludtuchu kan cha lappun ammucha si katuttuwaan. Ti awed kan chikayu hachiʼn lintog un siya ummachuwan chi ammuyu un katuttuwaan. 21 Lalaing kayu un mantudtuchu kan cha uchum, ngim achipunyu matudtuchuwan chi long-egyu! Ti ibyegbyegayu un achipun taku man-akaw, ngim pin-a kayu mit man-akaw! 22 Ya ibyegbyegayu bo un achi taku makachegchegas, ngim chikayu bo kachechegchegas! Ya kalanyu boʼn achipunta chayawon chi silan-apudyus, ngim man-akaw kayu si templocha! 23 Ipaspasweɏyu lintog Apudyus un awed kan chikayu, ngim chikayu bo mangibibiin kan Apudyus ti sumusupling kayu si lintogla! 24 Tuttuwa liigili si ugud Apudyus un kalala,

25 Chikayuʼn Judio, lapotog chi lasogyatanyu lu tuttuwaonyu lintog Apudyus un inggilin Moses. Ngim lu suplingonyu lintogla, lappun simbin chi lasogyatanyu ti isuyu cha achipun lasogyatan. 26 Ulay cha Gentil un achipun lasogyatan, lu tungpaɏoncha cha lintog, ibilang Apudyus chicha un isun chi lasogyatan. 27 Ked cha Gentil ulay lu achipuncha lasogyatan, ngim tutungpaɏoncha lintog, chicha malusa kan chikayuʼn Judio. Ti chikayu, ulay lu lasogyatan kayu ya awed bo liigiliʼn lintog kan chikayu, ngim siluplingyu lintog!

28 Lu lasogyatan chi osaʼn Judio, ked chakampun si piolaʼn ibyega un tuttuwan Judio. Chakampun un Judio chi osaʼn tagu gapu laing ta lasogyatan. 29 Ti cha tuttuwaʼn Judio, cha pilabiɏun Apudyus chi kilatatagucha un isun chi lasogyatan chi somsomokcha. Ked ha makwaan cha kamatchi, ked gapu si langkawachiyan chi Ispiritun Apudyus kan chicha un chakampun un gapu si langkawachiyan chi lintog. Cha taguʼn katchi, ulay achipun cha tagu chayawon siya, michayawcha kan Apudyus.