1 Gapu ta ibilang chitaku kan Apudyus lalintog gapu si pammati taku kan Kristu, laidchen taku si lin-awa un makatimpuyug kan Apudyus gapu si killingwan Apu takuʼn Jesu Kristu. 2 Ked gapu bo si pammati taku, mipati taku si kachegun Apudyus un liliklaon taku si sala. Ya gumalas taku gapu ta lamlamaon takuʼn mipati si michayawan Apudyus! 3 Chakampun un abus cha hachi gumalasan taku, ngim ulay lu mapampaligatan taku, ti ammu taku un cha ligat ked peɏoswaola alus. 4 Ta lu maalusan taku ligat, peɏoswaola bibiɏuʼn ugali un umalamong kan Apudyus, ked ha bibiɏuʼn ugali peɏoswaola lamlama. 5 Ked ha awed lamlamala kan Apudyus achipun machismaya, ti amod chi ayat Apudyus kan chitaku, ya illidchola Ispiritula ta inggew kan chitaku.

6 Ti hachi ustuʼn timpu un pililiyan Apudyus un lappun pay laing kabyeeɏan taku, latoy si Kristu gapu kan chitaku un malagbyasuɏ. 7 Lappun tagud meɏyed mangikatoy si mataguwan chi lalintog un tagu. Makwa lin un awed makaiteɏod un mangikatoy si mataguwan chi biɏunlaʼn ay-ayatola. 8 Ngim impailan Apudyus chi amod un ayatla kan chitaku, ti si hachiʼn malagbyasuɏ taku pay laing latoy si Kristu para kan chitaku.

9 Ked gapu si latoyala, imbilang Apudyus chitaku lalintog. Ked sigulachuʼn taguwola chitaku si sangan Apudyus un malusa kan cha losan un tagu. 10 Ti si awi, kabusuɏ chitaku kan Apudyus. Ngim si sala, pilaulin Apudyus chi mambibiɏulan taku kan siya gapu si latoyan chi Alakla. Ked si salaʼn bibiɏun chitaku kan Apudyus, sigulachuʼn matatagu taku gapu ta kasin latagu si Kristu. 11 Ngim chakampun un abus cha hachi, ti tuttuwaʼn pilagalas Apudyus chitaku gapu si killingwan Apu Jesu Kristu un siya langwa si lakabibiɏulan taku kan Apudyus.

12 Ummali byasuɏ utla lubung gapu si ossaan un tagu un si Adam ked ha lambyalagela ummali otoy. Ot lisapasap chi otoy si losan un tagu ti losan un tagu lakabyasuɏ.*5:12 Genesis 3:6 13 Ked ulay chi chaampun Apudyus mangidchen si lintogla kan Moses, sigud un lakabyasuɏ cha tagu. Ngim lu lappun lintog, lappun bo maibilang un byasuɏ. 14 Ngim lalipud si timpun Adam inggala kan Moses, latoy cha losan un tagu ti tilawidcha otoy, ulay lu ha byasuɏcha ked chakampun un isun chi byasuɏn Adam. Si Adam chi miyaligen chi umali un si Jesus.

15 Ngim lansillabyali lambyalagen chi killingwan cha allaʼn chuwa, ti ha libli un sagut Apudyus, chakampun un isun chi byasuɏn Adam. Tuttuwa un latoy cha achuʼn tagu gapu si byasuɏn Adam, ngim ha amo-amod un kachegun Apudyus ya ha libli un sagutla kan cha tagu ked gapu si kachegun Jesu Kristu. 16 Ked maila un tuttuwaʼn lansabyali illoswan chi lakabyasuɏan Adam si hachiʼn libli un sagut un illidchon Apudyus. Ti ha ossaan un lakabyasuɏ, illoswala machusaan cha losan un tagu. Ngim ha libli un sagut un illidchon Apudyus, ulay amod chi byasuɏn cha tagu, makwaʼn mapakawan ya mibilang taku lalintog kan Siya. 17 Tuttuwaʼn gapu si byasuɏn chi ossaan un tagu, lanturay chi otoy. Ngim achipun miyisu si killingwan Jesu Kristu! Ti cha losan un mangawat si amod un kachegun Apudyus ya libli un sagutla ked mibilangcha lalintog, makatagucha kan Apudyus si ing-inggala ya makaturaycha bo kan Siya.

18 Ked ha iloswan chi ossaan un byasuɏʼn killingwan Adam, siya machusaan cha losan un tagu. Ngim ha iloswan bo chi lalintog un killingwan Kristu, siya mibilangan cha losan un tagu kan Apudyus lalintog ya illidchola kan chitaku biyeg un mallalayun. 19 Ked gapu si achipun chi ossaan un tagu un si Adam tummungpaɏan kan Apudyus, lisapasap un malagbyasuɏ cha losan un tagu. Ngim gapu bo si tummungpaɏan chi osaʼn tagu un si Jesu Kristu, makwa un mibilang cha losan un tagu lalintog kan Apudyus.

20 Ha langidchen Apudyus si lintog kan Moses, taplu umachu-achu makabyasuɏ. Ngim ulay lu machogchog-an chi makabyasuɏan cha tagu, maam-amod bo kachegun Apudyus un tumuɏung kan chitaku. 21 Ti ha chamu, byasuɏ mangituray si tagu, ked siya mangipuyut si matoyancha. Ngim si sala, ha kachegun Apudyus chi mangituray ked siya mangibilangan Apudyus kan chitaku lalintog gapu si killingwan Apu takuʼn Jesu Kristu un siya mataguwan taku si ing-inggala.