1 Losan un tagu, masapuɏʼn potgoncha cha mangituray si gubillu, ti Apudyus chi langatod si kalobbonganchaʼn manturay. Ti si Apudyus chi langisaed kan cha turay. 2 Ked losan un sumupling si manturay, sumupling bo si chilutukan Apudyus, ked cha hachiʼn sumusupling machusacha. 3 Chakampun un cha allaʼn mangwa si bibiɏu umogyat kan cha turay, ti cha allaʼn mangwa si lawwing cha umogyat kan chicha. Ked lu pionyuʼn achipun umogyat si manturay, siyad koonyu cha ustu, ked siya malayawancha kan chikayu. 4 Ti cha manturay, chicha isun chi mansimbi kan Apudyus para si bumaɏuwanyu. Ngim lu lawwing cha koonyu, umogyat kayu otyan, ti alla kalobbongancha un malusa kan chikayu. Ti chicha mansimbi kan Apudyus un malusa kan cha mangwa si lawwing. 5 Ked masapuɏʼn potgon taku cha manturay, chakampun un abus chi mangilisiyan taku si chusan Apudyus, ngim gapu ta mampeɏkas chi somsomok taku.

6 Ked allaya bo gapun chi mamayachen taku si bugis taku. Ti cha manturay ked mansimsimbicha kan Apudyus si mangwaancha si kawachicha. 7 Ked byayachen taku cha utang taku kan chicha. Idchon taku bugis cha salikwa taku. Ked masapuɏʼn potgon taku ya chayawon taku cha allaʼn mapotgen.

8 Masapuɏʼn amilon taku byayachen cha losan un utang taku, ta abus chi utang takuʼn achipun magamput un ha man-asiay-ayatan takuʼn mangkakadwa. Ti ha taguʼn mangay-ayat si biɏunla, siya lalungpeɏ si losan un lintog. 9 Ti cha bilin, “Achika makachegchegas, Achika pumatoy, Achika man-akaw, Achika maagum kan cha uwan cha uchum.”*13:9 Exodus 20:13-15; Deut. 5:17-19, 21 Ked losan cha allaʼn bilin lasalip-ut si ossaan un bilin un kalala, “Ayatom chi asintatagum un isun chi man-aayatlu si long-eglu.”†13:9 Leviticus 19:18 10 Lu tuttuwa ayatlu si biɏunlu, achipun makwa un koom cha lawwing kan siya. Ked ha mangay-ayatan taku si biɏun taku, hachi malungpaɏan taku si losan un lintog.

11 Masapuɏʼn koon taku alla ti ammu taku un lapotog un timpu un mataguwan taku si sala. Ked sala timpuʼn bumangon taku un isun chi lasusuyop ti ummachali mataguwan taku si ing-inggala lu ha chamuʼn lamatiyan taku. 12 Ti tuttuwaʼn allà akit un magamput chi labi un manggikbot ya allà akit chi pumadchaala. Ked kaalon taku cha lawwing un isun chi pangot, ta siyad useɏon taku cha aggom chi padcha. 13 Ipupuut takuʼn mangwa si ustu un isun cha taguʼn lasilawan chi somsomokcha. Ked achi taku otyan kabubuuk, ya achi taku bo makachegchegas, ya achi taku mangwa si tilitingang, ya man-asilawwing ya man-iillapos. 14 Ngim ha koon taku otyan ked tuɏachon taku mangkokopyan Apu Jesu Kristu, ya achipun taku palubusan chi lawwing un pipion chi allaʼn long-eg taku.‡13:14 Itullongyu Galatians 3:27