32
1 “Dengngen yo ay langit ya daga din nay enak ibaga.
2 Din pamagbagak et sapay koma
ta kaman odan ya dono ay manibsibog sin daga.
Kaman koman odan ay manibsibog sin naganos ay mola
ya mamasbasa sin logam ay kagabgabay na.
3 Idaydayaw ko din ogalin Diyos ay wada ed daya,
dakayo ay ipogaw na et dad-aten yo din kinangato na.
4 Si Diyos di komakaman ay pankamangan yo,
am-in ay amagena et nalinteg ya kosto.
Matalek ay adi manbalbaliw sisya,
maga polos di ipaksaw na.
5 Ngem baken kayon matalek ay ipogaw na,
enggay adi kayo maibilang ay anak na,
tan managbasol ya makaetek kayo,
et say kaibabainan yo.
6 Ay siya baw na di isobalit yo en Yahweh ay Diyos yo?
Naong-ong kayo ya magay nemnem yo!
Sisya di Ama yo ya namarsua en dakayo,
sisya di nangipaad-ado en dakayo!
7 Nemnemen yo ed bayag,
damagen yo sin am-a yo mo sino di naamag.
8 Idi nansisianen Diyos ay Kangatoan din kaipoipogaw isnan daga,
indawtana din amin ay nasyon si daga da,
inkeddeng na di pantean di esa ya esa
ta say din naitoding ay dagan di Israelita
et omanay sin kaad-ado da.*Din wada ed ngato et din kanana sin Hebreo. Din kanana sin Septuagint et natken: Amin ay ili yan waday anghel Diyos ay dinotokana ay mangay-ayowan en daida.
9 Ngem pinili na din polin Jacob ay ipogaw na.
10 Sin lugar ay magay omili et dintenganas daida,
sin kadardaratan ay kad-an di dagem ay napigsa.
Sinalaknibana ya inayowanana si daida,
inbilang nas daida ay nabanol en sisya.
11 Kaman din iyat di agila ay mangitdo sin anak na
sin damo ay tomayawan da,
nakasagana din payak na
ay manikpaw mo ilaena ay mag-as da.
12 Ang-anggoy Diyos ay nangipango sin ipogaw na,
magay odom ay diyos si nanolong en daida.
13 Sin kadondontogan et nanturayenas daida,
pinakpakana sin amin ay maapit sin payew ya nom-a.
Ad-ado di anig sin kabatbatoan ay in-ina da.
Olay isdi yan gomabay din olivo ay nannan-aan das mantika.
14 Napnek da sin gatas di baka ya kalding da,
ya sin karnin di mankalalames ay animal da.
Pag din kamayatan ay bakakew di inani da
ya kam-isan ay arak din danom di obas da.
15 Binmaknang din ipogaw Diyos et kinmedse da,
nanpennek da ay nangan et tinmaba da.
Dinokogan da si Diyos ay namarsua en daida,
sinigaan da din manakabalin ay mangisalakan en daida.
16 Nan-imon si Diyos tan waday odom ay daydayawen da,
binmonget begew sin sinan didiyos da.
17 Baken si Diyos mo adi et anito di indatdatonan da,
baro ay sinan didiyos ay adi dinaydayaw di ap-apo da.
18 Dinokogan das Diyos ay nangidawat si biyag da,
din komakaman ay pankamangan da.
19 Binmonget si Diyos ay nangila sin inamag da,
et nilaksig nas daida ay an-ak na.
20 Kanana, ‘Adiak badangan daida
ta ilaek mo intoy pantongpalan da,
tan adi da matalek ya pag lawa di am-amagen da.
21 Nan-imonak sin sinan didiyos ay daydayawen da,
binmongetak begew sin didiyosen da ay baken tet-ewa.
Pan-aposek ya pabongetek daida
begew si kaipoipogaw ay laslasoyen da
ay mo maipanggep en sak-en et magay ammo da.†Roma 10:19.
22 Awni et bomidang ay kaman apoy din bonget ko,
amin ay wadas nan daga et mapooan to.
Olay abe din kad-an di natey ed Sheol ay kanan da
ya din naisaadan di dontog isnan daga.
23 Ibonton ko en daida di paspasamak ay lawlawa,
amin ay panak et maiturong en daida.
24 Awni et matey das betil, podot ya sakit ay magay agas na.
Ibaak di mankaaangat ay animal ya nagitaan ay eweg ay mangat en daida.
25 Ad-adoy matey si gobat ay maiwalang sin kalsada.
Olay sin beey da, matey das palalo ay egyat da.
Matey din babbaro ya babalasang,
momoyang ya naobanan.
26 Peslek koma amin si daida
ta malinglingan da sin labaw di daga.
27 Ngem adiak layden ay manlastog din kaibaw da.
Into et mo kanan da en inabak da
din ipogaw ko ay baken sak-en di nanosa,’
kinwanin Diyos ay namarsua.
28 Ngem adi maawatan din Israelita,
tan maga polos di nemnem da.
29 Adi da ammo di gapo ay naabak da,
adi da maawatan din napasamak en daida.
30 Apay nga inabak di es-esa di sinlibo?
Apay nga inabak di dodowa di sinpo ay libo?
Tan binaybay-an Yahweh ay Diyos da,
din komakaman ay pankamangan da
et dinokoganas daida.
31 Ammon din kalaban da ay baken manakabalin din diyos da
ay kaman din Diyos di Israelita.
32 Palalo ay lawlawa di nemnem din kalaban da
ay kaman din ipogaw ed Sodoma ya Gomorra.
Kaman dan obas ay manpait ya makasabidong di lames na,
33 kaman arak ay mapos gitan di eweg di kaiarigan da.
34 Adi linglingan Diyos din inamag di kalaban da,
sedsed-ena din kosto ay timpo ay panosaana en daida.
35 Kinwani na, ‘Sak-en di man-ibaes ya manobalit en daida.‡Roma 12:19; Hebreo 10:30.
Domteng di timpo ay maabak da,
asag-en di timpo ay madosa da.’
36 Ikalintegan Diyos din ipogaw na
mo ilaena ay enggay nakapsot da.
Seg-angana din mansilsilbi en sisya
mo ilaena ay magay kabaelan da
ya kaman magay nabay-an, bag-en ya baken bag-en, en daida.
37 Asi na damagen en daida,
‘Et into ngin din didiyosen ay nantalkan yo?
38 Indatdatonan yos daida si arak ya tabtaba.
May kod adi, mankedaw kayo si badang da.
Ilaen tako mo siya ay omali da.
39 Magay odom si tet-ewa ay Diyos mo adi et sak-en.
Amagek di laydek, mo enak peslen ono tagoen.
Mabalin ko ay pansakiten asiak agasan met laeng.
Magay makatopap mo waday laydek ay dosaen.
40 Ikayang ko din takkay ko ay mansapata.
Isapatak sin awak ko ay matmatago si eng-enggana,
41 ay mo palidek din somilsilap ay kampilan ko,
dadlonak ilaen ta nalinteg di iyat ko
ay mangokom ya manobalit sin lomiliget ay kaibaw ko.
42 Malamos din panak si dada da,
olay din nasogatan ya balod et matey da.
Ad-adoy peslek sin kampilan ko,
magay mabay-an sin papangolon di kalaban ko.’
43 Dakayo ay kaipoipogaw isnan daga,
makiragsak kayo sin ipogaw na,
tan si Diyos et dosaena din namse sin baa na.
Sisya di manobalit sin amin ay kalabana,
ngem pakawanena din basol di ipogaw na.”
44 Indaniw Moses ya si Josue ay anak Nun din kanta ay nay ta dengngen din Israelita.
Din Maodi Ay Inbilin Moses
45 Idi nakdeng ay inbagan Moses sin Israelita din bilbilin Diyos ay nay, kanana en daida, 46 “Ilaen yo ta dadlon yon nemnemen ya tongpalen amin da nan bilbilin ay inbagak en dakayo ed wani ay agew. Itdo yo sin an-ak yo ta ipapasnek da ay tongpalen din bilbilin Diyos. 47 Danay ay nait-itdo et baken owat kali ay magay olog na mo adi et say poon di biyag yo. Tongpalen yo dana ta omando di biyag yo sin daga ay okaen yo mo agadangen yo din ginawang ay Jordan.”
48 Sin doy met laeng ay agew, kanan Diyos en Moses, 49 “Emey ka ed Abarim ay kadondontogan sin ili ed Moab ay wada sin demang di Jerico. Mantikid ka sin dontog ay Nebo ta tamangem din ili ay Canaan ay siya din idawat ko sin Israelita. 50 Matey ka sin isdi ay dontog ay kaman din napasamak en Aaron ay agim ed dontog ay Hor, 51 tan nan-isoen yo ay adi kayon inpaila di talek yo en sak-en sin sangoanan di Israelita. Inbabain yos sak-en sin sangoanan di kaipoipogaw idi wada kayo sin kad-an di danom ed Meriba ay asag-en ed Kades ay sakop di lugar ay magay omili ay makwani en Zin. 52 Tamangem anggoy ngem adi ka makadateng sin lugar ay sana ay idawat ko sin Israelita.”
*32:8 Din wada ed ngato et din kanana sin Hebreo. Din kanana sin Septuagint et natken: Amin ay ili yan waday anghel Diyos ay dinotokana ay mangay-ayowan en daida.
‡32:35 Roma 12:19; Hebreo 10:30.