1 Din manglayad ay lomaing et laylaydena ay mabagbagaan, ngem din manigaan ay maitdoan yan magay nemnem na.

2 Laylayden Diyos din nalinteg, ngem dosaena din manplano si lawa.

3 Magay talna ay maidawat di basol, ngem din nalinteg yan maiarig si kaiw ay makneg di lamot na.

4 Din nalaing ay babai ay siged di ogali na et maiarig si korona ay kaidayawan asawa na, ngem din babai ay mangibabain en asawa na yan maiarig si sakit di tong-a ay mangabos si bikas.

5 Kosto din panggep di nalinteg, ngem sinisikap din panggep di makedse.

6 Din kalin di managbasol yan maiarig si ipogaw ay manseed si peslena, ngem din ibagan di nalinteg yan say mangisalakan en daida.

7 Mo maipababa din mangam-amag si lawa, enggay mamaga das eng-enggana, ngem din nalinteg yan komakaman din poli da.

8 Maidayaw di ipogaw gapo sin sirib na, ngem din magay nemnem na yan malaslasoy.

9 Maymayat di nababa di kasasaad na ay es-esa di katolong na*Di esa abe ay kaiologan nina sin Hebreo et: …ay mangiobla si katagoana… mo din agin ngangato ngem magay kanena.

10 Ayowanan din nalinteg din animal na, ngem din lawa ay ipogaw yan magay seg-ang na.

11 Mansobsobra si makan din nagaget ay mangobla si daga na, ngem din owat ad-adoy plano na yan magay nemnem na.

12 Gamgamen din makedse di magon-od da si lawa ay pamosposan, ngem din nalinteg yan maiarig si manlames ay kaiw ay makneg di lamot na.

13 Din managbasol ay ipogaw yan kaman makna si tagdey begew sin lawa ay ibagbaga na met laeng, ngem din nalinteg yan mailisi si problima.

14 Ad-ado ya maymayat di gon-gonan di ipogaw gapo sin kali na ay kaman met laeng magon-gonaan insigon sin inamag na.

15 Din naong-ong yan kanan da en pag kosto di am-amagen da, ngem din masirib yan dengngen da di pamagbaga.

16 Din naong-ong et adi makaitpe si bonget na, ngem din masirib yan gomiginek mo insoltoen da.

17 Din tet-ewa di itistigon di matalek ay ipogaw, ngem din baken matalek et pag etek di ibaga da.

18 Din nasakit ay kali yan kaman kampilan ay makasogat, ngem din kalin di masirib yan makaagas.

19 Din tet-ewa yan komakaman si eng-enggana, ngem din etek yan baken mabayag et maammoan.

20 Sikap di wadas nemnem di manplanos lawa, ngem ragsak di wada sin mangipawadas olnos.

21 Magay lawa ay mapasamak sin nalinteg, ngem din managbasol yan ad-adoy lawa ay pasamak sin biyag da.

22 Kaliliget Diyos din maetek, ngem laylaydena din matalek.

23 Din naannad yan adi na dad-aten din ammo na, ngem din naong-ong yan ingalawngaw na din magay silbi na.

24 Manbalin ay pangolo din nagaget, ngem manbalin ay bag-en din nasadot.

25 Din danag yan nadagsen ay bakbaklayen, ngem din mayat ay kali yan omiparagsak.

26 Din nalinteg yan itdo na di kosto ay danan sin iib-a na, ngem din mangam-amag si lawa yan iaw-awanas daida.

27 Mandagaang di nasadot tan adi na idawis din inanopana, ngem din nagaget yan nabanol ay kinabaknang di gon-odena.

28 Waday biyag sin danan di nalinteg. Din danan ay sana et adi maiturong sin pese.†Di esa abe ay kaiologan nina sin Hebreo et: …, ngem din danan di lawa et maiturong sin pese.