1 Mo ayagan daka ay makikan si nangato ay ipogaw, nemnemem mo sino di kasangsangom.*Di esa abe ay kaiologan nina sin Hebreo et: estem ay ilan din naisango en sik-a. 2 Mo naaklong ka, itpem. 3 Adi kan aklongan din mankanam-is ay makan, tan mabalin ay say pansikap na en sik-a.

4 Masirib ka koma ta adi kan palaloan di awak mo ay mangan-anap si panbaknangan. 5 Tan adi ka ammo yan bigla ay tomayaw din pilak mo ay kaman din titit ay agila.

6 Adi kan makikan si naimot ay ipogaw mo ayagan daka. Adi ka aklongan din mankanam-is ay makan ay inpasango na en sik-a, 7 tan nemnemnemena anggoy din gastos na. Olay mo kanana en mangamangan ka ngem baken naimposoan. 8 Iotam am-in ay kinan mo et masayang din mayat ay kalim.

9 Adi ka sayangen di kalim si esa ay naong-ong, tan adi na ammo ay banolen din magon-od na ay sirib sin pamagbagam.

10 Adi ka padendenen di sigod ay beddeng ya adi kan posen di dagan di olila, 11 tan manakabalin si Diyos ay mangitonton sin kalintegan da kontra en sik-a.

12 Dengngem di pamagbaga ya ipakat moy kabaelam ay man-adal.

13 Adi kan emegyat ay manoplit sin anak mo, tan adi matey mo say iyat mo di. 14 Di katet-ewa na, mabalin ay say kaisalakanana.

15 Anak ko, palalo di ragsak ko mo manemneman ka. 16 Naragsakak to mo dengngek ay kalin di masirib di iyat mo ay mankali.

17 Adi kan apalan din managbasol mo adi et kanayon ay patgem si Diyos. 18 Mo say iyat mo di, waday mayat ay namnamam sin tapin di agew yan sigurado ay matongpal.

19 Anak ko, dengngem nan pamagbagak. Manemneman ka koma ta say onodam din kosto. 20 Adi ka maitaptapi sin makabeteng ya naaklong. 21 Tan din kaman dadi ay ipogaw et kanayon ay masmaseyep da, isonga bomiteg da ya manbado das nabisngibisngit.

22 Dengngem din pamagbagan amam ay nakaotangam si biyag mo yan adi kan laslasoyen si inam mo enggay mabakes. 23 Ipakat mo din kabaelam ay mangadal si kosto ay todo ya sirib, pamagbaga ya panakaawat, yan adi kan linglinglingan. 24 Dadlon maragsakan din aman di nalinteg ya masirib begew en sisya. 25 Isonga paragsakem koma da amam en inam ay nangianak en sik-a.

26 Anak ko, estem ay dengngen din ibagak ya ilaem abe di kabibiyag ko ta say tadonem koma. 27 Din hostess ya din makikamkamalala yan maiarig das malosong ay bito. 28 Maiarig da si tollisan ay manseseed et ad-ado di lalaki ay iturong da si basol.

29 Sino di kanayon ay manproblima ya mansakit di nemnem na? Sino di kanayon ay makiibaw ya manriri? Sino di masogatan yan magay kosto ay gapo na? Sino di manbalangay mata na? 30 Daida di malabian manbegew si arak, tan laylayden da ay man-inom si nanlalaok ay arak. 31 Adi kan pasolisog sin arak olay manbalanga ay kaman mayat di kailaana sin baso. Manlamoyot kayman ay inomen, 32 ngem sin odi na yan kaman dakan kinat si nagitaan ay eweg. 33 Ad-adoy ilaem ay ol-olay yan baken kosto din nemnem mo ya kalim. 34 Enggay naolaw ka ya nagolo di nemnem mo ay kaiarigam di maseyep si bapor sin gawan di baybay sin timpon di pewek. 35 Et kanam to si nemnem mo, “Wadan samet di dinmespeg ono pinmat-o, ngem adi met mansakit. Magay liknak. Apay nga adiak makabangon ta daan ay man-inomak?”