Salmo 2
2
Din Ari Ay Dinotokan Diyos
Apay nga nanplano din nanasyon si magay silbi na?
Apay nga panggep da ay labanen si Diyos ay wada ed daya?
Din aari isnan daga, nasinop ya nansagana da
ta gobaten da si Diyos ya din ari ay dinotokana.
Kanan da, “Labanen tako din turay da
ta en tako makawaya.”
Ngem masis-iyek si Diyos sin trono na ed daya
ay manglaslasoy en daida.
Pag nan yamyaman si daida
et palalo di egyat da sin manpoos ay bonget na.
Kanana, “Din pinilik ay ari et insaad ko
ed Zion ay nasantoan ay dontog ko.”
Kanan din ari, “Ibagak din bilin Diyos Apo.
Kananan sak-en, ‘Sik-a din anak ko.
Ed wani ay agew, ipailak ay sak-en si tatang mo.
Mo mankedaw ka, amin ay nasyon et idawat ko,
amin ay wadas nan daga et tawid mo.
Awni et dadlon kan abaken daida,
ay kaman din kalakan di kagopakan di kalamba.’ ”
10 Isonga dakayo ay aari ya turay isnan daga,
dengngen yo nan pamagbaga.
11 Emegyat kayo ya patgen yo si Diyos koma
sin mansilsilbian yo en sisya.
12 Mandokmog kayo sin anak na ya manpakombaba kayo* Di esa abe ay kaiologan nina sin Hebreo et: Mandokmog ya manpakombaba kayo …
tan amangan mo bigla ay bomonget din Apo
et sigurado ay matey kayo.
Nagasat amin ay komamang en Diyos Apo.

*2:12 Di esa abe ay kaiologan nina sin Hebreo et: Mandokmog ya manpakombaba kayo