Salmo 27
27
Talek En Diyos Ya Kararag Ay Mankedaw Si Tolong Na
1 Si Diyos di manilsilaw sin enak pandanan,
sisya abe di omisalakan.
Gapo ta sisya di pankamangak,
maga polos di pan-egyatak.
2 Mo domoklos di lawa ay ipogaw ta pomse da,
daida ay kaibaw ko di maisokba yan maabak da.
3 Olay mo lomikob di ad-ado ay soldado,
maga polos di egyat ko.
Olay mo gomobat dadi ay kaibaw ko,
mantalekak pay dedan en Diyos ay Apo.
4 Esa anggoy di kinkindaw ko en Apo,
es-esa di panggep ko isnan biyag ko:
manteeak koma ay kanayon isnan Timplo na
ta mailak koma di am-in ay kinasiged na
ya ta manpaitdoak abe en sisya.
5 Tan sin timpon di ligat ko somalin sisya,
itabonas sak-en sin oneg di Timplo na.
Salaknibanas sak-en sin nakayang ay bato,
tan sidi, adi makaabot din kaibaw ko.
6 Awni et abakek din lomilikob ay kagobat ko,
et peteg di ragsak ko ay man-idaton si animal sin Timplo
yan ipigsak din kantak ay mangidaydayaw en Apo.
7 Dengngem koma mo mankararagak en sik-a, Apo.
Maseg-ang ka koma ta songbatam nan adawag ko.
8 Kanam en, “Omali kayo ay mandayaw en sak-en.”
Kanak abe, “Aw Apo, sik-a di enak daydayawen.”
9 Sak-en di baam, adi ka koma tomaytaynan,
adi ka omibonget ya omipakaan,
tan sik-a din kanayon ay en namadbadang,
sik-a, Apo, di Diyos ay mangisalakan.
10 Olay mo omiwasit da ama en ina,
sik-a pay ay Diyos di omil-ila.
11 Itdom ay Diyos di pandanak ay kosto
ta say nalinteg di kabibiyag ko,
tan nay ad-ado di kaibaw ko.
12 Adim ipalobos ay matongpal di panggep da,
tan pag etek di ipabpabasol da,
palalo di pangeg-egyat da.
13 Ngem ammok ay lak-amek to kasin san kinasiged mo,
olay ed wani ay kawadak ay matmatago.
14 Mantalek kayo en Diyos ay Apo,
mamati kayo ya papigsaen yo san nemnem yo.
Siya tet-ewa, mantalek kayo isnan Apo.