Salmo 39
39
Din Kinaaptik Di Biyag
1 Kanak en man-annadak ta adiak bomasol sin ibagak,
annadak din kalik sin kawadan di managbasol sin kad-ak.
2 Maga polos di inbagbagak si olay mayat,
ngem nasepsep ay naligatanak.
3 Sin nannemnemnemak, madandanaganak,
ya nasepsep abe ay binmongetak
enggana ay adiak makaitpe sin liknak,
et siya nay inbagak,
4 “Apo, ibagam koma mo pig-an di kateyak,
ipaammom di kaandon di panbiyagak.
5-6 Nan indawat mo ay panbiyagak yan sinkaattikan,
magay kabayag na sin pangilam.
Katet-ewa na, amin ay ipogaw yan siya nay iso da,
es-esay leng-ag ono owat alidong di kaiarigan da.
Magay silbin di pangipakatan das amin ay kabaelan da,
tan olay mo waday kinabaknang ay idolin da,
adi da ammoy mangon-od sin odi na.
7 Ed wani, sino pay di pantalkak?
Sik-a met anggoy di pannamnamaak.
8 Sin basbasol ko, omisalakan ka koma.
Adim ipalobos ay somisiyek da
di ipogaw ay magay nemnem na.
9 Igiginek ko, magay enak maibaga,
tan sik-a di nangamag sina.
10 Isaldeng mo koma ay domosa,
tan nay enggay namaga nan pigsa.
11 Begew sin basol di ipogaw yan dosaem,
maiarig kas bigis, tan din banolen da yan dadaelem.
Amin ay ipogaw yan owat kaman dagem.
12 Apo, dengngem koma ya patgam din kararag ko.
Man-og-ogaak ay mankararag en sik-a, Apo,
tan owatak mangili ay makidagos sin beey mo
ay kaman din inyat di ap-apo.
13 Isaldeng mo koma nan domosdosaam
ta manragsakak si sinkaattikan
ta asiak matey pag enggay kayman.”