Salmo 53
53
Din Kinalawan Di Am-in Ay Ipogaw
1 Din naong-ong yan magay Diyos si pannemnem da.
Dadlon makadadael din kabibiyag da
ya kadodogis di am-amagen da.
Magay olay esa si kosto di am-amagena.
2 Si Diyos ed langit, osdongana di ipogaw isnan daga
ta ilaena mo waday masirib en daida
ay manganap ta ammoan das sisya.
3 Ngem man-iiso da am-in ay lawlawa,
tan din kosto ay danan et tinaynan da.
Magay mangam-amag si kosto, maga di olay esa.
4 Kanan Diyos, “Ay daetan pay dana
ay mangam-amag si lawa!
Pig-an ngin di pannemneman da?
Din pamalpaligatan da sin ipogaw ko et nalaka en daida
ay kaman din kalakan di mangokmon si kanen da.
Sigaan da abe ay mankararag en sak-en ay Diyos da koma.”
5 Ngem awni et palalo di egyat da,
egyat ay maga polos ed idi di kais-iso na.
Tan si Diyos et iwalang na
din tong-an di kalaban di ipogaw na.
Dadlon abaken din Israelita
tan sinigaan Diyos daida.
6 Sapay koma ta si Diyos ay manbeey ed Zion sin Timplo na
et isalakana din Israelita ay ipogaw na.
Am-in ay polin Israel et maragsakan da koma
mo ipataolin Diyos din sigod ay kinabaknang da.