Salmo 55
55
Kararag Di Ipogaw Ay Linipotan Di Gait Na
1 Dengngem koma ay Diyos nan kararag ko,
adim kod pandokogan nan adawag ko.
2 Dengngem kod ta somongbat ka,
tan nay magay talnak begew si problima.
3 Din kalaban ko yan bomogbogaw da,
emegyatak sin pangeg-egyat da.
Pomalpaligat da ya omililiget da.
4 Palalo ay madandanaganak, emegyatak si kateyak.
5 Palaloy egyat ko et manpayegpegak.
6 Mo kamanak koman kalapati ta way payak ko,
tomayawak ay man-anap si pantalnaan di nemnem ko.
7 Tomayawak ay omaddawi
ta enak mantetee sin lugar ay magay omili.
8 Dalasek ay man-anap si pansidomak
gapo sin napigsa ay dagem ya pewek.
9 Apo, iturong mo koma
ta adi da mankikinaawatan si kali da.
Tan di mailak sin siyodad et siya na:
palpaligaten da di iib-a da
ya golo di am-amagen da.
10 Inag-agew ya linablabi ay likelikeden da,
kedse ya problima di am-amagen da
sin amin ay soli na.
11 Panangdadael di maam-amag sin siyodad ay sana,
sin kakalsada, ad-adoy sowitiken ya paligaten da.
12 Mo kalaban ko di lomaslasoy, anosak koma.
Mabalin abe ay ilisiak daida.
13 Ngem din nangamag isna
et esa ay gayyem ya kabsat, esa ay ib-a.
14 Ed idi, mayat di panagkadwa mi ay dowa,
sin Timplo yan mandaydayaw kamin sik-a.
15 Masapsapa koma din kalaban ko ay matey.
Emey da koma ay sibibiyag sin kad-an di natey,*Laydena ay kalien, mabigla koma di kateyan da. Ilaen din napasamak en da Datan en Abiram sin Bilbilang 16:31-33.
tan mo daida, kaman dan panbeeyan di lawa,
pag lawa di nemnemnemen da.
16 Ngem mankedawak si badang mo et omisalakan ka.
17 Inagsapa, minasdem ya linablabi, Apo,
ay dengngem din adawag ya bayeweng ko.
18 Mantitinolong din ad-ado ay kalaban ko,
ngem omisalakan ka et adiak maan-ano.
19 Sik-a ay Diyos ay nanturay manipod sin logi na,
patgam koma din kararag ko et abakem daida,
tan adi da manbalbaliw gapo ta adi da emegyat en sik-a.
20 Din gait ko ed idi yan kontraena din gagayyem na,
dinokogana din kari na.
21 Din kali na yan nalamlamoyot mo mantikilya ya lana,
ngem matadem ay kampilan di kaiarigana,
sin nemnem na yan way liget na.
22 Apo, italek min sik-a din problima mi
et salaknibam dakami,
adi ka baybay-an ay maabak kami.
23 Makapese da ya maetek da,
ngem sik-a ay Diyos yan iturong mos daida sin kaot da
et matey da ay masapsapa.
Ngem sak-en pay, mantalekak en sik-a.
*55:15 Laydena ay kalien, mabigla koma di kateyan da. Ilaen din napasamak en da Datan en Abiram sin Bilbilang 16:31-33.