Salmo 64
64
Din Panosaan Diyos Sin Makedse Ay Ipogaw
1 Apo, dengngem koma nan adawag ko,
isalakan mo kod din biyag ko
sin kaeegyat ay kalaban ko.
2 Omisalakan ka koma
sin planon di bonggoy di makedse ay nay da.
3 Kaman kampilan ay paliden da din dila da,
kaman pana din makasabidong ay kali da.
4 Din nalinteg ay ipogaw yan sed-en da
ta bigla ay panaen da,
maga polos di egyat da.
5 Manbabadang da sin lawa ay panggep da,
pantotolagan da di iyat da ay mangiamag sin tagdey da.
Kanan da en magay mangila en daida.
6 Manplano das lawa yan kanan da
en kostokosto din plano da.
Adi kaaw-awatan di nemnem di ipogaw, ay baken siya?
7 Ngem panaen Diyos daida
et bigla ay masogatan da.
8 Gapo sin kali da met laeng yan dadaelen Diyos daida,
et masdaaw amin ay mangila sin mapasamak en daida.
9 Et amin ay ipogaw yan emegyat dan to,
nemnemen ya dad-aten da din inamag di Apo.
10 Amin ay nalinteg, manragsak da koma
gapo sin inamag na.
Mankamang da koman sisya ya idaydayaw da.