Salmo 69
69
Adawag Di Ipogaw Ay Ad-adoy Ligat Na
1 Omisalakan ka koma, Apo,
tan nay enggay dinmateng din danom sin bagang ko.
2 Sin malosong ay pitek yan malmalnedak,
magay kosto ay pan-gatinak.
Wadaak sin malosong ay danom,
dandaniak malned begew sin dalloyon.
3 Nankedakedawak si badang mo et nabbayak,
enggay nasaekak ya linmadag pay nan matak
gapo si kaoogak
sin nangan-anapak en sik-a ay Diyos ay pantaltalkak.
4 Ad-ad-ado mo din book ko
din omililiget ay magay gapo.
Ad-ado din kaeegyat ay kalaban ko,
layden da ay domadael, Apo.
Intoy iyat ko pay ay mangitaoli koma
si banag ay adiak met ina?
5 Apo, ammom di kinaong-ong ko,
adi mailibak en sik-a di basol ko.
6 Yahweh ay Diyos ay Kangatoan di Turay na
ay daydayawen di Israelita,
baken koman sak-en di gapo na
ay maibabain din mantalek ya mandayaw en sik-a.
7 Naibabainak gapon sik-a, Apo.
8 Nanbalinak ay mangili sin kakabsat ko.
9 Kaman kaiw ay mapoppooan di kasasaad ko
begew sin palalo ay pangisaksakitak sin beey mo.
Din panglaslasoyan di ipogaw en sik-a
et ibilang ko ay sak-en met laeng di laslasoyen da.
10 Idi nanlolowaak ya init-itpek di dagaang ko,*Siya na din kanana sin Hebreo (MT). Din kanana abe sin LXX ya Syriac et: Idi inbabak din awak ko sin nangit-itpeak si dagaang ko, … linmaslasoy da.
11 Sin nangibadoak si sako ay mangipailas ladingit ko, sinmis-iyek da.
12 Sak-en di ol-oliten da sin kakalsada,
din makabeteng yan sak-en di turong di kanta da.
13 Ngem sak-en pay, mankararagak en sik-a,
sin timpo ay laydem, somongbat ka koma.
Gapo sin dakdake ay layad mo ay magay kolang na,
tongpalem koma ay Diyos din karim ay omisalakan ka.
14 Nay ay lomlomnedak sin pitek. Komay-at ka!
Somalaknib ka kod sin kalaban ko ay nay da.
Malosong ay danom di kad-ak, omisalakan ka!
15 Adim kod ipalobos ay maianodak ono malnedak,
bomadang ka into et ya mateyak.
16 Patgam kod din kararag ko
gapo sin kinasiged di adi manbalbaliw ay layad mo,
somagong ka gapo sin dakdake ay seg-ang mo.
17 Adi ka koman itabonan nan baam, Apo,
songbatam koma ay dagos nan kararag ko,
tan nay palalo di ligat ko.
18 Somag-en ka ta omisalakan ka sin kalaban ko.
19 Ammom din omin-insoltoan da,
omibabain ya omipalawlawa da,
amin ay kalaban ko, ammom daida.
20 Mansakit di nemnem ko
gapo sin en da pangin-insolto
et palaloy ladingit ko.
Ninamnamak en waday someg-ang,
ngem maga di madtengan.
Kanak en waday lomiwliwa,
ngem kambaw et maga.
21 Idi mandagaangak, manpait ay kaman sabidong di inpakan da,
idi manbigawak, soka di inpainom da.
22 Sapay koma ta bigla ay madpap da
sin pakipangpanganan da,
kaman titit ay sin tagdey yan makna da
ono animal ay sin bito yan mag-as da
olay mo kanan da en natalna di biyag da.†Siya na di esa ay kaiologan di Hebreo. Di esa abe ay kaiologana et: …mag-as da, daida ya din gagait da. Din kanana abe sin LXX ya Vulgate et: …mag-as da ta say kosto ay madosa da.
23 Magodab da koma abe ta say adi da makaila
dowan da aben mabobok-ong si eng-enggana.
24 Ipalak-am mo koma din palalo ay bonget mo en daida
ta maedasan da sin inkeddeng mo ay dosa.
25 Dadaelem koma din kampo da
yan adi kan ipalobos ay way makalasat en daida.
26 Tan palpaligaten da din enggay dinosam,
yan sepsepen da ay sakitan din sinogatam.‡Siya na din kanana sin LXX. Din kanana abe sin Hebreo et: yan ap-apaten da din ligat di sinogatam.
27 Nemnemem koma amin di basol da
sin pangokomam en daida
ya adi kan itapi ay isalakan daida.
28 Ponasem koman ngadan da
sin libro ay naisolatan di ngadngadan din waday biyag na,
sin listaan di nalinteg adi kan ibilang daida.
29 Ngem sak-en yan palpaligaten da,
omisalakan ya somalaknib ka koma.
30 Idayaw kos Diyos babaen si kankanta
ya bigbigek di kinangato na
sin man-iyamanak en sisya.
31 Tan siya dana di mas laylaydena
mo din maidaton ay bomaro ay baka.
32 Malaydan din mapalpaligat mo ilaen da na,
din manaydayaw en Diyos et mapapigsa din nemnem da.
33 Tan din kakkaasi, patgan Diyos din kararag da,
ya adi nan baybay-an din naibabalod ay ipogaw na.
34 Dayawen yo si Diyos, dakayo ay langit ya daga,
baybay ya amin ay manbibiyag en daida.
35 Tan isalakan Diyos ed Zion,
din kailiili ed Juda, amagena kasin.
Manbeey dan to isdi din ipogaw na
et okaen da di ay daga.
36 Tawiden din polin di baa na,
amin ay malaydan en Diyos et isdi ay mantee da.
*69:10 Siya na din kanana sin Hebreo (MT). Din kanana abe sin LXX ya Syriac et: Idi inbabak din awak ko sin nangit-itpeak si dagaang ko, …
†69:22 Siya na di esa ay kaiologan di Hebreo. Di esa abe ay kaiologana et: …mag-as da, daida ya din gagait da. Din kanana abe sin LXX ya Vulgate et: …mag-as da ta say kosto ay madosa da.
‡69:26 Siya na din kanana sin LXX. Din kanana abe sin Hebreo et: yan ap-apaten da din ligat di sinogatam.