Salmo 76
76
Si Diyos Di Mangabak
1 Mandinamag di ngadan Diyos ed Juda,
ed Israel yan madaydayaw sisya.
2 Ed Zion ay sakop di Jerusalem di panteana.
3 Isdi yan ginotlo na din panan di kalabana.
Dinadael na din kasay ya kampilan da,
dinadael na amin ay armas da.
4 Nakaskasdaaw di koniniing mo, Apo!
Nangatngato ka mo din dontog ay nangabakam si kalaban mo.
5 Nakoskosan di nankatotoled ay soldado da
sin armas ya odom ay sanikwa da.
Kaman dan naseseyep, tan enggay natey da,
magay silbin di bikas ya laing da.
6 Diyos ay dinaydayaw Jacob, idi niyamyamam daida,
natokang da pati din kabayo da.
7 Palalo ay napateg ya maegyatan ka,
magay makaitoled ay somango en sik-a
mo bomonget ka.
8-9 Ed langit, pinmika ka ta ikeddeng moy sentensiya,
et ginmiginek amin ay wada sin daga si egyat da,
sin nangokomam en daida
ta maisalakan amin ay mapalpaligat isnan daga.
10 Begew sin bonget di ipogaw,
masepsep ay en ka maidayaw.
Olay din bonget da ay nabay-an,
iatip mo ay kaman mon kampilan.*Baken nalawag din versikulo ay nay sin Hebreo. Di esa ay kaiologana et: Din makalasat sin bonget mo, pomika da sin nanliniked mo. Wada abey odom ay kaiologana sin odom ay Biblia.
11 Tongpalen yo din kari yo en Yahweh ay Diyos yo.
Dakayo ay nanasyon, idawat yon sagot yo
en Diyos ay lebbeng na ay egyatan ya patgen yo.
12 Tan ipababa na din papangolo ay nangato di nemnem da,
din aari isnan daga yan emegyat da en sisya.
*76:10 Baken nalawag din versikulo ay nay sin Hebreo. Di esa ay kaiologana et: Din makalasat sin bonget mo, pomika da sin nanliniked mo. Wada abey odom ay kaiologana sin odom ay Biblia.