Salmo 102
102
Kararag Di Ipogaw Ay Manligligat
1 Apo, dengngem kod nan kararag ko
ta patgam nan adawag ko
ay mankedaw si badang mo.
2 Adi ka kod dokogan sak-en, Apo,
sin timpon di ligat ko.
Dengngem kod nan kararag ko
ta sin timpo ay kedawek din badang mo,
songbatam ay dagos, Apo.
3 Tan maomas ay kaman asok nan biyag ko,
kaman man-atong ay pogon nan awak ko.
4 Maiarigak si nango ay logam,
enggay magay ganas ko ay mangan.
5 Palalo di bayeweng ko,
owat tong-a ya kodil nan awak ko.
6 Kamanak titit sin lugar ay magay omili,
kamanak kop sin nataynan ya nadadael ay ili.
7 Adiak kaseyep olay bomaktadak,
naladingit ay titit sin toktok di beey di kaiarigak.
8 Maninsin-agew ay lomaslasoy din kalaban ko,
os-osalen das baos din ngadan ko.
9 Kamanak mangmangan si dap-o,*Din ogalin di manladladingit ay Judio et en tinmokdo sin kad-an di naiwasit ay dap-o. Piney-ana abes dap-o din toktok na.
din lowak yan pakiin-inom ko
10 gapo sin palalo ay bonget mo,
tan pinidit mos sak-en ya inwasit mo.
11 Nan biyag ko yan kaman alidong sin masdem
ya kaman mangmango ay logam.
12 Ngem manturay kas eng-enggana, Apo,
ya kanayon ay mandinamag din ngadan mo.
13 Seg-angam to ed Zion et pomika ka,
tan dinomteng din kosto ay timpo ay seg-angam sisya.
14 Tan olay mo nadadael din siyodad ay sana
ya enggay naiwalawalang din bato ay amag na,
patpatgen pay dedan din mansilsilbin sik-a,
wada met laeng di seg-ang da sin ili da.
15 Patgen to din nanasyon sik-a, Apo,
amin ay ari isnan daga et emegyat dan to
sin panakabalin mo.
16 Tan ipailam din sana ay panakabalin mo
sin kasin mon pangamagan ed Zion, Apo.
17 Awni et dengngem ya patgam to
din kararag di nabaybay-an ay ipogaw mo.
18 Isolat yo din inam-amag di Apo
ta say din maisokat en datako sin omal-ali ay timpo
yan dayawen dan to din Apo.
19 Isolat yo ay si Diyos et wada
sin nasantoan ay kad-ana ed daya,
yan inosdongana din daga
20 ta din bayeweng di balod yan dengngena
ya din nakeddengan ay matey et isalakana.
21 Et mandinamag to ed Zion din ngadana,
ed Jerusalem, daydayawen dan tos sisya
22 mo din man-ili sin am-in ay nasyon, matopog dan to
ay mandayaw en Apo.
23 Daanak makay yan inmipakapsot ka, Apo,
inpaaptik mo din biyag ko.
24 Diyos ko, adi ka kod sapaen ay taolien nan biyag ko,
tan magay pap-eng di biyag mo.
25 Ed bayag, insaad mo din lanad di daga
ya inamag mo am-in ay wadad daya.
26 Mamaga dan to ngem sik-a pay yan komakaman ka.
Kaman dan bado, domaan ya masokatan da,
tan awni et sokatam daida.
27 Ngem mo sik-a pay yan komakaman ka,
din biyag mo et magay pap-eng na.
28 Din aan-ak mi, dakami ay mansilsilbi en sik-a,
awni et natalna di biyag da.
Salaknibam to din poli da
et maga di pandanagan da.
*102:9 Din ogalin di manladladingit ay Judio et en tinmokdo sin kad-an di naiwasit ay dap-o. Piney-ana abes dap-o din toktok na.