Salmo 135
135
Din Kinasiged Ya Kinangaton Diyos
1 Madaydayaw din Apo!
Idaydayaw yo din ngadana,
dakayo ay mansilsilbi en sisya,
2 dakayo ay mansilsilbi sin beey di Apo,
sin Timplon Diyos tako.
3 Dayawen tako tan siged sisya,
ikanta tako din ngadana tan managseg-ang sisya.
4 Tan pinili na din Israelita
ay manbalin ay ipogaw na.
5 Ammok ay din Apo et manakabalin,
nangatngato mo olay sino ay didiyosen.
6 Amagena amin ay laydena
ed langit ya isnan daga,
sin baybay ya sin lanad na.
7 Ipakayang na di liboo sin addawi ay solsolin di daga,
kimat ay kakoyog di odan yan pawadaena,
pabelaena abe din dagem sin pangidoldolinana.
8 Ed Egipto yan pinse na
amin ay besag di ipogaw ya animal da.
9 Sinyal ay nakaskasdaaw et inpaipaila na
ay manosa sin ari ya din amin ay tuturay na.
10 Ad-ado ay nasyon di dinadael na,
napipigsa ay ari yan pinse na:
11 din arin di Amorreo ay si Sihon,
si Og ay ari ed Basan
ya amin ay ari ed Canaan.
12 Inpatawid na din daga da
sin Israelita ay ipogaw na.
13 Adi polos malinglingan din ngadan Diyos Apo,
sin amin ay ipogaw et mandinamag to.
14 Tan ikalintegan Diyos din ipogaw na
ya seg-angana din mansilsilbi en sisya.
15 Ngem din didiyosen di odom ay nasyon isnan daga
et owat inamag di ipogaw ay balitok ya palata.
16 Adi da makakali olay mo waday tepek da,
waday mata da ngem adi dan makaila.
17 Adi dan makadnge olay mo waday inga da,
maga dedan di biyag da.
18 Mais-o koma sin didiyosen ay sana
din nangamag ya mantalek en daida.
19 Dayawen yo si Diyos, dakayo ay Israelita,
dayawen yos sisya, dakayo ay papadi na.
20 Dakayo ay polin Levi, dayawen yos sisya,
dayawen yo, dakayo ay mangipatpateg en sisya.
21 Dayawen yo si Diyos ed Zion,
ed Jerusalem ay ili na.
Madaydayaw din Apo!